​ភ្នំ​ពេញ​៖​ ​ការ​សិក្សា​ស្រាវជ្រាវ​លើក​ដំបូង​នៅ​កម្ពុជា​ ​ស្តីពី​ ​«​សហគមន៍​កសិកម្ម​ទំនើប​» ​បាន​បង្ហាញ​ថា​ ​កសិករ​ដែល​ចូលរួម​ក្នុង​សហគមន៍​ប្រភេទ​នេះ​ទទួល​បាន​លទ្ធផល​សេដ្ឋកិច្ច​វិជ្ជមាន​ ​ជាមួយ​នឹង​ការ​កើនឡើង​នៃ​ប្រាក់​ចំណេញ​នៅក្នុង​ផលិតកម្ម​ស្រូវ​ ​បន្លែ ​ស្វាយចន្ទី​ ​និង​ម្រេច​ ​ប៉ុន្តែ​ ៩​១​,​៧ ​ភាគរយ​នៃ​សហគមន៍​ដែល​បាន​ចូលរួម​ក្នុង​ការ​សិក្សា​ ​នៅតែ​រាយការណ៍​ថា​មាន​ទុន​មិន​គ្រប់គ្រាន់​សម្រាប់​ប្រតិបត្តិការ​ ​និង​ការ​អភិវឌ្ឍ​នា​ពេល​អនាគត​។

​ការ​សិក្សា​នេះ​ត្រូវ​បាន​ធ្វើឡើង​ដោយ​អតីត​និស្សិត​អាហារូបករណ៍​អូស្ត្រាលី ​ក្រោម​ Australian Awards ​Research ​Grant ​Round ​5 ​ក្រោម​ប្រធានបទ ​«​ការ​សិក្សា​អំពី​ប្រភព​ថ្មី​នៃ​កំណើន​វិស័យ​កសិកម្ម​៖​ ការ​វាយតម្លៃ​តួនាទី​នៃ​ហិរញ្ញប្បទាន​ក្នុង​វិស័យ​កសិកម្ម​ទំនើប​» ​ដោយ​ផ្តោត​លើ​ស្ថានភាព​ហិរញ្ញប្បទានក្នុង​វិស័យ​កសិកម្ម ​ជា​ពិសេស​សហគមន៍​កសិកម្ម​ទំនើប​ ​(​Modern ​Agricultural ​Communities ​–​ MA​Cs​)​។

​ការ​ស្រាវជ្រាវ​នេះ​មាន​ការ​ចូលរួម​ពី​ក្រសួង​សំខាន់​ៗ​ចំនួន​ ២​ សហគ្រាស​រដ្ឋ​ចំនួន​ ១ ​គ្រឹះស្ថានធនាគារ ​និង​ហិរញ្ញវត្ថុ​ចំនួន​៧ ​ក្នុង​នោះ​មាន​ធនាគារ​គោលនយោបាយ​ចំនួន​ ២​ សហគមន៍​កសិកម្ម​ទំនើប​ចំនួន​ ​១២ ​និង​សហគមន៍​កសិកម្ម ​(​Agricultural ​Cooperative ​–​ A​C​)​ ​ចំនួន​ ៦​។​ ​ការ​សិក្សា​ក៏​មាន​សមាជិក​ចំនួន​ ៤៨ ​នាក់​មកពី​សហគមន៍​កសិកម្ម​ទំនើប​ទាំង ​១២ ​និង​សមាជិក​ចំនួន​ ​២៦ ​នាក់​មកពី​សហគមន៍​កសិកម្ម​ទាំង​ ៦ ​ដោយ​មាន​អត្រា​ចូលរួម​សរុប​ ៨​៥​ ​ភាគរយ​។

​លទ្ធផល​ស្រាវជ្រាវ​បាន​បង្ហាញ​ថា​ ​ការ​ប្រែប្រួល​ថ្លៃ​ដើម​ផលិតកម្ម ​និង​អត្រា​ប្រាក់​ចំណេញ​មាន​ភាព​ខុសគ្នា​តាម​ប្រភេទ​ផលិតផល​កសិកម្ម​ ​ប៉ុន្តែ​ជា​រួម​ ​កសិករ​ដែល​ចូលរួម​ក្នុង​សហគមន៍​កសិកម្ម​ទំនើប​បាន​រាយការណ៍​ពី​លទ្ធផល​វិជ្ជមាន​ខ្ពស់​។

​សម្រាប់​ផលិតកម្ម​ស្រូវ​ កសិករ​ដែល​ជា​សមាជិក​សហគមន៍​កសិកម្ម​ទំនើប​បាន​រាយការណ៍​ថា​ ​ថ្លៃ​ដើម​ផលិតកម្ម​ថយចុះ​ប្រមាណ ១​ ​ភាគរយ​ ​ខណៈ​ប្រាក់​ចំណេញ​កើនឡើង​ប្រមាណ​ ​២៥​ ​ភាគរយ បើ​ធៀប​នឹង​មុនពេល​ចូល​ជា​សមាជិក​។

