រដ្ឋាភិបាលសម្រុកចែកបណ្ណកម្មសិទ្ធិដីធ្លីដែលបានវាស់វែង និងចុះបញ្ជីរួចជូនប្រជាពលរដ្ឋទូទាំងប្រទេស ដើម្បីប្រើប្រាស់តាមការចាំបាច់

ភ្នំពេញ ៖ បន្ទាប់ពីបានវាស់វែង និងចុះបញ្ជីរួច រាជរដ្ឋាភិបាលដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការបានសម្រុកចែកវិញ្ញាបនបត្រ ឬបណ្ណសម្គាល់ម្ចាស់កម្មសិទ្ធិដីធ្លីជូនប្រជាពលរដ្ឋតាមបណ្ដាខេត្តដែលបានបញ្ចប់ការវាស់វែង និងចុះបញ្ជីរួចរាល់ជាស្ថាពរ ជាក់ស្ដែង កាលពីសប្ដាហ៍កន្លងទៅនេះ រដ្ឋមន្ត្រីក្រសួងរៀបចំដែន នគរូបនីយកម្ម និងសំណង់ រួមជាមួយនឹងមន្ត្រីជាន់ខ្ពស់កម្ពុជាជាច្រើនរូបទៀត បានចុះប្រគល់បណ្ណជូនពលរដ្ឋក្នុងខេត្តគោលដៅជាច្រើន។

យោងតាម ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា កាលពីចុងសប្ដាហ៍កន្លងទៅនេះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចុះចែកបណ្ណសម្គាល់ម្ចាស់កម្មសិទ្ធិដីធ្លីជូនពលរដ្ឋក្នុងខេត្តកំពង់ឆ្នាំង និងខេត្តបន្ទាយមានជ័យ សរុបប្រមាណជាង ៥ម៉ឺនបណ្ណ ដើម្បីទុកជាប្រយោជន៍ និងប្រើប្រាស់តាមតម្រូវការចាំបាច់ ។

បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា បណ្ណកម្មសិទ្ធិចំនួន ២៥៧៩០បណ្ណ បានប្រគល់ជូនបងប្អូនអ្នកស្រុករលាប្អៀរ ស្រុកកំពង់ត្រឡាច ស្រុកទឹកផុស ខេត្តកំពង់ឆ្នាំង រួចរាល់ ដែលបណ្ណកម្មសិទ្ធិដីធ្លីទាំងនេះ ពិតជាមានតម្លៃ និងសារៈប្រយោជន៍ និងសូមចាត់ទុកការទទួលបានបណ្ណសម្គាល់ម្ចាស់អចលនវត្ថុនេះ ស្មើនឹងការទទួលបានកេរ្តិ៍មរតក ឬការប្រគល់ទ្រព្យសម្បត្តិដ៏មានតម្លៃ ដែលធានាបាននូវសុវត្ថិភាពផ្លូវច្បាប់យ៉ាងរឹងមាំក្នុងការកាន់កាប់អចលនវត្ថុ ព្រមទាំងជាដើមទុនសម្រាប់ទ្រទ្រង់ជីវភាព និងផ្ទេរតជំនាន់ដល់កូនចៅបន្តវេន ។

ដោយឡែក នៅឯខេត្តបន្ទាយមានជ័យឯណោះវិញ ក្រសួងរៀបចំដែនដី នគរូបនីយកម្ម និងសំណង់ ក៏បានប្រគល់វិញ្ញាបនបត្រសម្គាល់ម្ចាស់អចលនវត្ថុ ចំនួន ៣០៩៥៨ បណ្ណ ជូនប្រជាជនក្នុងក្រុងសិរីសោភ័ណ និងស្រុកមង្គលបូរី ដើម្បីជាចំណងដៃដល់ពលរដ្ឋជាម្ចាស់កម្មសិទ្ធិសម្រាប់ទុកប្រើប្រាស់ទៅតាមតម្រូវការជាក់ស្ដែង ជាពិសេសសម្រាប់ការពារទ្រព្យ និងទុកផ្ទេរតកូនចៅរបស់ខ្លួនជំនាន់ក្រោយៗ ។

ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ការចុះវាស់វែងដីធ្លី ការចុះបញ្ជី និងចេញបណ្ណជូនប្រជាពលរដ្ឋ គឺជាការបញ្ចប់ភាពចម្រូងចម្រាសនៅក្នុងសង្គម ដោយឯកឧត្តមមិនចង់ឃើញ និងមិនឱ្យកើតមាននូវទិដ្ឋភាពពលរដ្ឋឈ្លោះទាស់ទែងគ្នារឿងព្រំដីនៅជិតគ្នាទៀតឡើយ ។

ឯកឧត្តមបានបន្ត ៖

«បណ្ណកម្មសិទ្ធិដែលបងប្អូនពលរដ្ឋទទួលបាន មិនត្រឹមតែបញ្ជាក់ពីអត្តសញ្ញាណរបស់ដីធ្លីប៉ុណ្ណោះទេ តែជារបងការពារដ៏រឹងមាំ ដោយមិនអាចឱ្យជនណាមករំលោភបំពាន ឬដណ្ដើមយកពីបងប្អូនបានឡើយ ។ មិនត្រឹមតែប៉ុណ្ណោះ ប្លង់កម្មសិទ្ធិដីធ្លីទាំងនោះក៏អាចយកទៅដាក់បន្ទុកនៅស្ថាប័នធនាគារ ឬមីក្រូហិរញ្ញវត្ថុ សម្រាប់យកកម្ចីមកប្រើប្រាស់តាមគោលដៅ ដើម្បីលើកស្ទួយកម្រិតជីវភាពគ្រួសារផងដែរ»។

សូមជម្រាបថា ការបញ្ចប់ការវាស់វែង ចុះបញ្ជី និងចេញបណ្ណសម្គាល់ម្ចាស់ដីធ្លីនៅទូទាំងប្រទេសនេះដែរ នឹងជួយទាក់ទាញការវិនិយោគទាំងក្នុង និងក្រៅប្រទេស ជាមួយការផ្តល់នូវទំនុកចិត្តតាមផ្លូវច្បាប់យ៉ាងប្រាកដ ហើយវិនិយោគិន នឹងលែងបារម្ភចំពោះការវិនិយោគលើដីដែលមិនច្បាស់លាស់ទៀតហើយ ។ ចាប់ពីពេលនេះ រាល់ដីធ្លីនៅទូទាំងប្រទេសកម្ពុជា សុទ្ធតែមានប្លង់កម្មសិទ្ធិ មានម្ចាស់កម្មសិទ្ធិច្បាស់លាស់ ដូច្នេះ រាល់ការទិញ-លក់ដីធ្លី ក្នុងពេលឆាប់ៗនេះនឹងលែងមានដីអត់ប្លង់ទៀតហើយ ។

កន្លងមក សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានកោតសរសេរចំពោះសកម្មភាពរបស់ក្រសួងរៀបចំដែនដី នគរូបនីយកម្ម និងសំណង់ ដែលបានប្រឹងប្រែងយ៉ាងសកម្មពាក់ព័ន្ធទៅនឹងកិច្ចការងារដីធ្លី និងដោះស្រាយបញ្ហាវិវាទនានាជាច្រើន ជាពិសេស ការឈានដល់បញ្ចប់ការវាស់វែងដីធ្លីនៅទូទាំងប្រទេសជាប្រវត្តិសាស្ត្រ និងបន្តចុះបញ្ជី ដើម្បីចេញបណ្ណជូនដល់ម្ចាស់កម្មសិទ្ធិគ្រប់ៗគ្នា ៕