ការអភិវឌ្ឍវិស័យបរធនបាលកិច្ច ជួយពង្រឹងវិស័យឯកជន និងភាពធន់សេដ្ឋកិច្ច

ភ្នំពេញ៖ ការអភិវឌ្ឍវិស័យបរធនបាលកិច្ចអាចចូលរួមពង្រឹងវិស័យឯកជន តាមរយៈការបង្កើនទុនវិនិយោគក្នុងស្រុក និងការបង្កើតការងារ ព្រមទាំងជំរុញពិពិធកម្ម និងបរិយាបន្នហិរញ្ញវត្ថុ ខណៈវិស័យនេះក៏អាចចូលរួមប្រឆាំងការសម្អាតប្រាក់ និងពង្រឹងភាពធន់នៃសេដ្ឋកិច្ចផងដែរ។

ការលើកឡើងនេះធ្វើឡើងដោយ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ ក្នុងពិធីបើកវេទិកា “បរធនបាលកិច្ច ឆ្នាំ២០២៦” ដែលរៀបចំដោយនិយ័តករបរធនបាលកិច្ច (ន.ប.ធ.) នៅសណ្ឋាគារសុខា ភ្នំពេញ កាលពីថ្ងៃទី៤ ខែសីហា ឆ្នាំ២០២៦។

វេទិកានេះធ្វើឡើងក្រោមមូលបទ “បរធនបាលកិច្ចក្នុងជវភាពនៃប្រព័ន្ធតួអង្គតែមួយ និងសមិទ្ធផលក្នុងរយៈពេល ៥ ឆ្នាំ” ដោយមានការចូលរួមពីថ្នាក់ដឹកនាំ តំណាងក្រសួង-ស្ថាប័ន អ្នកជំនាញជាតិ និងអន្តរជាតិ ប្រតិបត្តិករ និងតួអង្គពាក់ព័ន្ធ ដើម្បីផ្លាស់ប្ដូរទស្សនៈ ចំណេះដឹង និងបទពិសោធន៍ ព្រមទាំងកំណត់ទិសដៅបន្តអភិវឌ្ឍវិស័យបរធនបាលកិច្ចនៅកម្ពុជា។

ក្នុងសុន្ទរកថាស្វាគមន៍ ឯកឧត្ដម សុខ ដារ៉ា អគ្គនាយកនៃ ន.ប.ធ. បានបង្ហាញថា គិតត្រឹមត្រីមាសទី២ ឆ្នាំ២០២៦ បរធនបាលកិច្ចដែលបានបង្កើត និងចុះបញ្ជីត្រឹមត្រូវតាមច្បាប់មានចំនួន ១,៩៩៧ ករណី ជាមួយទំហំបរធនសរុបប្រមាណ ២,៦៩១ លានដុល្លារអាមេរិក។

ក្នុងចំណោមនោះ មានបរធនបាលកិច្ចអចលនវត្ថុចំនួន ១,០២៩ ករណី និងបរធនបាលកិច្ចសេវារក្សាទុក ឬសេវារក្សាសុវត្ថិភាពចំនួន ៨៣៧ ករណី។

ន.ប.ធ. ក៏បានផ្ដល់អាជ្ញាបណ្ណ ឬការទទួលស្គាល់ដល់ក្រុមហ៊ុនបរធនបាលចំនួន ១៨ ធនាគារពាណិជ្ជចំនួន ៣០ ជាប្រតិបត្តិករបរធនបាលផ្ដល់សេវារក្សាសុវត្ថិភាព ឬសេវារក្សាទុក បរធនបាលរូបវន្តបុគ្គលចំនួន ៧៤ រូប ក្រុមហ៊ុនវាយតម្លៃចំនួន ១៩ និងក្រុមហ៊ុនផ្ដល់សេវាសវនកម្មចំនួន ១៥។

ក្នុងសុន្ទរកថាបើកកម្មវិធី ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន បានគូសបញ្ជាក់ថា ទោះបីកម្ពុជាបន្តប្រឈមនឹងភាពមិនប្រាកដប្រជានៃស្ថានភាពតំបន់ និងសកលក៏ដោយ សេដ្ឋកិច្ចកម្ពុជាសម្រេចបានកំណើន ៥,៣ ភាគរយក្នុងឆ្នាំ២០២៥។ សម្រាប់ឆ្នាំ២០២៦ កំណើនសេដ្ឋកិច្ចត្រូវបានវាយតម្លៃថាអាចសម្រេចបានប្រមាណ ៤,១ ភាគរយ ដោយសារផលប៉ះពាល់ពីស្ថានភាពសកល ការកើនថ្លៃប្រេងឥន្ធនៈ និងសម្ពាធអតិផរណា។

ក្នុងបរិការណ៍នេះ ឯកឧត្ដមអគ្គបណ្ឌិតសភាចារ្យ បានបញ្ជាក់ថា ការអភិវឌ្ឍវិស័យបរធនបាលកិច្ចអាចជួយពង្រឹងវិស័យឯកជន តាមរយៈការបង្កើនទុនវិនិយោគក្នុងស្រុក និងការបង្កើតការងារ ជំរុញពិពិធកម្ម និងបរិយាបន្នហិរញ្ញវត្ថុ ព្រមទាំងចូលរួមប្រឆាំងការសម្អាតប្រាក់ និងពង្រឹងភាពធន់នៃសេដ្ឋកិច្ច តាមរយៈការបង្កើនទំនុកចិត្តក្នុងទីផ្សារ និងការគ្រប់គ្រងហានិភ័យ។

