គ្រឹះស្ថាន ខេមា រៀបចំកម្មវិធីជំរុញការដាំដើមឈើហូបផ្លែនៅតាមសហគមន៍

គ្រឹះស្ថាន ខេមា មីក្រូហិរញ្ញវត្ថុ លីមីតធីត បានរៀបចំសកម្មភាពដាំដើមឈើប្រណីត ចែកកូនឈើហូបផ្លែចំនួន ២០០ដើម និងលើកកម្ពស់អនាម័យ នៅសាលាបឋមសិក្សា មង្គលបូរី នៅថ្ងៃទី១៥ ខែសីហា ឆ្នាំ២០២៦ ដើម្បីអបអរខួបអនុស្សាវរីយ៍ ១៦ឆ្នាំ នៃគ្រឹះស្ថាន ខេមា។

ថ្លែងក្នុងកម្មវិធីដាំដើមឈើក្រោមប្រធានបទ «ភូមិខ្ញុំសម្បូរផ្លែឈើ» ប្រព្រឹត្តទៅនៅសាលាបឋមសិក្សា មង្គលបូរី នៅភូមិមង្គលបូរី ឃុំសំរោងលើ ស្រុកអង្គស្នួល ខេត្តកណ្ដាល លោក សែន កំសាន្ត នាយកនាយកដ្ឋានឥណទាន នៃគ្រឹះស្ថាន ខេមា បានគូសបញ្ជាក់ថា គោលបំណងនៃកម្មវិធីភូមិខ្ញុំសម្បូរផ្លែឈើនេះ គឺដើម្បីលើកទឹកចិត្តការដាំដំណាំហូបផ្លែតាមផ្ទះ និងចែករំលែកការយល់ដឹងដល់ក្មួយៗសិស្សានុសិស្សអំពីអនាម័យ ដើម្បីលើកកម្ពស់សុខុមាលភាពសហគមន៍។

ដើមឈើប្រណីត ៥០ដើមត្រូវបានដាំក្នុងបរិវេណសាលា និងដើមឈើហូបផ្លែ ១៥០ដើមត្រូវបានប្រគល់ជូនដល់អាណាព្យាបាលសិស្ស។ នៅព្រឹត្តិការណ៍សហគមន៍នេះ ក៏មានសកម្មភាពបង្ហាញពីរបៀបលាងដៃឱ្យមានអនាម័យល្អដល់សិស្សានុសិស្សផងដែរ។

ក្រៅពីសកម្មភាពដាំដើមឈើ និងលើកកម្ពស់អនាម័យ គ្រឹះស្ថាន ខេមា និងអង្គការ Water.org បានសាងសង់លូស៊ីម៉ង់ត៍ស្តុកទឹកភ្លៀង តម្លើងទទឹក សាងសង់កន្លែងលាងដៃ និងប្រគល់សម្ភារមួយចំនួនបន្ថែមទៀតដូចជា៖ ចប ប៉ែល បង្គី រនាស់ ធុងស្រោចទឹក ធុងសម្រាមបរិស្ថាន និងសាប៊ូលាងដៃ ដើម្បីទុកប្រើប្រាស់ជាប្រយោជន៍ក្នុងសាលាផងដែរ។

កម្មវិធីនេះមានវត្តមានចូលរួមរបស់ លោកនាយកសាលា លោកគ្រូ អ្នកគ្រូ សិស្សានុសិស្ស អាជ្ញាធរ គណៈគ្រប់គ្រង និងបុគ្គលិកគ្រឹះស្ថាន ខេមា សរុបជាង ២៧០នាក់។ គួរបញ្ជាក់ផងដែរថា គ្រឹះស្ថាន ខេមា បានរៀបចំកម្មវិធីដាំដើមឈើនេះជាលើកទីបួនហើយ ដោយបានដាំដើមឈើសរុបចំនួន ២.០៥០ដើម៕