កសិករដាំបន្លែនៅសៀមរាប បង្កើតចំណូលប្រចាំថ្ងៃ និងជួយផ្គត់ផ្គង់ទីផ្សារក្នុងស្រុក

សៀមរាប៖ ការដាំដុះបន្លែចម្រុះជាលក្ខណៈគ្រួសារតាមបែបប្រពៃណីរបស់ប្រជាកសិករក្នុងខេត្តសៀមរាប នៅតែដើរតួនាទីសំខាន់ក្នុងការផ្គត់ផ្គង់តម្រូវការទីផ្សារក្នុងស្រុក បង្កើតចំណូលបន្ថែមសម្រាប់គ្រួសារ និងចូលរួមកាត់បន្ថយការនាំចូលបន្លែពីខាងក្រៅ។

ការក្រោកពីព្រលឹមប្រមូលផល និងដឹកជញ្ជូនបន្លែស្រស់ទៅកាន់ទីផ្សារ បានក្លាយជាទម្លាប់ប្រចាំថ្ងៃរបស់កសិករដាំបន្លែបែបប្រពៃណីនៅសៀមរាប។ សកម្មភាពនេះមិនត្រឹមតែផ្គត់ផ្គង់អាហារស្រស់ដល់អ្នកប្រើប្រាស់ប៉ុណ្ណោះទេ ប៉ុន្តែថែមទាំងបង្កើតចំណូល និងរំហូរសាច់ប្រាក់នៅក្នុងសហគមន៍មូលដ្ឋានផងដែរ។

អ្នកស្រី វឿន សុភាព ជាប្រជាកសិករនៅភូមិបឹងជុំ ឃុំត្រពាំងធំ ស្រុកប្រាសាទបាគង ខេត្តសៀមរាប បានប្រាប់បណ្ដាញព័ត៌មាន AMS ថា អ្នកស្រីដាំបន្លែនៅជុំវិញផ្ទះតាមរដូវ ដូចជា តាសក់ ត្រប់ស្រួយ និងក្រសាំងទាប ដើម្បីយកទៅលក់នៅទីផ្សារប្រចាំថ្ងៃ និងរកចំណូលសម្រាប់ផ្គត់ផ្គង់ជីវភាពគ្រួសារ។

អ្នកស្រីបានឱ្យដឹងថា ការលក់បន្លែមិនសូវជួបការលំបាកនោះទេ ដោយភាគច្រើនមានម៉ូយមកទទួលទិញអស់។ ជាក់ស្ដែង ក្នុងមួយថ្ងៃ អ្នកស្រីអាចប្រមូលតាសក់ប្រមាណ ៣០ គីឡូក្រាម ត្រប់ស្រួយប្រមាណ ២៥ គីឡូក្រាម និងក្រសាំងទាបតិចជាង ១០ គីឡូក្រាម។

អ្នកស្រីបន្តថា នៅរដូវប្រាំង អ្នកស្រីក៏អាចទទួលបានបន្លែចម្រុះបន្ថែមពីអ្នកជិតខាង ដើម្បីយកទៅលក់បន្ត ដែលអាចរកចំណូលបានប្រមាណ ៥០ម៉ឺនទៅ ៦០ម៉ឺនរៀលក្នុងមួយថ្ងៃ។

ទន្ទឹមនឹងនេះ អ្នកស្រី វឿន សុភាព បានបញ្ជាក់ថា កសិករមួយចំនួននៅក្បែរខាងដែលប្រមូលផលបន្លែបានច្រើន ត្រូវក្រោកពីព្រឹក ដើម្បីដឹកយកទៅលក់ និងចែកចាយបន្តទៅទីផ្សារឱ្យបានទាន់ពេលវេលា។

ចំណែកអ្នកស្រី ជា សុភា និងស្វាមី លោក វណ្ណៈ ដែលប្រកបរបរទទួលទិញបន្លែ បានប្រាប់បណ្ដាញព័ត៌មាន AMS ថា ពួកគាត់ទទួលទិញបន្លែពីកសិដ្ឋានសុខភាព សៀមរាប ក្នុងបរិមាណប្រមាណ ៥០០ ទៅ ៦០០ គីឡូក្រាមក្នុងមួយថ្ងៃ ដើម្បីយកទៅលក់នៅទីផ្សារ។

