កម្ពុជារកចំណូលបាន ៤១៥ លានដុល្លារពីការនាំចេញអង្ករជាង ៧០ ម៉ឺនតោន ក្នុងរយៈពេល ៧ ខែ

ភ្នំពេញ៖ កម្ពុជាបាននាំចេញអង្ករចំនួន ៧០៧,៤៧១ តោន ទៅកាន់ទីផ្សារអន្តរជាតិ ក្នុងរយៈពេល ៧ ខែ ឆ្នាំ ២០២៦ ដោយទទួលបានចំណូលជាទឹកប្រាក់ជាង ៤១៥ លានដុល្លារសហរដ្ឋអាមេរិក។ នេះបើយោងតាមសហព័ន្ធស្រូវអង្ករកម្ពុជា (CRF) ចេញផ្សាយនៅថ្ងៃទី៥ ខែសីហា ឆ្នាំ២០២៦។

របាយការណ៍របស់សហព័ន្ធស្រូវអង្ករកម្ពុជា បានឱ្យដឹងថា ការនាំចេញអង្ករខាងលើត្រូវបានអនុវត្តតាមរយៈក្រុមហ៊ុននាំចេញអង្ករចំនួន ៦១ ក្រុមហ៊ុន ទៅកាន់គោលដៅចំនួន ៦៦ ប្រទេស និងតំបន់។

ក្នុងចំណោមទីផ្សារទាំងនេះ កម្ពុជាបាននាំចេញអង្ករទៅកាន់ប្រទេសនៅតំបន់អឺរ៉ុបចំនួន ៣៣ ប្រទេស ក្នុងបរិមាណ ២០៧,១៥៧ តោន ដែលមានតម្លៃ ១៥៦.៤៥ លានដុល្លារ។ ទៅកាន់ប្រទេសចិន និងហុងកុង មានចំនួន ១៧៤,៩៣០ តោន តម្លៃ ១០៣.៣១ លានដុល្លារ។

ចំណែកការនាំចេញទៅកាន់ប្រទេសក្នុងតំបន់អាស៊ានចំនួន ៥ ប្រទេស មានបរិមាណ ២៦៦,៣០០ តោន គិតជាទឹកប្រាក់ ១០២.៨៤ លានដុល្លារ។

ក្រៅពីនេះ កម្ពុជាបាននាំចេញអង្ករទៅកាន់គោលដៅចំនួន ២៥ ប្រទេសផ្សេងទៀត រួមមានប្រទេសនៅទ្វីបអាហ្វ្រិក មជ្ឈិមបូព៌ា អាមេរិក កាណាដា អូស្ត្រាលី និងនូវែលសេឡង់ ជាដើម ក្នុងបរិមាណ ៥៩,០៨៤ តោន ដែលមានតម្លៃ ៥២.៥២ លានដុល្លារ។

តាមប្រភេទអង្ករ អង្ករក្រអូបមានចំណែកធំបំផុត គឺ ៥៩.២៣ ភាគរយ បន្ទាប់មកអង្ករសគ្រាប់វែង ២៣.៦៦ ភាគរយ អង្ករបាក់គ្រប់ប្រភេទ ១៣.៧០ ភាគរយ អង្ករចំហុយ ១.៩៣ ភាគរយ អង្ករសរីរាង្គ ១.២៨ ភាគរយ និងអង្ករផ្សេងៗ ០.២ ភាគរយ។

ជាមួយគ្នានេះ កម្ពុជាក៏បាននាំចេញស្រូវសើមចំនួន ៣,០០៦,១២២ តោន ក្នុងទំហំទឹកប្រាក់ប៉ាន់ប្រមាណ ៦៦៥.៧០ លានដុល្លារសហរដ្ឋអាមេរិកផងដែរ។

លោក ឡាយ ឈុនហួរ ប្រធានសហព័ន្ធស្រូវអង្ករកម្ពុជា មានសុទិដ្ឋិនិយមថា កម្ពុជានឹងអាចសម្រេចបានគោលដៅរបស់រដ្ឋាភិបាល ក្នុងការនាំចេញអង្ករឱ្យបាន ១ លានតោន នៅក្នុងឆ្នាំ២០២៦។

លោកបានលើកឡើងថា ប្រសិនបើកម្ពុជាសម្រេចបានគោលដៅនេះ នោះនឹងក្លាយជាលើកដំបូងដែលការនាំចេញអង្ករប្រចាំឆ្នាំរបស់កម្ពុជាកើនឡើងផុតរបារ ១ លានតោន៕

លោក កែ ផុស | Mr. Ker Phors

ជីវប្រវត្តិ: បានបញ្ចប់ការសិក្សាថ្នាកអនុបណ្ឌិតផ្នែកប្រព័ន្ធផ្សព្វផ្សាយមកពីសហភាពសូវៀត និងមានបទពិសោធន៍ជាង ២០ឆ្នាំក្នុងវិស័យសារព័ត៌មាន។ បច្ចុប្បន្ន លោកជាអ្នកយកព័ត៌មានសេដ្ឋកិច្ចឱ្យសារព័ត៌មាន AMS Economy ។