ភូមិភាគឦសានកម្ពុជាទាក់ទាញគម្រោងវិនិយោគ ៧២ ក្នុងទុន ២.៦៥ ពាន់លានដុល្លារ

ភ្នំពេញ៖ គិតចាប់តាំងពីការដាក់ឱ្យអនុវត្តកម្មវិធីពិសេសជំរុញការវិនិយោគក្នុងភូមិភាគឦសាន រហូតមកដល់បច្ចុប្បន្ន មានគម្រោងចំនួន ៧២ ក្នុងទំហំទុនវិនិយោគសរុប ២.៦៥ ពាន់លានដុល្លារ បានដាក់ស្នើសុំវិនិយោគនៅក្នុងខេត្តទាំង៤ នៃភូមិភាគឦសាន ខណៈក្រុមការងារបានពិនិត្យ និងអនុម័តការលើកទឹកចិត្តជូនជាបន្តបន្ទាប់។

បើតាមក្រុមការងារជំរុញការវិនិយោគក្នុងខេត្តទាំង៤ នៅភូមិភាគឦសាន កម្មវិធីពិសេសជំរុញការវិនិយោគនេះ ត្រូវបានប្រកាសដាក់ឱ្យអនុវត្តជាផ្លូវការនៅថ្ងៃទី៩ ខែមេសា ឆ្នាំ២០២៥ ដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងប្រែក្លាយភូមិភាគឦសានជាប៉ូលសេដ្ឋកិច្ចថ្មីដែលមានសក្ដានុពល។

កម្មវិធីនេះផ្តោតលើវិស័យអាទិភាពចំនួន៣ គឺកសិកម្ម កសិ-ឧស្សាហកម្ម និងទេសចរណ៍ ដោយផ្តល់ការគាំទ្រពិសេសតាមរយៈការលើកទឹកចិត្តផ្នែកពន្ធ និងអាករ ការផ្តល់ហិរញ្ញប្បទានក្នុងអត្រាការប្រាក់សមរម្យ និងការកាត់បន្ថយថ្លៃដើមផលិតកម្ម។

ជាមួយគ្នានេះ ក្រុមការងារជំរុញការវិនិយោគក្នុងខេត្តទាំង៤ និងក្រសួង-ស្ថាប័នពាក់ព័ន្ធ ក៏មានតួនាទីសម្របសម្រួលពិសេស ដើម្បីជួយសម្រួលដល់វិនិយោគិន និងធុរជនដែលមានបំណងចូលមកបណ្ដាក់ទុនក្នុងតំបន់។

កាលពីថ្ងៃទី១០ ខែសីហា ឆ្នាំ២០២៦ ក្រុមការងារជំរុញការវិនិយោគក្នុងភូមិភាគឦសាន បានពិភាក្សាត្រង់ទៅត្រង់មកជាមួយធុរជនក្នុងខេត្តមណ្ឌលគិរី ដើម្បីជំរុញការអនុវត្តកម្មវិធីជំរុញការវិនិយោគក្នុងភូមិភាគឦសាន ឆ្នាំ២០២៥-២០២៨ និងលើកស្ទួយសហគ្រាសធុនតូច និងមធ្យម។

នៅក្នុងកិច្ចពិភាក្សានោះ ឯកឧត្តម ហ៊ាន សាហ៊ីប ប្រធានក្រុមការងារជំរុញការវិនិយោគក្នុងភូមិភាគឦសាន បានមានប្រសាសន៍ថា សម្រាប់សកម្មភាពធុរកិច្ចដែលកំពុងដំណើរការនៅក្នុងខេត្តទាំង៤ ប៉ុន្តែមិនទាន់បានចុះបញ្ជីពន្ធដារ អាចចុះបញ្ជីពន្ធដារដោយស្ម័គ្រចិត្តរហូតដល់ដំណាច់ឆ្នាំ២០២៦។

តាមការបញ្ជាក់នេះ អាជីវកម្មដែលចុះបញ្ជីក្នុងអំឡុងពេលកំណត់ នឹងទទួលបានការលើកលែងពិន័យទោសទណ្ឌ បំណុលពន្ធ និងការផាកពិន័យជាប្រាក់ ចំពោះការមិនបានបំពេញអនុលោមភាពកន្លងមក។

វិធានការនេះត្រូវបានដាក់ចេញក្នុងគោលបំណងសម្រួលដល់សកម្មភាពអាជីវកម្មដែលកំពុងដំណើរការនៅក្នុងតំបន់ និងជំរុញឱ្យធុរជនចូលមកក្នុងប្រព័ន្ធផ្លូវការ។

លោក ឌុក ពិសិដ្ឋ ប្រធានសមាគមកាហ្វេកម្ពុជា និងជាម្ចាស់រីសត PIDA Coffee Farm Lodge បានមានប្រសាសន៍ថា កម្មវិធីជំរុញការវិនិយោគក្នុងភូមិភាគឦសាន បាននិងកំពុងផ្តល់អត្ថប្រយោជន៍យ៉ាងច្រើនដល់វិនិយោគិន និងធុរជននៅក្នុងតំបន់។

លោកបានលើកឡើងថា ក្នុងនាមជាអ្នកវិនិយោគលើដំណាំកាហ្វេ និងជាអ្នកកែច្នៃកាហ្វេនៅក្នុងខេត្តមណ្ឌលគិរី លោកបានទទួលការលើកលែងពន្ធពីរាជរដ្ឋាភិបាលរហូតដល់ ១២ឆ្នាំ។

ការលើកលែងនេះរួមមាន ពន្ធលើប្រាក់ចំណេញ ពន្ធលើប្រាក់ខែបុគ្គលិក និងពន្ធលើការនាំចូលគ្រឿងម៉ាស៊ីនផ្សេងៗ ដើម្បីយកមកដំណើរការនៅក្នុងសិប្បកម្មកែច្នៃកាហ្វេ។

លោក ឌុក ពិសិដ្ឋ ក៏បានអំពាវនាវ និងលើកទឹកចិត្តដល់វិនិយោគិនក្នុង និងក្រៅប្រទេស ដែលមានបំណងចូលមកបណ្ដាក់ទុននៅភូមិភាគឦសាន ឱ្យរួសរាន់ចុះបញ្ជីក្រុមហ៊ុន និងចាប់ផ្តើមដំណើរការវិនិយោគ និងអាជីវកម្ម ក្នុងអំឡុងពេលដែលរាជរដ្ឋាភិបាលកំពុងផ្តល់ការលើកទឹកចិត្តពិសេស។

ភូមិភាគឦសាន ដែលរួមមានខេត្តមណ្ឌលគិរី រតនគិរី ក្រចេះ និងស្ទឹងត្រែង ត្រូវបានកំណត់ជាតំបន់គោលដៅសម្រាប់ការជំរុញការវិនិយោគ តាមរយៈការផ្តោតលើកសិកម្ម កសិ-ឧស្សាហកម្ម និងទេសចរណ៍ ដើម្បីជំរុញសកម្មភាពសេដ្ឋកិច្ច និងទាក់ទាញការវិនិយោគក្នុងតំបន់៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។

ភូមិភាគ​ឦសាន​កម្ពុជា​ទាក់ទាញ​គម្រោង​វិនិយោគ​ ​៧២​ ​ក្នុង​ទុន​ ​២.៦៥​ ​ពាន់​លាន​ដុល្លារ​

លោក អ៊ិច ណែត | Mr. Ich Neth

ភូមិភាគឦសានកម្ពុជាទាក់ទាញគម្រោងវិនិយោគ ៧២ ក្នុងទុន ២.៦៥ ពាន់លានដុល្លារ