សហគ្រិនក្នុងវិស័យ MSME ប្រែក្លាយវិបត្តិជាឱកាស ពង្រីកអាជីវកម្មរហូតមានដៃគូជាង ១,០០០

ភ្នំពេញ៖ សហគ្រិនថ្មីថ្មោងម្នាក់ក្នុងវិស័យសហគ្រាសធុនមីក្រូ តូច និងមធ្យម (MSME) បានប្រែក្លាយបញ្ហាប្រឈមជាបន្តបន្ទាប់ទៅជាឱកាស ដើម្បីពង្រីកអាជីវកម្មរបស់ខ្លួន ដោយបច្ចុប្បន្នអាចផ្គត់ផ្គង់ម្សៅនំភីហ្សាទៅកាន់ដៃគូជាង ១,០០០ នៅក្នុងប្រទេសកម្ពុជា។

លោក កឹម សាន ម្ចាស់សិប្បកម្មផលិតម្សៅនំភីហ្សា បានប្រាប់បណ្ដាញព័ត៌មាន AMS ថា អាជីវកម្មរបស់លោកបានចាប់ផ្ដើមនៅឆ្នាំ ២០១៩ ដោយបង្កើតម៉ាកយីហោភីហ្សាលក្ខណៈគ្រួសារ និងផលិតម្សៅសម្រាប់ផ្គត់ផ្គង់តែអតិថិជនដែលទិញសិទ្ធិអាជីវកម្មពីលោកប៉ុណ្ណោះ។ នៅពេលនោះ វត្ថុធាតុដើមសម្រាប់ផលិតម្សៅភីហ្សាត្រូវបាននាំចូលពីប្រទេសថៃ មកកែច្នៃបន្តិចបន្តួច មុននឹងផ្គត់ផ្គង់ទៅទីផ្សារ។

លោកបានឱ្យដឹងថា បន្ទាប់ពីអាជីវកម្មចាប់ផ្ដើមបានមិនយូរប៉ុន្មាន កម្ពុជាក៏ដូចជាពិភពលោកបានជួបវិបត្តិកូវីដ-១៩ ដែលធ្វើឱ្យប្រជាពលរដ្ឋជាច្រើនបាត់បង់ចំណូល និងកាត់បន្ថយការចំណាយលើទំនិញមិនចាំបាច់។

ទោះជាយ៉ាងណា លោក កឹម សាន បានមើលឃើញថា តម្រូវការអាហារនៅតែមាន ដូច្នេះលោកបានផ្លាស់ប្ដូរយុទ្ធសាស្ត្រ ដោយមិនត្រឹមផលិតសម្រាប់អតិថិជនដែលទិញសិទ្ធិអាជីវកម្មប៉ុណ្ណោះទេ ប៉ុន្តែបានពង្រីកការផ្គត់ផ្គង់ទៅកាន់អតិថិជនផ្សេងទៀតផងដែរ។

លោកបន្តថា ការផ្លាស់ប្ដូរយុទ្ធសាស្ត្រនេះបានជួយឱ្យការលក់ និងការផលិតកើនឡើង ព្រោះភីហ្សាដែលមានតម្លៃសមរម្យស្របទៅនឹងស្ថានភាពសេដ្ឋកិច្ចរបស់ប្រជាពលរដ្ឋ ដែលត្រូវការកាត់បន្ថយការចំណាយ។ ជាហេតុនាំឱ្យភីហ្សា ដែលធ្លាប់ត្រូវបានចាត់ទុកថាជាអាហារមានតម្លៃខ្ពស់ ក្លាយជាជម្រើសដែលទទួលបានការគាំទ្រកាន់តែច្រើន។

លោក កឹម សាន បានបន្ថែមថា បន្ទាប់មកទៀត អាជីវកម្មបានប្រឈមនឹងផលប៉ះពាល់ពីវិបត្តិសង្គ្រាមឈ្លានពានពីសំណាក់ប្រទេសថៃមកលើដែនដីកម្ពុជា។

