កម្ពុជាត្រៀមអនុវត្តយុទ្ធសាស្ត្រ SME ២០២៦-២០៣០ រំពឹងថានឹងក្លាយជាចលករជំរុញកំណើនសេដ្ឋកិច្ចជាតិ

ភ្នំពេញ៖ រាជរដ្ឋាភិបាលកម្ពុជា គ្រោងដាក់ឱ្យអនុវត្ត «យុទ្ធសាស្ត្រជាតិស្តីពីការអភិវឌ្ឍសហគ្រាសធុនតូច និងមធ្យម ឆ្នាំ២០២៦-២០៣០» ក្នុងពេលឆាប់ៗខាងមុខ ដោយរំពឹងថានឹងក្លាយជាក្របខណ្ឌគោលនយោបាយដ៏សំខាន់ សម្រាប់ពង្រឹងសមត្ថភាពប្រកួតប្រជែងរបស់សហគ្រាសធុនតូច និងមធ្យម (SMEs) និងជំរុញកំណើនសេដ្ឋកិច្ចជាតិឱ្យកាន់តែមានភាពធន់ និងចីរភាព។

យុទ្ធសាស្ត្រជាតិនេះ ត្រូវបានរៀបចំឡើងដោយមានចក្ខុវិស័យ១ គោលបំណងស្នូល៣ សសរស្តម្ភយុទ្ធសាស្ត្រ៤ និងវិធានការសំខាន់ៗ១២ ដើម្បីគាំទ្រ SMEs នៅគ្រប់ដំណាក់កាលនៃវដ្តជីវិតអាជីវកម្ម ចាប់ពីការបង្កើតអាជីវកម្ម ការចុះបញ្ជី ការពង្រីកអាជីវកម្ម ការរៀបចំរចនាសម្ព័ន្ធឡើងវិញ រហូតដល់ការបញ្ចប់ប្រតិបត្តិការអាជីវកម្មប្រកបដោយប្រសិទ្ធភាព។

ថ្លែងក្នុងវេទិកាថ្នាក់ជាតិស្តីពីហិរញ្ញប្បទានសម្រាប់ធុរកិច្ច ឆ្នាំ២០២៦ កាលពីពេលថ្មីៗនេះ ឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា សម្តេចធិបតីនាយករដ្ឋមន្ត្រី ហ៊ុន ម៉ាណែត បានចុះហត្ថលេខាលើយុទ្ធសាស្ត្រជាតិនេះ កាលពីថ្ងៃទី១០ ខែកក្កដា ឆ្នាំ២០២៦ ដើម្បីបើកផ្លូវឱ្យមានការអនុវត្តជាក់ស្តែង។

ឯកឧត្តមបានប្រាប់បណ្តាញសារព័ត៌មាន AMS នៅថ្ងៃទី៧ ខែសីហា ឆ្នាំ២០២៦ ថា៖ «គោលបំណងសំខាន់នៃយុទ្ធសាស្ត្រនេះ គឺគាំទ្រដល់ SMEs នៅគ្រប់ដំណាក់កាលនៃវដ្តជីវិតរបស់ពួកគេ រួមមានការបង្កើត ការចុះបញ្ជី ការរីកចម្រើន ហើយនៅពេលអាជីវកម្មជួបការលំបាក ឬបញ្ឈប់ប្រតិបត្តិការ ត្រូវធានាថាមានយន្តការគាំទ្រសមស្រប»។

ឯកឧត្តម ហេង សុខគង់ បានឱ្យដឹងថា រាជរដ្ឋាភិបាលក៏បានប្តេជ្ញាសម្រួលនីតិវិធីចុះបញ្ជី SMEs ឱ្យកាន់តែងាយស្រួល និងឆាប់រហ័សជាងមុន។ ជំហានដំបូង គម្រោងសាកល្បងសម្រាប់សហគ្រាសផលិតសាប៊ូ មានគោលដៅកាត់បន្ថយរយៈពេលចុះបញ្ជីមកត្រឹម៦ថ្ងៃ សម្រាប់អាជីវកម្មដែលមានខ្សែច្រវាក់ផលិតកម្មរួចរាល់ ខណៈនីតិវិធីសម្រាប់រោងចក្រថ្មីៗ នឹងត្រូវអនុវត្តជាបន្តបន្ទាប់។

បន្ថែមពីនេះ រាជរដ្ឋាភិបាលគ្រោងបង្កើតយន្តការថ្មីចំនួន៣ រួមមាន ក្រុមការងារដឹកនាំដោយផ្ទាល់ពីនាយករដ្ឋមន្ត្រី ដើម្បីតាមដានកំណែទម្រង់ SMEs អង្គភាពសម្របសម្រួលសម្រាប់ធានាឱ្យប្រព័ន្ធចុះបញ្ជីដំណើរការរលូន និងមជ្ឈមណ្ឌលសេវាច្រកចេញចូលតែមួយ ដែលមានលក្ខណៈស្រដៀងនឹងក្រុមប្រឹក្សាអភិវឌ្ឍន៍កម្ពុជា (CDC) ដើម្បីទទួល និងដំណើរការពាក្យស្នើសុំចុះបញ្ជីទាំងតាមផ្ទាល់ និងតាមប្រព័ន្ធអនឡាញ។ រាជរដ្ឋាភិបាលក៏កំពុងពិចារណាបង្កើតកម្មវិធីទូរស័ព្ទសម្រាប់តាមដានវឌ្ឍនភាពនៃការចុះបញ្ជី SMEs ផងដែរ។

