ទុនវិនិយោគជិត ១៧០ លានដុល្លារ ហូរចូលខេត្តតាកែវ ក្នុងរយៈពេល ៧ ខែ

តាកែវ៖ ខេត្តតាកែវទទួលបានគម្រោងវិនិយោគសរុបចំនួន ២៨ ក្នុងរយៈពេល ៧ ខែដំបូងឆ្នាំ២០២៦នេះ ដោយមានទុនវិនិយោគសរុបជិត ១៧០ លានដុល្លារអាម៉េរិក និងបង្កើតតម្រូវការកម្លាំងពលកម្មចំនួន ១២,៣៣៧ កន្លែង។

លោក ប៊ុន សម្បត្តិ នាយកទីចាត់ការអន្តរវិស័យ នៃរដ្ឋបាលខេត្តតាកែវ បានថ្លែងប្រាប់ថា ក្នុងចំណោមគម្រោងវិនិយោគទាំង ២៨ មានគម្រោងចំនួន ១១ ក្រុមហ៊ុន ចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC) និង ១៧ ក្រុមហ៊ុន ចុះបញ្ជីនៅអនុគណៈកម្មាធិការវិនិយោគខេត្តតាកែវ (PMIC)។

លោកបានបញ្ជាក់ថា ទុនវិនិយោគសរុបនៃគម្រោងទាំងអស់មានចំនួន ១៦៨.៨២៦.៣៧០,៣១ ដុល្លារអាម៉េរិក ដែលស្តែងឱ្យឃើញពីការកើនឡើងនៃទំនុកចិត្តរបស់វិនិយោគិនជាតិ និងអន្តរជាតិ លើសក្ដានុពលសេដ្ឋកិច្ច ទីតាំងភូមិសាស្ត្រ និងការអភិវឌ្ឍហេដ្ឋារចនាសម្ព័ន្ធក្នុងខេត្តតាកែវ។

តាមរយៈការហូរចូលនៃគម្រោងវិនិយោគទាំងនេះ ខេត្តតាកែវបានបង្កើតតម្រូវការប្រើប្រាស់ពលកម្មសរុបចំនួន ១២,៣៣៧ កន្លែង។ ការបង្កើតឱកាសការងារនៅក្នុងមូលដ្ឋាននេះ ក៏ត្រូវបានចាត់ទុកថា ជាកត្តាសំខាន់ក្នុងការកាត់បន្ថយការចំណាកស្រុក បង្កើនប្រាក់ចំណូលគ្រួសារ និងលើកកម្ពស់កម្រិតជីវភាពរបស់ប្រជាពលរដ្ឋក្នុងខេត្ត។

គម្រោងវិនិយោគទាំងនេះ ផ្តោតលើមុខសញ្ញាឧស្សាហកម្ម និងការកែច្នៃចម្រុះ រួមមានការផលិត និងកាត់ដេរសម្លៀកបំពាក់ កាបូប វ៉ាលីស ស្រោមដៃ និងស្រោមជើង ការដំឡើងគ្រឿងបង្គុំអេឡិចត្រូនិក បរិក្ខារអគ្គិសនីបំភ្លឺ ការផលិតបរិក្ខារប្រើប្រាស់ក្នុងផ្ទះបាយ និងគ្រឿងតុបតែងលម្អជាដើម។

ការហូរចូលនៃគម្រោងវិនិយោគទាំងនេះ បានបង្ហាញពីការកើនឡើងនៃទំនុកចិត្តរបស់អ្នកវិនិយោគទាំងក្នុង និងក្រៅប្រទេសមកលើសក្ដានុពលសេដ្ឋកិច្ច លក្ខខណ្ឌអំណោយផល និងការសម្រួលនីតិវិធីផ្សេងៗពីអាជ្ញាធរខេត្តតាកែវ។

កត្តាសន្តិសុខ ហេដ្ឋារចនាសម្ព័ន្ធតភ្ជាប់ និងកម្លាំងពលកម្មនៅក្នុងខេត្ត ក៏បានក្លាយជាចំណុចទាក់ទាញសំខាន់សម្រាប់រោងចក្រ សហគ្រាស និងអាជីវកម្មថ្មីៗ មកបោះទុនវិនិយោគជាបន្តបន្ទាប់។