​ចំពោះ​ផលិតកម្ម​បន្លែ​ ​ថ្លៃ​ដើម​ផលិតកម្ម​ថយចុះ​ប្រមាណ ៤៥​ ​ភាគរយ​ ​ខណៈ​ប្រាក់​ចំណេញ​កើនឡើង​ប្រមាណ ​១០​ ​ភាគរយ​។ ​សម្រាប់​ផលិតកម្ម​ស្វាយ​ចន្ទី​ ​ថ្លៃ​ដើម​ផលិតកម្ម​កើនឡើង​តិចតួច​ប្រមាណ​ ២ ​ភាគរយ​ ​ប៉ុន្តែ​អត្រា​ប្រាក់​ចំណេញ​កើនឡើង​ប្រមាណ ​១៥ ភាគរយ​។ ដោយឡែក ​ផលិត​កម្ម​ម្រេច​បង្ហាញ​ពី​ការ​ថយចុះ​ថ្លៃ​ដើម​ផលិតកម្ម​ប្រមាណ​ ១៧ ​ភាគរយ ​និង​ការ​កើនឡើង​អត្រា​ប្រាក់​ចំណេញ​ប្រមាណ ៥៤ ភាគរយ​។

​ផ្ទុយពី​នេះ​ ​លទ្ធផល​ក្នុង​ចំណោម​កសិករ​ដែល​ជា​សមាជិក​សហគមន៍​កសិកម្ម​ទូទៅ​បាន​បង្ហាញ​ពី​និន្នាការ​ខុសគ្នា​។ ​ក្នុង​ផលិតកម្ម​ស្រូវ​ ​ថ្លៃ​ដើម​ផលិតកម្ម​កើនឡើង​ប្រមាណ​ ​២០​ ​ភាគរយ​ ​ខណៈ​ប្រាក់​ចំណេញ​ថយចុះ​ប្រមាណ ​៣៣​ ​ភាគរយ​ ​បើ​ធៀប​នឹង​មុនពេល​ចូល​ជា​សមាជិក​។ ​សម្រាប់​ផលិតកម្ម​ស្វាយ​ចន្ទី ​ថ្លៃ​ដើម​កើនឡើង​ប្រមាណ​ ​១០​ ​ភាគរយ​ ​ខណៈ​អត្រា​ប្រាក់​ចំណេញ​កើនឡើង​ប្រមាណ​ ៨ ​ភាគរយ​។

ការ​សិក្សា​បាន​លើកឡើង​ថា​ ​លទ្ធផល​បឋម​នេះ​បង្ហាញ​ថា​ ​សហគមន៍​កសិកម្ម​ទំនើប​អាច​ជួយ​កែលម្អ​ប្រសិទ្ធភាព​សេដ្ឋកិច្ច​នៃ​ផលិតកម្ម​កសិកម្ម​ ​តាមរយៈ​ការ​រៀបចំ​ផលិតកម្ម​រួមគ្នា​ ​ការ​គ្រប់គ្រង​ធាតុ​ចូល​កសិកម្ម​ ​ការ​សម្របសម្រួល​ទីផ្សារ ​និង​ការ​ប្រើប្រាស់​បច្ចេកទេស​ដាំដុះ​កាន់តែ​ប្រសើរ​។

​ទោះជា​យ៉ាងណា ​ការ​សិក្សា​បញ្ជាក់​ថា​ ​ដោយសារ​ទំហំ​សំណាក ​និង​វិសាលភាព​នៃ​ការ​សិក្សា​នៅ​មាន​កម្រិត​ ​លទ្ធផល​ទាំងនេះ​គួរ​ត្រូវ​បាន​បកស្រាយ​ជា​ភស្តុតាង​បឋម ​ដែល​ឆ្លុះបញ្ចាំង​ពី​បទ​ពិសោធន៍​របស់​អ្នក​ចូលរួម​ក្នុង​ការ​សិក្សា​ ​ហើយ​មិន​អាច​សន្និដ្ឋាន​ទាំងស្រុង​ថា​ ​ការ​ចូល​ជា​សមាជិក​សហគមន៍​កសិកម្ម​ទំនើប​តែ​មួយ​មុខ​ជា​មូលហេតុ​នាំឱ្យ​មាន​ការ​ប្រែប្រួល​ទាំងនេះ​ឡើយ​។

