ប៊ុលហ្ការី-អាល្លឺម៉ង់ ពង្រឹងកិច្ចសហប្រតិបត្តិការលើវិស័យបញ្ញាសិប្បនិម្មិត និងមនុស្សយន្ត

លោកនាយករដ្ឋមន្ត្រីប៊ុលហ្ការី លោក Rumen Radev នៅសប្តាហ៍នេះ បានជួបពិភាក្សាការងារជាមួយតំណាងវិទ្យាស្ថានស្រាវជ្រាវ និងគ្រឹះស្ថានបោះពុម្ពផ្សាយធំៗរបស់ប្រទេសអាល្លឺម៉ង់ នៅទីស្ដីការគណៈរដ្ឋមន្ត្រី ដើម្បីពិភាក្សាអំពីការបន្តពង្រីកកិច្ចសហប្រតិបត្តិការទ្វេភាគីលើវិស័យឧស្សាហកម្មបច្ចេកវិទ្យាជាន់ខ្ពស់ នវានុវត្តន៍ និងការស្រាវជ្រាវវិទ្យាសាស្ត្រ។

យោងតាមការចេញផ្សាយរបស់កាសែតប៊ុលហ្ការី Novinata បានឱ្យដឹងថា របៀបវារៈចម្បងរបស់រដ្ឋាភិបាល គឺការធ្វើទំនើបកម្មហេដ្ឋារចនាសម្ព័ន្ធវិទ្យាសាស្ត្ររបស់ប្រទេសប៊ុលហ្ការី ដែលជាជំហានយុទ្ធសាស្ត្រមួយក្នុងគោលបំណងរក្សាធនធានមនុស្សវ័យក្មេងដែលមានទេពកោសល្យ និងផ្តល់ឱកាសការងារប្រកួតប្រជែងខ្ពស់នៅក្នុងប្រទេស។

នៅក្នុងជំនួបនេះ ធ្វើឡើងក្រោមគំនិតផ្តួចផ្តើមរបស់សមាគមសហព័ន្ធអាល្លឺម៉ង់ ដើម្បីការអភិវឌ្ឍសេដ្ឋកិច្ច និងពាណិជ្ជកម្មក្រៅប្រទេស ដោយផ្តោតការយកចិត្តទុកដាក់ខ្លាំងលើការផ្សារភ្ជាប់គម្លាតរវាងសាកលវិទ្យាល័យប៊ុលហ្ការី និងអាល្លឺម៉ង់។

លោកនាយករដ្ឋមន្ត្រីបានសង្កត់ធ្ងន់ថា កិច្ចសហប្រតិបត្តិការរឹងមាំលើវិស័យអប់រំ គឺជាគ្រឹះដ៏សំខាន់ក្នុងការកសាងសេដ្ឋកិច្ចប្រកួតប្រជែងដែលមានតម្លៃបន្ថែមខ្ពស់។

លោកនាយករដ្ឋមន្ត្រី បន្តថា តាមរយៈភាពជាដៃគូវិទ្យាស្ថាននិងសាកលវិទ្យាល័យទាំងនេះ ប្រទេសទាំងពីរមានគោលបំណងជំរុញការផ្ទេរបច្ចេកវិទ្យានិងជំនាញវិទ្យាសាស្ត្រ បណ្តុះបណ្តាលអ្នកជំនាញដែលមានលក្ខណៈសម្បត្តិគ្រប់គ្រាន់សម្រាប់កម្លាំងពលកម្មនាពេលអនាគត ព្រមទាំងពន្លឿនការបំប្លែងលទ្ធផលស្រាវជ្រាវវិទ្យាសាស្ត្រពីក្នុងមន្ទីរពិសោធន៍ទៅកាន់ទីផ្សារពាណិជ្ជកម្ម។

ផ្នែកដ៏សំខាន់មួយទៀតនៃកិច្ចពិភាក្សា គឺការផ្ដោតលើការបញ្ចូលបច្ចេកវិទ្យាផលិតកម្មកម្រិតខ្ពស់ទៅក្នុងវិស័យឧស្សាហកម្មរបស់ប៊ុលហ្ការី ផងដែរ។

គណៈប្រតិភូទាំងពីរបានកំណត់យកវិស័យអាទិភាពខ្ពស់មួយចំនួនសម្រាប់គំនិតផ្ដួចផ្ដើមរួមគ្នា ដោយផ្តោតជាពិសេសលើការដាក់ឱ្យប្រើប្រាស់បញ្ញាសិប្បនិម្មិត (AI) នៅក្នុងវិស័យឧស្សាហកម្ម ការសហការលើប្រព័ន្ធស្វ័យប្រវត្តិនៃមនុស្សយន្តកម្រិតខ្ពស់ និងការអភិវឌ្ឍចង្វាក់ផលិតកម្មប្រកបដោយចីរភាព និងសន្សំសំចៃធនធានផងដែរ។

តាមរយៈការជំរុញគម្រោងរួមគ្នាក្នុងវិស័យបច្ចេកវិទ្យាឈានមុខទាំងនេះ រដ្ឋាភិបាលមានគោលដៅពន្លឿនការធ្វើទំនើបកម្មបច្ចេកវិទ្យានៃសេដ្ឋកិច្ចប៊ុលហ្ការី ព្រមទាំងបង្កើតប្រព័ន្ធអេកូឡូស៊ីដ៏រីកចម្រើនមួយ ដែលអាចឱ្យអ្នកវិទ្យាសាស្ត្រវ័យក្មេង និងអ្នកជំនាញបច្ចេកវិទ្យា អាចអភិវឌ្ឍខ្លួន និងជោគជ័យនៅក្នុងប្រទេសជាតិផ្ទាល់៕

លោក សន ស៊ុនលី | Mr. San Sounly

អ្នកសារព័ត៌មានអន្តរជាតិ

ប៊ុល​ហ្ការី​-​អាល្លឺម៉ង់​ ​ពង្រឹង​កិច្ចសហប្រតិបត្តិការ​លើ​វិស័យ​បញ្ញា​សិប្បនិម្មិត​ ​និង​មនុស្ស​យន្ត​

លោក សន ស៊ុនលី | Mr. San Sounly

អ្នកសារព័ត៌មានអន្តរជាតិ

ប៊ុលហ្ការី-អាល្លឺម៉ង់ ពង្រឹងកិច្ចសហប្រតិបត្តិការលើវិស័យបញ្ញាសិប្បនិម្មិត និងមនុស្សយន្ត