ឯកឧត្តម វ៉ី សំណាង អភិបាលខេត្តតាកែវ ធ្លាប់បានលើកឡើងថា ការទាក់ទាញបាននូវរោងចក្រ និងសហគ្រាសពីក្រៅប្រទេសមកបណ្តាក់ទុនវិនិយោគនៅក្នុងខេត្តតាកែវ គឺដោយសារខេត្តមានសក្ដានុពលជាច្រើន រួមមានកម្លាំងពលកម្មវ័យក្មេង ទីតាំងភូមិសាស្ត្រ និងផ្លូវគមនាគមន៍ដែលមានសក្ដានុពល។

លោកបានបន្តថា ខេត្តតាកែវមានការតភ្ជាប់ជាមួយផ្លូវជាតិធំៗ ដូចជា ផ្លូវជាតិលេខ៣ និងផ្លូវជាតិលេខ២ ព្រមទាំងមានផ្លូវដែកពីភ្នំពេញទៅកាន់ខេត្តព្រះសីហនុ និងមានទីតាំងនៅជិតព្រលានយន្តហោះអន្តរជាតិតេជោ។ នៅថ្ងៃខាងមុខ ខេត្តក៏នឹងមានការតភ្ជាប់ជាមួយព្រែកជីកហ្វូណន ដែលនឹងផ្តល់ភាពងាយស្រួលបន្ថែមដល់ការដឹកជញ្ជូន និងការធ្វើធុរកិច្ច។

ជាមួយនឹងទុនវិនិយោគជិត ១៧០ លានដុល្លារ និងការបង្កើតការងារជាង ១២,០០០ កន្លែង ក្នុងរយៈពេលត្រឹមតែ ៧ ខែដំបូងឆ្នាំនេះ ការវិនិយោគនៅខេត្តតាកែវបានរួមចំណែកដល់ការជំរុញសកម្មភាពសេដ្ឋកិច្ចក្នុងមូលដ្ឋាន បង្កើនប្រាក់ចំណូលគ្រួសារ និងបង្កើតឱកាសការងារសម្រាប់ប្រជាពលរដ្ឋក្នុងខេត្ត៕

លោក ញ៉ែម សុផល | Mr. NHEM SOPHAL

ជីវប្រវត្តិ: លោក ញ៉ែម សុផល ចាប់ផ្តើមអាជីពសារព័ត៌មាននៅឆ្នាំ១៩៩៣និងធ្លាប់មានបទពិសោធន៍ជិត៣០ឆ្នាំក្នុងវិស័យសារព័ត៌មាន ផ្នែកសេដ្ឋកិច្ច ពាណិជ្ជកម្ម អប់រំ វប្បធម៌ សង្គម និង បកប្រែភាសាអង់គ្លេស ។ ធ្លាប់បម្រើការក្នុងស្ថាប័នសារព័ត៌មានធំៗជាច្រើន ដូចជា ស្ថានីយទូរទស្សន៍ កាសែត ទស្សនាវដ្តី និងគេហទំព័រ ដោយទទួលបានការបណ្តុះបណ្តាលវិជ្ជាជីវៈទាំងនៅក្នុងស្រុកនិងក្រៅប្រទេស។ លោកបានបញ្ចប់ការសិក្សាថ្នាក់បរិញ្ញាបត្រជំនាញភាសាអង់គ្លេស។បច្ចុប្បន្នជាអ្នកយកព័ត៌មានជាន់ខ្ពស់ផ្នែកសេដ្ឋកិច្ចនិងផ្សព្វផ្សាយនៅ AMS Economy ៕

ទុន​វិនិយោគ​ជិត​ ​១៧០​ ​លាន​ដុល្លារ​ ហូរ​ចូល​ខេត្ត​តាកែវ​ ក្នុង​រយៈពេល​ ​៧​ ​ខែ

លោក ញ៉ែម សុផល | Mr. NHEM SOPHAL

ទុនវិនិយោគជិត ១៧០ លានដុល្លារ ហូរចូលខេត្តតាកែវ ក្នុងរយៈពេល ៧ ខែ