សហគ្រិនកម្ពុជារំពឹងថាអង្គភាព SME ថ្មី នឹងជួយធ្វើឱ្យបរិយាកាសអាជីវកម្មកាន់តែប្រសើរ

ភ្នំពេញ៖ សហគ្រិន និងពាណិជ្ជករកម្ពុជា បានស្វាគមន៍ និងគាំទ្រការបង្កើតអង្គភាពសម្របសម្រួលសហគ្រាសធុនតូច និងមធ្យម (SME) ដែលត្រូវបានបង្កើតឡើងតាមព្រះរាជបញ្ជារបស់ព្រះមហាក្សត្រ ដោយស្ថិតក្រោមការបញ្ជា និងដឹកនាំផ្ទាល់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដោយរំពឹងថា អង្គភាពនេះនឹងជួយធ្វើឱ្យវិស័យសហគ្រាសធុនតូច និងមធ្យមនៅកម្ពុជាកាន់តែរីកចម្រើន និងបរិយាកាសអាជីវកម្មកាន់តែប្រសើរ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា និងជាអ្នកជំនួញមួយរូបនៅកម្ពុជា បានប្រាប់បណ្ដាញព័ត៌មាន AMS ថា ក្នុងនាមវិស័យឯកជន អ្នកឧកញ៉ាសូមគាំទ្រ និងស្វាគមន៍ការបង្កើតអង្គភាពសម្របសម្រួលសហគ្រាសធុនតូច និងមធ្យមនេះ។

អ្នកឧកញ៉ាចាត់ទុកអង្គភាពនេះថា ជា «អង្គភាព SME ពិសេស» សម្រាប់វះកាត់រាល់បញ្ហាស្មុគស្មាញដែលធ្លាប់រាំងស្ទះ ឬបង្កើតការិយាធិបតេយ្យ ដែលរំខានដល់សហគ្រាសធុនតូច និងមធ្យម។

អ្នកឧកញ៉ាបន្តថា បច្ចុប្បន្ននេះ គ្រប់វិស័យភាគច្រើនស្ថិតនៅក្នុងវិស័យសហគ្រាសធុនតូច និងមធ្យមរបស់កម្ពុជា។ ដូច្នេះ ប្រសិនបើរាជរដ្ឋាភិបាល និងគ្រប់ភាគីរួមគ្នាកែលម្អ និងកែទម្រង់លើគ្រប់វិស័យនៃសេដ្ឋកិច្ច នោះនឹងធ្វើឱ្យវិស័យសហគ្រាសធុនតូច និងមធ្យមកាន់តែល្អប្រសើរ ហើយនៅពេលវិស័យនេះល្អ សេដ្ឋកិច្ចកម្ពុជាក៏នឹងកាន់តែល្អប្រសើរផងដែរ។

អ្នកឧកញ៉ា បានលើកឡើងថា៖ «ដូចដែលសម្ដេចធិបតី ហ៊ុន ម៉ាណែត បានលើកឡើងកន្លងមកថា ប្រសិនបើចង់ឱ្យគេមកលេងផ្ទះយើង ឬមុននឹងយើងទៅហៅភ្ញៀវមកលេងផ្ទះយើង លុះត្រាតែផ្ទះយើងស្អាតសិន។ ដូច្នេះ ការបង្កើតអង្គភាពសម្របសម្រួលសហគ្រាសធុនតូច និងមធ្យមនៅពេលនេះ គឺជាការសម្អាតផ្ទះ ដើម្បីទាក់ទាញវិនិយោគិនមកកាន់ប្រទេសកម្ពុជា»។

ទន្ទឹមនឹងនេះ សភាពាណិជ្ជកម្មកម្ពុជាក៏កំពុងជំរុញតុលាការពាណិជ្ជកម្ម ដើម្បីផ្តល់ទំនុកចិត្តកាន់តែខ្លាំងដល់វិនិយោគិន និងធុរជនដែលមកធ្វើអាជីវកម្មនៅប្រទេសកម្ពុជា។

លោក ឆុន សុភា តំណាងសហគ្រាស ជេអឹមអិលអេច ផលិតម្សៅចេកណាំវ៉ា បានមានប្រសាសន៍ថា ក្នុងនាមជាសហគ្រិនមួយរូបនៅកម្ពុជា និងជាសហគ្រាសដែលបានចុះបញ្ជីស្របច្បាប់នៅក្រសួងត្រឹមត្រូវ លោកយល់ថា អ្វីដែលរាជរដ្ឋាភិបាលបានធ្វើ នឹងផ្តល់ផលប្រយោជន៍ដល់វិស័យសហគ្រាសធុនតូច និងមធ្យមនៅកម្ពុជា ព្រោះអ្វីដែលរាជរដ្ឋាភិបាលធ្វើ គឺសុទ្ធតែចង់ឱ្យប្រទេសរីកចម្រើន។