ឯកឧត្តមបានបញ្ជាក់ថា ការចុះបញ្ជី SMEs បានកើនឡើងប្រមាណ៤០ភាគរយ ក្នុងរយៈពេល៦ខែដំបូងនៃឆ្នាំ២០២៦។ ទន្ទឹមនឹងនេះ ការលក់របស់ SMEs ដែលពីមុនកើនឡើងត្រឹម៥ដល់៨ភាគរយ បានកើនឡើងប្រមាណ៣៥ដល់៤៥ភាគរយ បន្ទាប់ពីមាននិន្នាការគាំទ្រផលិតផលក្នុងស្រុកនាពេលថ្មីៗនេះ។

បន្ទាប់ពីយុទ្ធសាស្ត្រនេះត្រូវបានដាក់ឱ្យអនុវត្តជាផ្លូវការ រាជរដ្ឋាភិបាលគ្រោងចេញអនុក្រឹត្យចំនួន២បន្ថែមទៀត។ អនុក្រឹត្យទី១ នឹងកំណត់និយមន័យ និងចំណាត់ថ្នាក់ថ្មីសម្រាប់ SMEs ខណៈអនុក្រឹត្យទី២ នឹងកំណត់ការលើកទឹកចិត្តវិនិយោគសម្រាប់ SMEs រួមមានអត្ថប្រយោជន៍ពន្ធ និងការលើកទឹកចិត្តវិនិយោគផ្សេងៗ ស្រដៀងនឹងគម្រោងវិនិយោគធំៗ។

លោកឧកញ៉ា តែ តាំងប៉ ប្រធានសហព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានលើកឡើងថា ទោះបីមានការរីកចម្រើនក៏ដោយ SMEs នៅតែប្រឈមនឹងបញ្ហានីតិវិធីរដ្ឋបាលដែលត្រួតស៊ីគ្នារវាងស្ថាប័នរដ្ឋ។ លោកបានអំពាវនាវឱ្យក្រសួងពាក់ព័ន្ធបន្តសម្រួលឯកសារ និងដំណើរការចុះបញ្ជីឱ្យកាន់តែងាយស្រួល ខណៈម្ចាស់អាជីវកម្មក៏ត្រូវចូលរួមកែលម្អសមត្ថភាពអាជីវកម្មរបស់ខ្លួនផងដែរ។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា វិស័យ SMEs មានតួនាទីសំខាន់ក្នុងការជំរុញកំណើន និងពង្រឹងភាពធន់នៃសេដ្ឋកិច្ចកម្ពុជា។

លោកបានគាំទ្រយុទ្ធសាស្ត្រនេះ ដោយជឿជាក់ថា ប្រសិនបើអនុវត្តបានប្រកបដោយប្រសិទ្ធភាព វានឹងក្លាយជាចលករដ៏សំខាន់សម្រាប់ការរីកចម្រើនរបស់ SMEs និងការអភិវឌ្ឍសេដ្ឋកិច្ចជាតិ។

ចំណែកលោកបណ្ឌិត ស៊ឺន សំ អ្នកវិភាគគោលនយោបាយនៃរាជបណ្ឌិត្យសភាកម្ពុជា បានចាត់ទុកថា គោលនយោបាយថ្មីនេះ នឹងជួយលើកទឹកចិត្តវិនិយោគិនក្នុងស្រុក ជាពិសេសសហគ្រិនដែលទើបចាប់ផ្តើមអាជីវកម្ម។

ទោះជាយ៉ាងណា លោកបានស្នើឱ្យរាជរដ្ឋាភិបាលបន្តដោះស្រាយបញ្ហាប្រឈមជាក់ស្តែង ដូចជានីតិវិធីរដ្ឋបាល និងការឆ្លើយតបចំពោះបញ្ហារបស់អ្នកផលិត ដើម្បីធានាថាការអនុវត្តយុទ្ធសាស្ត្រនេះអាចសម្រេចបាននូវគោលដៅដែលបានកំណត់៕

លោក ញ៉ែម សុផល | Mr. NHEM SOPHAL

ជីវប្រវត្តិ: លោក ញ៉ែម សុផល ចាប់ផ្តើមអាជីពសារព័ត៌មាននៅឆ្នាំ១៩៩៣និងធ្លាប់មានបទពិសោធន៍ជិត៣០ឆ្នាំក្នុងវិស័យសារព័ត៌មាន ផ្នែកសេដ្ឋកិច្ច ពាណិជ្ជកម្ម អប់រំ វប្បធម៌ សង្គម និង បកប្រែភាសាអង់គ្លេស ។ ធ្លាប់បម្រើការក្នុងស្ថាប័នសារព័ត៌មានធំៗជាច្រើន ដូចជា ស្ថានីយទូរទស្សន៍ កាសែត ទស្សនាវដ្តី និងគេហទំព័រ ដោយទទួលបានការបណ្តុះបណ្តាលវិជ្ជាជីវៈទាំងនៅក្នុងស្រុកនិងក្រៅប្រទេស។ លោកបានបញ្ចប់ការសិក្សាថ្នាក់បរិញ្ញាបត្រជំនាញភាសាអង់គ្លេស។បច្ចុប្បន្នជាអ្នកយកព័ត៌មានជាន់ខ្ពស់ផ្នែកសេដ្ឋកិច្ចនិងផ្សព្វផ្សាយនៅ AMS Economy ៕