ឥណ្ឌូណេស៊ីជាប្រទេសដំបូងគេលើពិភពលោក ប្រើប្រាស់ម៉ាស៊ូតផ្ទុកកម្រិតល្បាយឥន្ធនៈពីដូងប្រេងដល់ ៥០ ភាគរយ

បរទេស៖ ឥណ្ឌូណេស៊ីក្លាយជាប្រទេសដំបូងគេបង្អស់នៅលើពិភពលោក ប្រើប្រាស់ប្រេងឥន្ធនៈម៉ាស៊ូតដែលមានផ្ទុកកម្រិតល្បាយជីវឥន្ធនៈខ្ពស់ពីដូងប្រេង (ប្រេងដូងឆៅ) រហូតទៅដល់ ៥០ ភាគរយ។ នេះបើយោងតាមការរាយការណ៍ពីរ៉យទ័រ។

កាលពីសប្តាហ៍មុន ប្រធានាធិបតីឥណ្ឌូណេស៊ី លោក Prabowo Subianto បានចូលរួមក្នុងពិធីដាក់ដំណើរការជាផ្លូវការនូវកម្មវិធីប្រេងម៉ាស៊ូតជីវៈ B50 នៅក្នុងខេត្តជ្វាខាងលិច។

ប្រធានាធិបតីរូបនេះ រំពឹងថា តាមរយៈកម្មវិធីប្រេងម៉ាស៊ូតជីវៈនេះ ឥណ្ឌូណេស៊ីអាចនឹងកាត់បន្ថយការភាយចេញនូវឧស្ម័នកាបូនឌីអុកស៊ីដ (CO2) បានប្រមាណ ៤៤ លានតោនក្នុងមួយឆ្នាំ និងក្លាយជាជំហានដ៏សំខាន់មួយក្នុងការកាត់បន្ថយការពឹងផ្អែកលើការនាំចូលប្រេងម៉ាស៊ូតពីបរទេស។

រដ្ឋមន្ត្រីក្រសួងថាមពលឥណ្ឌូនេស៊ី លោក Bahlil Lahadalia បញ្ជាក់ដែរថា ឥណ្ឌូណេស៊ីដាក់បទបញ្ជាដំឡើងកម្រិតល្បាយជីវឥន្ធនៈដែលផលិតចេញពីប្រេងដូងពី ៤០ ភាគរយទៅ ៥០ ភាគរយ ដើម្បីជំរុញការប្រើប្រាស់ប្រេងដូងឆៅកើនឡើងចន្លោះពី ១៦,៣ លានតោនទៅ ១៧ លានតោន។

លោកប្រធានាធិបតី Prabowo ថ្លែងថា ឥណ្ឌូនេស៊ីកំពុងនាំមុខគេក្នុងកិច្ចខិតខំប្រឹងប្រែងជាសកល ដើម្បីកាត់បន្ថយការបំភាយឧស្ម័នកាបូន។ លោកក៏ធ្លាប់ជំរុញឱ្យមានការអនុវត្តបទបញ្ជា B100 (ម៉ាស៊ូតជីវៈផ្ទុកប្រេងដូង ១០០%) ប៉ុន្តែបណ្តារដ្ឋមន្ត្រីផ្តល់យោបល់ថា កម្រិតល្បាយប្រេងដូង ៥០ ភាគរយគឺគ្រប់គ្រាន់ក្នុងការលុបបំបាត់ការនាំចូលពីបរទេសហើយ។

យ៉ាងណាមិញ លោកបន្តជំរុញឱ្យអាជ្ញាធរឆ្ពោះទៅរកការលាយក្នុងកម្រិត ៦០ ភាគរយ។ ទន្ទឹមនឹងនេះ រដ្ឋាភិបាលឥណ្ឌូណេស៊ីចាប់ផ្ដើមការស្រាវជ្រាវលើការលាយល្បាយក្នុងកម្រិត ៦០ ភាគរយហើយ។

ទិន្នន័យពីក្រសួងថាមពលរបស់ឥណ្ឌូណេស៊ី បង្ហាញថា ការដំឡើងកម្រិតល្បាយ ៥០ ភាគរយត្រូវបានរំពឹងថានឹងជួយកាត់បន្ថយចំណាយលើការនាំចូល ១៧០ ទ្រីលានរូពៀ (ប្រហែល ៩,៤១ ពាន់លានដុល្លារ) ក្នុងឆ្នាំ ២០២៦ បើប្រៀបធៀបទៅនឹងការសន្សំសំចៃប្រមាណ ១៣៣ ទ្រីលានរូពៀ ប្រហែល (៧,៣៥ ពាន់លានដុល្លារ) ក្នុងឆ្នាំ ២០២៥។

បន្ទាប់ពីឥណ្ឌូណេស៊ីចាប់ផ្តើមកម្មវិធីជីវឥន្ធនៈ B50 របស់ខ្លួនកាលពីសប្តាហ៍មុន ភាគីពាក់ព័ន្ធក្នុងឧស្សាហកម្មនេះកំពុងរង់ចាំការបែងចែកកូតាជីវឥន្ធនៈថ្មីពីរដ្ឋាភិបាល និងត្រូវប្រើប្រាស់ស្តុកប្រេង B40 ដែលនៅសេសសល់ឱ្យអស់សិន។

បច្ចុប្បន្ននេះ ឥណ្ឌូណេស៊ីបានប្រើប្រាស់ជីវឥន្ធនៈប្រភេទ B40 (លាយប្រេងដូងឆៅ ៤០ ភាគរយ) ចំនួន ១៥,៦៤ លានគីឡូលីត្រ ដែលកើនឡើង ៤,៦៨ ភាគរយ ឬ ១៤,៩៤ លានគីឡូឡីត្រពីឆ្នាំ ២០២៥៕

កញ្ញា យឿន ពុធធីតា | Ms. Yoeun Puththyda

អ្នកសារព័ត៌មានអន្តរជាតិ