លោកបន្តថា លោកស្នើសុំ និងអំពាវនាវឱ្យពលរដ្ឋខ្មែរទូទាំងប្រទេសបន្តធ្វើពហិការ និងនាំគ្នាងាកមកគាំទ្រផលិតផលក្នុងស្រុកឱ្យបានច្រើន។ នៅពេលពលរដ្ឋងាកមកគាំទ្រផលិតផលក្នុងស្រុក នោះនឹងធ្វើឱ្យផលិតផលក្នុងស្រុកមានតម្រូវការខ្ពស់ ហើយនៅពេលមានតម្រូវការខ្ពស់ នឹងធ្វើឱ្យការផលិតកើនឡើង។

លោកបន្ថែមថា ការកើនឡើងនៃការផលិត នឹងធ្វើឱ្យសហគ្រាសនីមួយៗមានតម្រូវការបុគ្គលិកកាន់តែច្រើន។ នៅពេលនោះ រដ្ឋក៏ទទួលបានចំណូលពន្ធ ខណៈពលរដ្ឋក៏ទទួលបានប្រាក់បៀវត្សរ៍សមរម្យសម្រាប់ផ្គត់ផ្គង់ជីវភាព។

ដោយឡែក ម្ចាស់សិប្បកម្មមួយកន្លែងនៅរាជធានីភ្នំពេញ ដែលមិនទាន់មានអាជ្ញាបណ្ណ និងមិនទាន់បានចុះបញ្ជីលើផលិតផលរបស់ខ្លួន បានប្រាប់តាមទូរសព្ទថា ក្នុងរយៈពេលប៉ុន្មានខែចុងក្រោយនេះ សម្ដេចធិបតី ប្រមុខរាជរដ្ឋាភិបាល បានខិតខំជួយដល់វិស័យសហគ្រាសធុនតូច និងមធ្យម។

តាមរយៈសកម្មភាពនេះ ក្នុងនាមជាម្ចាស់សហគ្រាសដែលមិនទាន់បានចុះបញ្ជី លោកនឹងតាំងចិត្តរៀបចំឯកសារចុះបញ្ជីស្របច្បាប់ ព្រោះរាល់ការធ្វើអាជីវកម្មទាំងអស់ មានតែការធ្វើអាជីវកម្មស្របច្បាប់ទេ ទើបទទួលបានការគាំទ្រពីរាជរដ្ឋាភិបាល ក៏ដូចជាផ្តល់ទំនុកចិត្តដល់អតិថិជន និងអ្នកប្រើប្រាស់ផងដែរ។

គិតត្រឹមដំណាច់ឆ្នាំ២០២៥ សហគ្រាសធុនតូច និងមធ្យម និងសិប្បកម្មដែលបានចុះបញ្ជីមានសរុប ៤៤ ៧៩៥មូលដ្ឋាន ក្នុងនោះសហគ្រាសដែលគ្រប់គ្រងដោយសហគ្រិនស្ត្រីមានចំនួន ៨ ៦៧០មូលដ្ឋាន និងបានផ្តល់ការងារដល់ពលកម្មសរុប ៤៩២ ១៣១នាក់។ នេះបើយោងតាមរបាយការណ៍របស់ក្រសួងឧស្សាហកម្ម។

របាយការណ៍ដដែលបង្ហាញថា ក្នុងឆ្នាំ២០២៥ ការចុះបញ្ជីសហគ្រាសធុនតូច និងមធ្យម និងសិប្បកម្មផ្នែកកម្មន្តសាលថ្មីមានចំនួន ១ ២៦២មូលដ្ឋាន ខណៈក្រសួងបានចេញវិញ្ញាបនបត្រដំណើរការចំនួន ១ ១៤៨មូលដ្ឋាន និងវិញ្ញាបនបត្របន្តចំនួន ១ ៣៦៧មូលដ្ឋាន ដែលបានបង្កើតការងារថ្មីចំនួន ២៣ ៥៩៧នាក់៕

សហគ្រិនកម្ពុជារំពឹងថាអង្គភាព SME ថ្មី នឹងជួយធ្វើឱ្យបរិយាកាសអាជីវកម្មកាន់តែប្រសើរ

លោក អ៊ិច ណែត | Mr. Ich Neth

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន

សហគ្រិន​កម្ពុជា​រំពឹង​ថា​​អង្គភាព​ SME ​ថ្មី​ ​នឹង​ជួយ​ធ្វើឱ្យ​បរិយាកាស​អាជីវកម្ម​កាន់តែ​ប្រសើរ

លោក អ៊ិច ណែត | Mr. Ich Neth

សហគ្រិនកម្ពុជារំពឹងថាអង្គភាព SME ថ្មី នឹងជួយធ្វើឱ្យបរិយាកាសអាជីវកម្មកាន់តែប្រសើរ