កម្ពុជា កំពុងប្រែក្លាយការដាំដុះដំឡូងមី ទៅជាឧស្សាហកម្មរកប្រាក់កម្រៃ ដើម្បីការជំរុញសេដ្ឋកិច្ចជនបទ និងលើក​កម្ពស់វិស័យកសិកម្ម។

សារព័ត៌មាន Bernama របស់ម៉ាឡេស៊ី កាលពីពេលថ្មីៗនេះ បង្ហាញថាដំឡូងមីកម្ពុជា មានផ្ទុកម្សៅខ្ពស់ ងាយស្រួលដាំដុះ ធន់នឹងជំងឺ និងផ្តល់ទិន្នផលខ្ពស់។

នៅទូទាំងពិភពលោកមានតម្រូវការកាកសំណល់ដំឡូងមីខ្ពស់ សម្រាប់ធ្វើជាចំណីសត្វ ជី ផលិតផលជីវបច្ចេកវិទ្យា និងជីវឧស្ម័ន ដែលអាចធ្វើឲ្យឧស្សាហកម្មដំឡូងមីរបស់កម្ពុជា កាន់តែរីកចម្រើន និងមានសក្ដានុពល។

ទោះជាយ៉ាងណា កាសែតដដែល ព្រមានថា ឧស្សាហកម្មដំឡូងមីរបស់​កម្ពុជា កំពុងតែប្រឈមនូវការប្រកួតប្រជែង ជាមួយប្រទេសថៃ វៀតណាម និងឥណ្ឌូនេស៊ី។

ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម ទទួលស្គាល់ថា វិស័យដំឡូវមីកម្ពុជា ប្រឈមការប្រកួតប្រជែងជាមួយប្រទេសថៃ ហើយកំពុងប្រឈមលើតម្លៃដឹកជញ្ជូនកើនឡើង​ដោយសារតែសង្គ្រាមនៅមជ្ឈិមបូព៌ា។ ប៉ុន្តែ ដំឡូងមីកម្ពុជា នៅតែមានទីផ្សារល្អ ពិសេសទីផ្សារវៀតណាម និងចិន។

ឯកឧត្តម វ៉ា រុតសាន បានថ្លែងថា៖

“ទីផ្សារដំឡូងមីរបស់យើងមាន។ មានប៉ុន្មានគេទិញយក និយាយរឿងទីផ្សារមិនខ្វះទីផ្សារទេ ហើយទីផ្សារសំខាន់គឺនៅវៀតណាម និងចិន។”

លោក ស៊ីន វុទ្ធី អ្នកនាំពាក្យសមាគមសម្ព័ន្ធដំឡូងមីកម្ពុជា-ចិន ឲ្យដឹងថា គិតត្រឹមដើមខែឧសភា ឆ្នាំ ២០២៦ សមាគមបាននាំចេញដំឡូងមីស្ងួតទៅទីផ្សារចិន ប្រមាណជាង ១០ម៉ឺនតោន។  សមាគមមានផែនការពង្រីកការនាំចេញដំឡូងទៅកាន់ទីផ្សារចិនបន្ថែមទៀត។

លោក ស៊ីន វុទ្ធី បាននិយាយថា៖

“គិតត្រឹមថ្ងៃនេះសមាគមបានផ្គត់ផ្គង់ដំឡូងមីស្ងួតទៅចិនជាង ១០ ម៉ឺនតោនហើយ។ ជាគោលការណ៍ត្រៀមផ្គត់ផ្គង់ទៅចិនឲ្យបាន ២៥ ម៉ឺនតោន។”

កម្ពុជា បានជាប់ចំណាត់​ថ្នាក់​ជាប្រទេសនាំចេញដំឡូងមី ធំជាងគេទី ៤ នៅអាស៊ី និងចំណាត់ថ្នាក់ទី ១០ នៅលើពិភពលោក ដែលអាចផលិតដំឡូងមី បានប្រហែល ១៦ លានតោន និងអាចរកប្រាក់ចំណូលបាន ៦៩០​ លានដុល្លារ នៅឆ្នាំ ២០២៥។

ដំឡូងមី បានជាប់ចំណាត់ថ្នាក់ជាដំណាំនាំចេញដ៏សំខាន់បំផុតទីពីររបស់កម្ពុជា បន្ទាប់ពីផលិតផលស្រូវ។ ដំណាំ​លេចធ្លោ​ផ្សេងទៀត ​ដែល​ដាំដុះ​ក្នុង​ទ្រង់ទ្រាយ​ធំនៅក្នុងប្រទេសកម្ពុជា ​មាន ស្វាយចន្ទី ស្ករត្នោត កៅស៊ូ ម្រេច ស្វាយ និង​ចេក។

កម្ពុជា មានគោលបំណងជំរុញការនាំចេញដំឡូងមី ឱ្យកើនឡើងដល់ ១,២ ពាន់លានដុល្លារនៅឆ្នាំ ២០៣០។

យោងតាមទិន្នន័យក្រសួងពាណិជ្ជកម្ម បង្ហាញថា នៅត្រីមាសទី ១ ឆ្នាំ ២០២៦ កម្ពុជា ​រក​ចំណូល​បានជាង ៣៧៦ លានដុល្លារ ​ពីការនាំចេញដំឡូងមី កើនឡើងជាង ១៦ ភាគរយ បើធៀបនឹងរយៈពេលដូចគ្នានៅឆ្នាំ ២០២៥៕ អត្ថបទ៖ ខន ណារី AMS