អ្នកស្រី ជា សុភា បានឱ្យដឹងថា បន្លែពីកសិដ្ឋានមិនពិបាកលក់នោះទេ ហើយក៏មិនចាំបាច់ក្រោកពីព្រលឹមពេកដែរ ដោយកសិដ្ឋានបានកាត់ និងរៀបចំបន្លែរួចជាស្រេច។ អ្នកទទួលទិញគ្រាន់តែរៀបចំ ថ្លឹង និងដឹកយកមកទីផ្សារប៉ុណ្ណោះ។

ក្រៅពីបន្លែពីកសិដ្ឋាន អ្នកស្រីក៏ទទួលទិញបន្លែចម្រុះពីកសិករដែលដាំដោយខ្លួនឯងផងដែរ។ បន្លែទាំងនេះអាចមានបរិមាណប្រមាណ ១០០ គីឡូក្រាម ឬលើសពីនេះពីកសិករម្នាក់ ហើយជារួមអាចទទួលទិញបានប្រមាណ ៥០០ ទៅ ៦០០ គីឡូក្រាមក្នុងមួយថ្ងៃ ដើម្បីយកទៅលក់នៅទីផ្សារ។

អ្នកស្រីបានបន្ថែមថា ការទទួលទិញ និងលក់បន្លែជាប្រចាំថ្ងៃ មិនសូវមានការលំបាក ឬការប្រឈមធ្ងន់ធ្ងរនោះទេ ប៉ុន្តែជាប្រភពចំណូលបន្ថែមដែលអាចជួយផ្គត់ផ្គង់ជីវភាពគ្រួសារឱ្យកាន់តែប្រសើរឡើង។

អ្នកស្រី ជា សុភា បន្តថា កសិករដែលនៅឆ្ងាយ និងដាំបន្លែដោយខ្លួនឯង តែងដឹកផលិតផលមកលក់នៅទីផ្សារ ដោយអ្នកខ្លះក្រោកពីព្រលឹមនៅម៉ោង ៤ ឬម៉ោង ៥ ដើម្បីឱ្យទាន់ពេលវេលា។ សកម្មភាពនេះបានក្លាយជាទម្លាប់ប្រចាំថ្ងៃរបស់ប្រជាពលរដ្ឋដែលប្រកបរបរដាំ និងលក់បន្លែ ដើម្បីរកចំណូលបន្ថែមសម្រាប់គ្រួសារ។

ការផលិតបន្លែដោយកសិករក្នុងស្រុក ក៏មានសារៈសំខាន់ចំពោះសេដ្ឋកិច្ចផងដែរ តាមរយៈការជួយកាត់បន្ថយការនាំចូលបន្លែពីបរទេស និងរក្សាលំហូរសាច់ប្រាក់នៅក្នុងប្រទេស ព្រមទាំងផ្គត់ផ្គង់បន្លែស្រស់ និងមានគុណភាពដល់អ្នកប្រើប្រាស់។

លើសពីនេះ ការដាំបន្លែជាលក្ខណៈគ្រួសារក៏ជួយបង្កើតប្រភពចំណូលប្រចាំថ្ងៃ កាត់បន្ថយការចំណាយក្នុងគ្រួសារ និងជួយកាត់បន្ថយហានិភ័យនៃភាពក្រីក្រនៅតំបន់ជនបទ។

ទោះបីកសិកម្មកម្ពុជាកំពុងផ្លាស់ប្ដូរទៅរកការផលិតទំនើបកាន់តែច្រើនក៏ដោយ ការដាំដុះបន្លែចម្រុះជាលក្ខណៈគ្រួសារតាមបែបប្រពៃណី នៅតែជាផ្នែកមួយដ៏សំខាន់ក្នុងការទ្រទ្រង់ជីវភាពគ្រួសារកសិករ និងរក្សាស្ថិរភាពសេដ្ឋកិច្ចនៅមូលដ្ឋានក្នុងខេត្តសៀមរាប៕

លោក កែ ផុស | Mr. Ker Phors

ជីវប្រវត្តិ: បានបញ្ចប់ការសិក្សាថ្នាកអនុបណ្ឌិតផ្នែកប្រព័ន្ធផ្សព្វផ្សាយមកពីសហភាពសូវៀត និងមានបទពិសោធន៍ជាង ២០ឆ្នាំក្នុងវិស័យសារព័ត៌មាន។ បច្ចុប្បន្ន លោកជាអ្នកយកព័ត៌មានសេដ្ឋកិច្ចឱ្យសារព័ត៌មាន AMS Economy ។