ទោះបីសហគ្រាសជាច្រើនជួបការលំបាកក៏ដោយ លោកបានមើលឃើញឱកាសពីចលនាពហិកាឈប់ប្រើប្រាស់ទំនិញថៃរបស់ប្រជាពលរដ្ឋកម្ពុជា ដោយស្វែងរកប្រភពវត្ថុធាតុដើមពីប្រទេសផ្សេងៗជំនួស និងបញ្ឈប់ការនាំចូលវត្ថុធាតុដើមពីប្រទេសថៃទាំងស្រុង។

ទន្ទឹមនឹងនេះ លោកក៏បានបង្កើនការផលិតម្សៅភីហ្សា ដើម្បីឆ្លើយតបតម្រូវការទីផ្សារ រហូតបច្ចុប្បន្នអាចផ្គត់ផ្គង់ទៅកាន់ដៃគូជាង ១,០០០។

លោក កឹម សាន បានបញ្ជាក់ថា ស្របពេលពលរដ្ឋកម្ពុជាធ្វើពហិកាទំនិញថៃ សិប្បកម្មរបស់លោកក៏បានពង្រីកការផលិតផលិតផលបន្ថែមក្នុងវិស័យម្ហូបអាហារ ដូចជាម៉ាយូនេស និងទឹកលាបភីហ្សា ហើយគ្រោងផលិតទឹកប៉េងប៉ោះ និងទឹកម្ទេស ដើម្បីផ្គត់ផ្គង់លើទីផ្សារនាពេលខាងមុខ។

លោកមានប្រសាសន៍ថា៖ «អ្វីដែលយើងបានជួបប្រទះក្នុងរយៈជាងកន្លះទសវត្សរ៍មកនេះ វាមិនត្រឹមតែធ្វើឱ្យអាជីវកម្មនិងសិប្បកម្មយើងមិនដួលរលំប៉ុណ្ណោះទេ ផ្ទុយទៅវិញថែមទាំងរីកចម្រើនថែមទៀត ដោយសារតែយើងអាចកែច្នៃវិបត្តិឱ្យក្លាយជាឱកាស។ ជាក់ស្ដែង យើងកំពុងទទួលបានឱកាសថ្មីៗបន្ថែមទៀត ដើម្បីពង្រីកអាជីវកម្មឱ្យកាន់តែរីកចម្រើន ស្របពេលរាជរដ្ឋាភិបាលកំពុងលើកទឹកចិត្ត»។

លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមនៅកម្ពុជា (FASMEC) បានមានប្រសាសន៍ថា បន្ទាប់ពីប្រជាពលរដ្ឋកម្ពុជាធ្វើពហិកាឈប់ប្រើប្រាស់ផលិតផលថៃ សហគ្រាសក្នុងស្រុកមួយចំនួនបានខិតខំផលិតទំនិញជំនួសផលិតផលថៃ។ ទន្ទឹមនឹងការបង្កើនការផលិត សមាគមក៏បានតាមដាន និងត្រួតពិនិត្យ ដើម្បីធានាទាំងផលិតភាព និងគុណភាពផលិតផល។

លោកឧកញ៉ាបានបន្ថែមថា ទោះបីសហគ្រាសក្នុងស្រុកកំពុងពង្រីកការផលិត និងពង្រឹងគុណភាពផលិតផលក៏ដោយ ពួកគេនៅតែខ្វះវត្ថុធាតុដើមមួយចំនួន និងត្រូវការនាំចូលពីប្រទេសផ្សេងៗ ដើម្បីបំពេញតម្រូវការខ្សែច្រវាក់ផលិតកម្ម។

លោកមានប្រសាសន៍ថា៖ «ប្រទេសណាក៏ដូចប្រទេសណា វាមិនអាចមានវត្ថុធាតុដើមគ្រប់គ្រាន់នោះទេ គឺត្រូវការពឹងពាក់គ្នាទៅវិញទៅមក»៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។