សមាគម៖ តម្រូវការមាន់អាចកើនដល់ ២៣-២៥ ម៉ឺនក្បាលក្នុងមួយថ្ងៃ នៅរដូវបុណ្យទាន

ភ្នំពេញ៖ តម្រូវការសាច់មាន់នៅកម្ពុជាត្រូវបានរំពឹងថានឹងកើនឡើងច្រើន នាឱកាសពិធីសែនក្បាលទឹក និងពិធីបុណ្យភ្ជុំបិណ្ឌនាជិតពេលខាងមុខ ខណៈសមាគមអ្នកចិញ្ចឹមសត្វនៅកម្ពុជាអះអាងថា ការផ្គត់ផ្គង់ក្នុងស្រុកមានសមត្ថភាពឆ្លើយតបតាមតម្រូវការ ដោយមិនខ្វះខាត ឬឡើងថ្លៃខ្ពស់ហួសហេតុនោះទេ។

លោក ស៊្រុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានឱ្យដឹងថា នាពេលឈានចូលដល់ពិធីសែនក្បាលទឹក និងពិធីកាន់បិណ្ឌ-ភ្ជុំបិណ្ឌ តម្រូវការសាច់នៅលើទីផ្សារតែងតែកើនឡើងខ្ពស់។ ទោះជាយ៉ាងណា ស្ថានភាពតម្លៃសាច់មាន់ នៅឆ្នាំនេះមានភាពល្អប្រសើរ ដោយសារការផ្គត់ផ្គង់ក្នុងស្រុកមានបរិមាណច្រើន។

លោកបានបញ្ជាក់ថា បរិមាណផ្គត់ផ្គង់ច្រើនរហូតមានការបារម្ភអំពីការផ្គត់ផ្គង់លើសតម្រូវការ ដែលអាចធ្វើឱ្យតម្លៃសាច់សត្វមួយចំនួនមានការប្រែប្រួលចុះថ្លៃបន្ថែមទៀត។

លោក ស៊្រុន ពៅ បានប៉ាន់ប្រមាណថា ក្នុងរដូវបុណ្យទាន ជាពិសេសពិធីសែនក្បាលទឹក និងពិធីបុណ្យភ្ជុំបិណ្ឌ ការចរាចរណ៍មាន់នៅលើទីផ្សារទូទាំងប្រទេស រួមមានមាន់កសិកម្ម មាន់បីសាសន៍ និងមាន់ស្រែ មានចំនួនប្រមាណ ២០ ទៅ ២៣ ម៉ឺនក្បាលក្នុងមួយថ្ងៃ ហើយពេលខ្លះអាចកើនឡើងដល់ ២៣ ទៅ ២៥ ម៉ឺនក្បាលក្នុងមួយថ្ងៃ។

ទោះបីការផ្គត់ផ្គង់មាន់សរុបមានភាពសម្បូរបែបក្តី ក៏មាន់ស្រែដែលជាប្រភេទសាច់មាន់ទទួលបានការនិយមខ្ពស់ក្នុងពិធីសែនព្រេន នៅតែប្រឈមនឹងការខ្វះការផ្គត់ផ្គង់នៅតាមតំបន់មួយចំនួន។

លោក បូរ៉ា អាជីវករលក់មាន់ស្រែដែលមានទីតាំងនៅភូមិដំណាក់ សង្កាត់ភ្នំពេញថ្មី ក្រោយផ្សារឈូកមាស បានឱ្យដឹងថា អតិថិជនបានបន្តកុម្ម៉ង់ទិញមាន់ស្រែ ប៉ុន្តែការផ្គត់ផ្គង់ជួបការលំបាក ដោយសារប្រភពទិញមាន់ស្រែពីខេត្តកំពង់ធំមានកម្រិត និងមិនទាន់អាចឆ្លើយតបបានពេញលេញតាមតម្រូវការ។

លោក បូរ៉ា បានបញ្ជាក់ថា ការលក់ប្រចាំថ្ងៃមានប្រមាណ ១០០ ក្បាល ប៉ុន្តែថ្ងៃខ្លះលក់បានត្រឹមប្រមាណ ៥០ក្បាល ដោយសាររកប្រភពមាន់ស្រែមិនបានគ្រប់គ្រាន់សម្រាប់ផ្គត់ផ្គង់ទីផ្សារដែលកំពុងមានតម្រូវការកើនឡើង។

លោកបានឱ្យដឹងថា មាន់ញីរស់មួយក្បាលមានតម្លៃ ២៤,០០០រៀល ខណៈមាន់ឈ្មោលរស់មានតម្លៃ ២២,០០០រៀល ដោយមាន់ទាំងនេះមានទម្ងន់ប្រមាណ ១.៥ គីឡូក្រាមក្នុងមួយក្បាល។

ជាមួយគ្នានេះ អ្នកស្រី រិទ្ធ ចន្ថា ប្រធានក្រុមប្រឹក្សាភិបាលនៃសហគមន៍កសិកម្មទឹកហូតមានជ័យក្តីសង្ឃឹម បានឱ្យដឹងថា សហគមន៍មានសមាជិក ១៣ គ្រួសារ និងចិញ្ចឹមមាន់ប្រមាណជាង ១,០០០ ក្បាល។ បច្ចុប្បន្ន សហគមន៍មិនមានផែនការចិញ្ចឹមក្នុងទ្រង់ទ្រាយធំនោះទេ ប៉ុន្តែនៅពេលមានបុណ្យទាន សហគមន៍នឹងបញ្ចេញមាន់ទៅកាន់ទីផ្សារនៅតាមខេត្តគោលដៅ ស្របតាមការបញ្ជាទិញ។

អ្នកស្រី រិទ្ធ ចន្ថា បានបញ្ជាក់ថា៖ «សហគមន៍មានសមាជិក ១៣គ្រួសារ ចិញ្ចឹមមាន់ប្រមាណជាង ១,០០០ក្បាល។ ទោះបីជាគ្មានផែនការចិញ្ចឹមទ្រង់ទ្រាយធំ ប៉ុន្តែសហគមន៍តែងតែបញ្ចេញមាន់លក់ទៅកាន់ខេត្តគោលដៅតាមការបញ្ជាទិញក្នុងរដូវបុណ្យទាន»។

អ្នកស្រីបានបន្ថែមថា បច្ចុប្បន្ន មាន់ស្រែរស់ញី និងឈ្មោលរបស់សហគមន៍មានតម្លៃ ២៧,០០០ រៀលក្នុងមួយក្បាល ខណៈមាន់ខ្លាញ់មានតម្លៃ ៣០,០០០ រៀលក្នុងមួយគីឡូក្រាម។

សរុបមក ទីផ្សារសាច់សត្វសម្រាប់រដូវបុណ្យទានឆ្នាំនេះ មានស្ថិរភាពល្អលើផ្នែកបរិមាណផ្គត់ផ្គង់ ដែលជួយទប់ទល់មិនឱ្យតម្លៃសាច់សត្វឡើងថ្លៃហួសហេតុ ខណៈកសិករក្នុងស្រុកបន្តជំរុញការផលិត ដើម្បីឆ្លើយតបនឹងតម្រូវការទីផ្សារក្នុងរដូវបុណ្យ៕

សមាគម៖ តម្រូវការមាន់អាចកើនដល់ ២៣-២៥ ម៉ឺនក្បាលក្នុងមួយថ្ងៃ នៅរដូវបុណ្យទាន

លោក កែ ផុស | Mr. Ker Phors

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន