កែបប្រមូលផលក្តាមសេះជិត ៤០០ តោនក្នុងឆមាសទី១ ខណៈខេត្តត្រៀមចុះបញ្ជីម៉ាកសម្គាល់ភូមិសាស្ត្រ

ខេត្តកែបប្រមូលផលក្តាមសេះបានចំនួន ៣៩៥ តោន ក្នុងឆមាសទី ១ ឆ្នាំនេះ ដើម្បីផ្គត់ផ្គង់ទីផ្សារ ខណៈរដ្ឋបាលខេត្តសហការជាមួយក្រសួងពាណិជ្ជកម្ម គ្រោងរៀបចំចុះបញ្ជី «ក្តាមសេះកែប» ជាម៉ាកសម្គាល់ភូមិសាស្ត្រទំនិញ (GI) សំដៅលើកកម្ពស់តម្លៃផលិតផល និងបង្កើនចំណូលដល់ប្រជាពលរដ្ឋ។

លោក ថឹង បូរិន ប្រធានមន្ទីរកសិកម្ម ខេត្តកែប បានប្រាប់បណ្តាញព័ត៌មាន AMS ថា ជាមធ្យម ខេត្តជាប់សមុទ្រមួយនេះអាចប្រមូលផលក្តាមសេះបានពី ៦០០ ទៅ ៧០០ តោនក្នុងមួយឆ្នាំ។

លោកបញ្ជាក់ថា ការនេសាទក្តាមសេះនៅខេត្តកែប ភាគច្រើនធ្វើឡើងតាមរយៈការប្រើប្រាស់លប និងមង។ ចំពោះតម្លៃនៅលើទីផ្សារ ក្តាមសេះលេខ១ មានតម្លៃចាប់ពី ៥៥,០០០ ទៅ ៨០,០០០ រៀលក្នុងមួយគីឡូក្រាម អាស្រ័យលើគុណភាព និងតម្រូវការទីផ្សារ ខណៈក្តាមសេះលេខ២ មានតម្លៃចាប់ពី ៣០,០០០រៀលក្នុងមួយគីឡូក្រាមឡើងទៅ។

រដ្ឋបាលខេត្តកែប បានសហការជាមួយក្រសួងពាណិជ្ជកម្ម គ្រោងរៀបចំចុះបញ្ជី «ក្តាមសេះកែប» ជាម៉ាកសម្គាល់ភូមិសាស្ត្រទំនិញជាផ្លូវការ ដើម្បីលើកកម្ពស់តម្លៃទីផ្សារ និងទាក់ទាញភ្ញៀវទេសចរ។

លោក ថឹង បូរិន យល់ឃើញថា គម្រោងចុះបញ្ជីម៉ាកសញ្ញា «ក្តាមសេះខេត្តកែប» នឹងបង្កើនតម្លៃបន្ថែមដល់ផលិតផលក្នុងស្រុក ជួយឱ្យប្រជាពលរដ្ឋ និងអាជីវករទទួលបានតម្លៃល្អ និងមានស្ថិរភាព។

លើសពីនេះ វាក៏ជាការផ្តល់តម្លៃដល់កិច្ចខិតខំប្រឹងប្រែងរបស់មន្ត្រី និងសហគមន៍នេសាទ ក្នុងការអភិរក្សធនធានធម្មជាតិ ព្រមទាំងលើកកម្ពស់កិត្យានុភាពភូមិសាស្ត្រផលិតកម្មរបស់ខេត្តផងដែរ។ ទោះជាយ៉ាងណា គម្រោងចុះបញ្ជីនេះ មិនទាន់កំណត់ពេលវេលាច្បាស់លាស់នៅឡើយ។

ឯកឧត្តម កឹម សុខុន រដ្ឋលេខាធិការក្រសួងពាណិជ្ជកម្ម បានលើកឡើងកាលពីថ្ងៃចន្ទ ដើមសប្តាហ៍នេះថា ការបង្កើតម៉ាកសម្គាល់ភូមិសាស្ត្រទំនិញ និងម៉ាកសមូហភាព បានផ្តល់ផលវិជ្ជមានយ៉ាងច្រើនដល់សេដ្ឋកិច្ច។

ទោះជាយ៉ាងណា លោកបានសង្កត់ធ្ងន់ថា ដើម្បីធានាបាននូវជោគជ័យយូរអង្វែង ចាំបាច់ត្រូវមានការគ្រប់គ្រង និងត្រួតពិនិត្យឱ្យបានម៉ត់ចត់លើគុណភាព និងស្តង់ដារផលិតផល ឱ្យស្របតាមសៀវភៅបន្ទុក និងលក្ខន្តិកៈដែលបានកំណត់៕

អត្ថបទ៖ ទួន សុផល

លោក ស៊ុំ ម៉ាណេត | Mr. Sum Manet

ជីវប្រវត្តិ: លោកមានបទពិសោធន៍ជាង ១០ ឆ្នាំក្នុងប្រព័ន្ធផ្សព្វផ្សាយ និងកាសែតផ្នែកសេដ្ឋកិច្ច ហិរញ្ញវត្ថុ និងអចលនទ្រព្យ។ បច្ចុប្បន្ន លោកជាការីនិពន្ធនៃព័ត៌មានសេដ្ឋកិច្ច AMS Economy។