ភ្នំពេញ៖ លោក ផែង វណ្ណៈ អាចប្រឈមមុខនឹងការជាប់ពន្ធនាគាររហូតដល់២ឆ្នាំ បន្ទាប់តុលាការ  បាន បញ្ចប់ការសាកសួរ និងសម្រេចចោទប្រកាន់ចំនួន២បទល្មើស តាមបណ្តឹងមេធាវីសម្តេចតេជោ  ហ៊ុន សែន នាយករដ្ឋមន្ត្រីកម្ពុជា។

លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ ថ្លែងតាមបណ្ដាញ សង្គម  Telegram នៅព្រឹកថ្ងៃទី៣ ខែមេសា ឆ្នាំ២១៩នេះថា “ក្រោយពីបានពិនិត្យសំណុំរឿង និងការសាកសួរចម្លើយលើឈ្មោះ ផែង វណ្ណៈ  រួចមក តំណាងអយ្យការបានសម្រេចបើកការស៊ើបសួរដោយចោទប្រកាន់ពីបទបរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តបទឧក្រិដ្ឋជាអាទ៌ តាមមាត្រា៤៩៤ មាត្រា៤៩៥ និងមាត្រា៣០៥ នៃក្រមព្រហ្មទណ្ឌ ហើយបញ្ជូនបុគ្គលនេះ និងសំណុំរឿងទៅចៅក្រមស៊ើបសួរដើម្បីបន្តចំណាត់ការតាមនីតិវិធី”។ នៅដំណាក់កាលនេះ ចៅក្រមស៊ើបសួរនឹងសម្រេចឃុំខ្លួន ឬមិនឃុំខ្លួនលោក ផែង វណ្ណៈ។

គួររម្លឹកថា បទល្មើសញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមមាត្រា ៤៩៤និង៤៩៥ នៃក្រមព្រហ្មទណ្ឌ កំណត់ការផ្តន្ទាទោសដាក់ពន្ធនាគារ រយៈពេលពី៦ខែ ទៅ ២ឆ្នាំ និងពិន័យជាប្រាក់ពី១លាន រៀល ទៅ៤លានរៀល។ បទល្មើសបរិហារកេរ្តិ៍ ជាសាធារណៈ តាមមាត្រា៣០៥ នៃក្រមព្រហ្មទណ្ឌ  កំណត់ផ្តន្ទាទោស ពិន័យជាប្រាក់ពី១សែនរៀល ទៅ១០លាន រៀល៕ធ.ដ