កម្ពុជា ជំរុញការកៀរគរហិរញ្ញប្បទានអាកាសធាតុ ដើម្បីការពារសេដ្ឋកិច្ចពីហានិភ័យនាពេលអនាគត

ភ្នំពេញ៖ ទោះបីជាប្រទេសកម្ពុជាបញ្ចេញឧស្ម័នផ្ទះកញ្ចក់តិចជាង ១% នៃការបំភាយសរុបនៅទូទាំងពិភពលោកក៏ដោយ ក៏កម្ពុជាកំពុងប្រឈមនឹងផលប៉ះពាល់ធ្ងន់ធ្ងរពីការប្រែប្រួលអាកាសធាតុ ដែលអាចបង្កការខាតបង់សេដ្ឋកិច្ចស្មើនឹង ២,៥% នៃផលិតផលក្នុងស្រុកសរុប (GDP) នៅឆ្នាំ២០៣០ និងជិត ១០% នៅឆ្នាំ២០៥០។

ក្នុងស្ថានភាពនេះ កម្ពុជាកំពុងបង្កើនការកៀរគរហិរញ្ញប្បទានអាកាសធាតុ និងជំនួយបច្ចេកទេសពីសហគមន៍អន្តរជាតិ ដើម្បីគាំទ្រដល់ការអនុវត្តផែនការឆ្លើយតបនឹងការប្រែប្រួលអាកាសធាតុ។

អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា បានប្រាប់បណ្ដាញសារព័ត៌មាន AMS ថា កម្ពុជាកំពុងស្ថិតក្នុងចំណុចប្រឈមមួយ ដោយសារស្ថានភាពសេដ្ឋកិច្ចសកលមិនប្រាកដប្រជា ដែលធ្វើឱ្យការទទួលបានហិរញ្ញប្បទានដោយផ្ទាល់ឱ្យបានឆាប់រហ័ស និងចំគោលដៅមិនមែនជារឿងងាយស្រួលនោះទេ។

ឯកឧត្តមបន្តថា តំណាងកម្ពុជាបាននិងកំពុងចូលរួមយ៉ាងសកម្មជាមួយអង្គការសហប្រជាជាតិ និងប្រទេសដៃគូអភិវឌ្ឍន៍ ដើម្បីកៀរគរហិរញ្ញប្បទានអាកាសធាតុ និងជំនួយបច្ចេកទេសពីសហគមន៍អន្តរជាតិ សម្រាប់គាំទ្រកម្មវិធីកាត់បន្ថយការបំភាយឧស្ម័នផ្ទះកញ្ចក់ក្នុងវិស័យសំខាន់ៗ រួមមាន ថាមពល កសិកម្ម ព្រៃឈើ ការប្រើប្រាស់ដីធ្លី និងការគ្រប់គ្រងសំណល់។

តាមការបញ្ជាក់របស់មន្ត្រីក្រសួងបរិស្ថាន កម្ពុជាបានដាក់ចេញយុទ្ធសាស្ត្ររួមចំណែករបស់ជាតិដំណាក់កាលទី៣ ស្តីពីការប្រែប្រួលអាកាសធាតុ (NDC 3.0) ដែលមានតម្រូវការវិនិយោគសរុបចំនួន ៣២,២ ពាន់លានដុល្លារអាម៉េរិក។ ក្នុងនោះ ជាង ២២ ពាន់លានដុល្លារអាម៉េរិកត្រូវបានកំណត់សម្រាប់វិធានការកាត់បន្ថយការបំភាយឧស្ម័ន និងជាង ៩ ពាន់លានដុល្លារអាម៉េរិកសម្រាប់ការបន្សាំខ្លួនទៅនឹងការប្រែប្រួលអាកាសធាតុ។

ផែនការនេះមានគោលដៅកាត់បន្ថយការបំភាយឧស្ម័នចំនួន ៥៥% នៅត្រឹមឆ្នាំ២០៣៥ និងឈានទៅសម្រេចភាពអព្យាក្រឹតកាបូននៅឆ្នាំ២០៥០ ដែលជាការប្តេជ្ញាចិត្តរបស់កម្ពុជាក្នុងការចូលរួមដោះស្រាយបញ្ហាអាកាសធាតុជាមួយសហគមន៍អន្តរជាតិ។

ទោះជាយ៉ាងណា ទឹកប្រាក់ ៣២,២ ពាន់លានដុល្លារអាម៉េរិកនេះ មិនមែនជាថវិកាដែលកម្ពុជាមានស្រាប់ទាំងអស់នោះទេ។ ប្រមាណ ៣៣% នៃតម្រូវការវិនិយោគសរុបត្រូវបានរំពឹងថានឹងមកពីថវិកាជាតិ ខណៈ ៦៧% ទៀតត្រូវការកៀរគរពីប្រភពហិរញ្ញប្បទានខាងក្រៅ តាមរយៈមូលនិធិអាកាសធាតុ និងដៃគូអភិវឌ្ឍន៍នានា។

ពាក់ព័ន្ធនឹងការកៀរគរហិរញ្ញប្បទាននេះ ឯកឧត្តម ខ្វៃ អាទិត្យា បានលើកឡើងពីតួនាទីរបស់កម្ពុជានៅក្នុងសន្និសីទអង្គការសហប្រជាជាតិស្តីពីអាកាសធាតុថ្មីៗនេះ ដោយបញ្ជាក់ថា ក្រសួងបរិស្ថានបានដើរតួជាសំឡេងតំណាងឱ្យប្រទេសដែលងាយរងគ្រោះ ដើម្បីជំរុញឱ្យសហគមន៍អន្តរជាតិកែទម្រង់ប្រព័ន្ធហិរញ្ញវត្ថុ និងអនុវត្តតាមការសន្យាផ្តល់ហិរញ្ញប្បទានចំនួន ១,៣ ទ្រីលានដុល្លារអាម៉េរិកដល់ប្រទេសងាយរងគ្រោះ។