ដើម្បីបន្តពង្រឹងវិស័យនេះ ឯកឧត្ដមអគ្គបណ្ឌិតសភាចារ្យ បានផ្ដល់អនុសាសន៍គន្លឹះចំនួន ៥ រួមមាន ការបន្តដាក់ចេញវិធានការជាក់ស្តែង និងផែនការសកម្មភាពលម្អិត ព្រមទាំងចូលរួមរៀបចំ តាមដាន និងវាយតម្លៃគោលនយោបាយពាក់ព័ន្ធ។

អនុសាសន៍ទី២ គឺបន្តវិនិយោគលើការពង្រឹងសមត្ថភាពមូលធនមនុស្សប្រកបដោយសមត្ថភាព សុចរិតភាព ក្រមសីលធម៌ និងវិជ្ជាជីវៈ។ ទី៣ គឺរក្សាស្តង់ដារអនុលោមភាព សុចរិតភាព អភិបាលកិច្ចសាជីវកម្ម តម្លាភាព គណនេយ្យភាព និងការប្រយុទ្ធប្រឆាំងការសម្អាតប្រាក់ និងហិរញ្ញប្បទានភេរវកម្ម ដើម្បីពង្រឹងទំនុកចិត្ត និងកិច្ចការពារវិនិយោគិន។

ទី៤ គឺបន្តធ្វើពិពិធកម្មផលិតផលបរធនបាលកិច្ចឱ្យលើសពីបរធនបាលកិច្ចអចលនទ្រព្យ និងបង្ហូរទុនទៅកាន់សហគ្រាសក្នុងស្រុក ជាពិសេសសហគ្រាសធុនតូច និងមធ្យម។ ទី៥ គឺបន្តជំរុញបរិវត្តកម្មឌីជីថល ដើម្បីលើកកម្ពស់អភិបាលកិច្ច អនុលោមភាព ប្រសិទ្ធភាព តម្លាភាព គណនេយ្យភាព និងទំនុកចិត្តរបស់វិនិយោគិន។

វេទិកានេះក៏បានបង្ហាញវីដេអូស្តីពីសមិទ្ធផលរយៈពេល ៥ ឆ្នាំក្នុងវិស័យបរធនបាលកិច្ច ពិធីប្រគល់ពានរង្វាន់ និងបណ្ណសរសើរដល់ប្រតិបត្តិករ បុគ្គលផ្ដល់សេវាពាក់ព័ន្ធ ដៃគូសហប្រតិបត្តិការ និងអង្គភាពសារព័ត៌មានឆ្នើមប្រចាំឆ្នាំ២០២៥។

ជាមួយគ្នានេះ កិច្ចពិភាក្សាចំនួន ៤ ត្រូវបានរៀបចំឡើង ដោយផ្តោតលើគម្រោងអភិវឌ្ឍខេត្តប៉ូលសេដ្ឋកិច្ច និងយន្តការបរធនបាលកិច្ចក្នុងការទាក់ទាញវិនិយោគ ការបង្កើតបរធនបាលកិច្ចគ្រួសារក្នុងបរិបទសង្គមកម្ពុជា ការគ្រប់គ្រងហានិភ័យ និងកិច្ចគាំពារវិនិយោគិន ព្រមទាំងការចាប់យក និងប្រើប្រាស់បច្ចេកវិទ្យាហិរញ្ញវត្ថុក្នុងវិស័យបរធនបាលកិច្ច។

ជារួម វេទិកា “បរធនបាលកិច្ច ឆ្នាំ២០២៦” បានបង្ហាញពីសមិទ្ធផល និងសក្តានុពលរបស់វិស័យបរធនបាលកិច្ច និងបង្កើតវេទិកាសម្រាប់រាជរដ្ឋាភិបាល និយ័តករ វិស័យឯកជន និងអ្នកជំនាញ រួមគ្នាផ្លាស់ប្ដូរទស្សនៈ និងផ្ដល់អនុសាសន៍ដែលអាចអនុវត្តបាន ដើម្បីជំរុញការអភិវឌ្ឍវិស័យនេះប្រកបដោយភាពធន់ ទំនុកចិត្ត និងចីរភាព៕

លោក អ៊ា សុវណ្ណារ៉ា | Mr. Ea Sovannara

ជីវប្រវត្តិ: លោកមានបទពិសោធន៍ជាង ១០ឆ្នាំក្នុងប្រព័ន្ធផ្សព្វផ្សាយផ្នែកសេដ្ឋកិច្ច អប់រំ សង្គម និងកម្សាន្ត។ បច្ចុប្បន្នលោកជាការីនិពន្ធនៃសារព័ត៌មាន AMS Economy។

ការ​អភិវឌ្ឍ​វិស័យ​បរធន​បាលកិច្ច ​ជួយ​ពង្រឹង​វិស័យ​ឯកជន ​និង​ភាព​ធន់​សេដ្ឋកិច្ច​

លោក អ៊ា សុវណ្ណារ៉ា | Mr. Ea Sovannara

ការអភិវឌ្ឍវិស័យបរធនបាលកិច្ច ជួយពង្រឹងវិស័យឯកជន និងភាពធន់សេដ្ឋកិច្ច