​ជាមួយគ្នា​នេះ​ ​ហិរញ្ញប្បទាន​នៅតែ​ជា​បញ្ហា​ប្រឈម​សំខាន់​សម្រាប់​សហគមន៍​កសិកម្ម​ទំនើប​។ ​ក្នុង​ចំណោម​សហគមន៍​ដែល​បាន​ចូលរួម​ក្នុង​ការ​សិក្សា​ ៩១​,​៧ ​ភាគរយ​បាន​រាយការណ៍​ថា​ ទុន​របស់​ពួក​គេ​មិន​គ្រប់គ្រាន់​សម្រាប់​គាំទ្រ​ប្រតិបត្តិការ​ ​និង​ការ​អភិវឌ្ឍ​នា​ពេល​អនាគត​។

​នេះ​កើតឡើង​ ​ទោះបីជា​ ៧៥​ ​ភាគរយ​នៃ​សហគមន៍​កសិកម្ម​ទំនើប​ដែល​បាន​ចូលរួម​បាន​រាយការណ៍​ថា​ ​ពួក​គេ​អាច​ទទួល​បាន​ឥណទាន​ពី​គ្រឹះស្ថាន​ធនាគារ ​និង​ហិរញ្ញវត្ថុ​ក៏​ដោយ​។

​ការ​សិក្សា​បាន​ចាត់ទុក​ភាព​ផ្ទុយ​គ្នា​នេះ​ថា​ ​ជា​ចំណុច​សំខាន់​មួយ ព្រោះ​ការ​អាច​ទទួល​បាន​ឥណទាន​មិន​មាន​ន័យ​ថា​ ​សហគមន៍​កសិកម្ម​ទំនើប​អាច​ទទួល​បាន​ហិរញ្ញប្បទាន​ក្នុង​ទំហំ​គ្រប់គ្រាន់ ​ឬ​មាន​លក្ខខណ្ឌ​សមស្រប​ទៅ​នឹង​តម្រូវការ​របស់​ពួកគេ​នោះ​ទេ​។

សហគមន៍​កសិកម្ម​ទំនើប​បាន​លើកឡើង​ពី​ឧបសគ្គ​មួយចំនួន​ក្នុង​ការ​ទទួល​បាន​ហិរញ្ញប្បទាន ​រួម​មាន​ដំណើរការ​អនុម័ត​ឥណទាន​ដែល​ចំណាយ​ពេល​យូរ ​លក្ខខណ្ឌ​តម្រូវ​លើ​ទ្រព្យធានា ​និង​អត្រា​ការប្រាក់​ខ្ពស់​។

​ចំពោះ​វិធានការ​ដែល​អាច​ជួយ​សម្រួល​ដល់​ការ​ទទួល​បាន​ហិរញ្ញប្បទាន​ ប្រមាណ ​៦៧ ​ភាគរយ​នៃ​សហគមន៍​កសិកម្ម​ទំនើប​ដែល​បាន​ចូលរួម​បាន​ស្នើ​ឱ្យ​កាត់បន្ថយ​អត្រា​ការប្រាក់​មក​ត្រឹម​ ​៣​ ​ទៅ​ ៤ ​ភាគរយ​។

​ប្រមាណ ​១៧​ ​ភាគរយ​បាន​ស្នើ​ឱ្យ​សម្រួល​នីតិវិធី​ដាក់​ពាក្យ​ស្នើសុំ​ឥណទាន​ឱ្យ​មាន​ភាព​សាមញ្ញ ​និង​ងាយស្រួល​ជាង​មុន​ ​ខណៈ​ ៨​ ​ភាគរយ​ស្នើ​ឱ្យ​មាន​ការ​ឧបត្ថម្ភ​ធន​ផ្នែក​ហិរញ្ញវត្ថុ​ ​និង​ ៨ ​ភាគរយ​ផ្សេងទៀត​ស្នើ​ឱ្យ​មាន​រយៈពេល​អនុគ្រោះ​លើ​ការ​បង់​ការប្រាក់​វែង​ជាង​មុន​។

​លទ្ធផល​ទាំងនេះ​បង្ហាញ​ថា​ ​បញ្ហា​ហិរញ្ញប្បទាន​របស់​សហគមន៍​កសិកម្ម​ទំនើប​មិន​មែន​ស្ថិត​ត្រឹមតែ​ការ​អាច​ទទួល​បាន​ឥណទាន​ឬ​អត់​នោះ​ទេ​ ​ប៉ុន្តែ​រួម​មាន​ថ្លៃ​ដើម​ហិរញ្ញប្បទាន​ខ្ពស់​ ភាព​ស្មុគស្មាញ​ក្នុង​ការ​ទទួល​បាន​ឥណទាន​ ការ​រង់ចាំ​យូរ​ ​និង​ភាព​មិន​សមស្រប​នៃ​ផលិតផល​ហិរញ្ញវត្ថុ​ចំពោះ​តម្រូវការ​របស់​វិស័យ​កសិកម្ម​៕