កម្ពុជាបានជំរុញឱ្យហិរញ្ញប្បទាននេះផ្តោតលើជំនួយឥតសំណង ឬកម្ចីដែលមានលក្ខខណ្ឌអនុគ្រោះខ្ពស់ ដើម្បីជួយដល់ប្រទេសកំពុងអភិវឌ្ឍន៍ និងប្រទេសដែនកោះ ដែលរងផលប៉ះពាល់ពីការប្រែប្រួលអាកាសធាតុ។

ជាមួយគ្នានេះ លោក សឿង សារឿន នាយកប្រតិបត្តិនៃអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា យល់ថា ការកៀរគរទុនវិនិយោគក្នុងទំហំធំបែបនេះអាចសម្រេចបានតាមដំណាក់កាល ដោយកម្ពុជាត្រូវពង្រឹងការអនុវត្តកម្មវិធី NDC 3.0 និងបង្កើនការវិនិយោគលើថាមពលស្អាត កសិកម្មបៃតង និងការការពារធនធានធម្មជាតិ។

លោកក៏បានសង្កត់ធ្ងន់លើសារៈសំខាន់នៃការពង្រឹងតម្លាភាព គណនេយ្យភាព និងការចូលរួមពីវិស័យឯកជន សង្គមស៊ីវិល និងសហគមន៍មូលដ្ឋាន ដើម្បីធានាថា ហិរញ្ញប្បទានដែលទទួលបានត្រូវបានប្រើប្រាស់ប្រកបដោយប្រសិទ្ធភាព និងស្របតាមគោលដៅដែលបានកំណត់។

បន្ថែមពីនេះ លោក សឿង សារឿន បានលើកឡើងថា កម្ពុជាមានសក្តានុពលក្នុងទីផ្សារកាបូន ជាពិសេសតាមរយៈការការពារព្រៃឈើ និងគម្រោង REDD+ ខណៈទីផ្សារពិភពលោកកំពុងមានតម្រូវការឥណទានកាបូនដែលមានគុណភាពខ្ពស់ អាចទុកចិត្តបាន និងគោរពសិទ្ធិមនុស្ស ព្រមទាំងបរិស្ថាន។

លោកបានបញ្ជាក់ថា ដើម្បីទទួលបានឱកាសពីទីផ្សារនេះ កម្ពុជាត្រូវពង្រឹងស្តង់ដារវាស់វែង រាយការណ៍ និងផ្ទៀងផ្ទាត់ (MRV) ការអនុវត្តមាត្រា៦ នៃកិច្ចព្រមព្រៀងទីក្រុងប៉ារីស និងការទប់ស្កាត់ការរាប់បញ្ចូលការកាត់បន្ថយកាបូនស្ទួន។ លោកបន្ថែមថា កម្ពុជាគួរប្រកួតប្រជែងដោយផ្អែកលើគុណភាពឥណទានកាបូន ជាជាងតម្លៃទាប ឬបរិមាណច្រើន។

តាមរយៈក្រសួងបរិស្ថាន កម្ពុជាក៏បានបញ្ជាក់ពីការបន្តចូលរួមយ៉ាងសកម្មលើឆាកអន្តរជាតិ តាមរយៈ «ផែនទីបង្ហាញផ្លូវពីបាគូទៅបេឡេម» ដែលបានដាក់ចេញក្នុងកិច្ចប្រជុំ COP30។ ផែនទីបង្ហាញផ្លូវនេះមានគោលដៅកៀរគរហិរញ្ញប្បទានអាកាសធាតុសកលចំនួន ៣០០ ពាន់លានដុល្លារអាម៉េរិកក្នុងមួយឆ្នាំនៅត្រឹមឆ្នាំ២០៣៥ និងជំរុញឱ្យសហគមន៍អន្តរជាតិ និងប្រទេសអភិវឌ្ឍន៍រួមចំណែកផ្តល់ហិរញ្ញប្បទានសរុបចំនួន ១,៣ ទ្រីលានដុល្លារអាម៉េរិកក្នុងមួយឆ្នាំ ដើម្បីជួយដល់ប្រទេសដែលងាយរងគ្រោះពីការប្រែប្រួលអាកាសធាតុ៕

កម្ពុជា ជំរុញការកៀរគរហិរញ្ញប្បទានអាកាសធាតុ ដើម្បីការពារសេដ្ឋកិច្ចពីហានិភ័យនាពេលអនាគត

លោក ជិន សុភ័ក្ដ្រ | Mr. Chin Sopheak

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន

កម្ពុជា​ ​ជំរុញ​ការ​កៀរគរ​ហិរញ្ញប្បទាន​អាកាសធាតុ ​​ដើម្បី​ការពារ​សេដ្ឋកិច្ច​ពី​ហានិភ័យ​នា​ពេល​អនាគត​

លោក​ ​ជិន​ សុភ័ក្ដ្រ | Mr. Chin Sopheak

កម្ពុជា ជំរុញការកៀរគរហិរញ្ញប្បទានអាកាសធាតុ ដើម្បីការពារសេដ្ឋកិច្ចពីហានិភ័យនាពេលអនាគត

លោក ជិន សុភ័ក្ដ្រ | Mr. Chin Sopheak