ភ្ជុំបិណ្ឌជាឱកាសបង្កើនចំណូលសម្រាប់អ្នកលក់គុយទាវនិងអ្នករត់កង់បី តែត្រូវលះបង់ពេលជួបជុំគ្រួសារ

ភ្នំពេញ៖ ក្នុងពេលប្រជាពលរដ្ឋជាច្រើនឆ្លៀតសម្រាកពីការងារ ដើម្បីជួបជុំគ្រួសារ ធ្វើបុណ្យ និងដើរកម្សាន្តក្នុងឱកាសបុណ្យកាន់បិណ្ឌ-ភ្ជុំបិណ្ឌ អ្នកប្រកបរបរសេដ្ឋកិច្ចក្រៅប្រព័ន្ធក្នុងវិស័យលក់ដូរ និងដឹកជញ្ជូនមួយចំនួន បែរជាបង្កើនសកម្មភាពការងាររបស់ខ្លួន ដើម្បីឆ្លៀតយកឱកាសរកប្រាក់ចំណូលបន្ថែមពីតម្រូវការសេវាកម្មដែលកើនឡើង ជាពិសេសនៅថ្ងៃភ្ជុំធំឆ្នាំ២០២៦ ដែលចំថ្ងៃចុងសប្តាហ៍។

ការកើនឡើងនៃចំនួនប្រជាពលរដ្ឋធ្វើដំណើរទៅស្រុកកំណើត និងតំបន់ទេសចរណ៍នានា បានធ្វើឱ្យអាជីវករលក់ម្ហូបអាហារ និងអ្នកផ្តល់សេវាដឹកជញ្ជូនមមាញឹកជាងថ្ងៃធម្មតា។ អ្នកលក់ដូរខ្លះបានត្រៀមម្ហូបអាហារ ភេសជ្ជៈ និងកន្លែងអង្គុយបន្ថែមសម្រាប់ទទួលភ្ញៀវ ខណៈអ្នករត់តាក់ស៊ី កង់បី និងម៉ូតូឌុបក៏បង្កើនជើងដឹកជញ្ជូន ដើម្បីទទួលបានប្រាក់ចំណូលច្រើនជាងមុន។

«បើបិទហាងគ្រប់គ្នា បងឯងបានអីហូប?» នេះជាពាក្យលេងសើចរបស់លោក ម៉ូវ ឆាយ ម្ចាស់ហាងគុយទាវអូឫស្សី សាខាក្រុងសៀមរាប មុនផ្តល់បទសម្ភាសន៍ដល់បណ្ដាញសារព័ត៌មាន AMS។ សម្រាប់លោក ការបន្តបើកហាងក្នុងរដូវបុណ្យមិនត្រឹមតែជាការបំពេញតម្រូវការរបស់ភ្ញៀវប៉ុណ្ណោះទេ ប៉ុន្តែក៏ជាឱកាសសំខាន់សម្រាប់បង្កើនការលក់ដូរ និងប្រាក់ចំណូលរបស់គ្រួសារផងដែរ។

លោក ម៉ូវ ឆាយ បានឱ្យដឹងថា នៅថ្ងៃធម្មតា ហាងរបស់លោកលក់គុយទាវបានជាង ១០០ ចាន ដោយមានតម្លៃចាប់ពី ១ ម៉ឺនរៀលឡើងទៅ។ មុខម្ហូបដែលជាចំណុចទាក់ទាញរបស់ហាង គឺគុយទាវចានធំដែលមានសាច់ចម្រុះ ២០ មុខ។ ក្នុងឱកាសបុណ្យ ភ្ញៀវអាចកុម៉្មង់សាច់បន្ថែម ឬគុយទាវឌុប ដែលអាចធ្វើឱ្យតម្លៃម្ហូបកើនឡើងបន្តិចតាមការកុម៉្មង់ ប៉ុន្តែលោកបញ្ជាក់ថា ហាងនៅតែផ្តល់ជូននូវរសជាតិ និងតម្លៃសមរម្យ។

តាមការរៀបរាប់របស់លោក ក្នុងរយៈពេល ៣ ថ្ងៃចុងក្រោយនៃពិធីបុណ្យកាន់បិណ្ឌ-ភ្ជុំបិណ្ឌ ហាងរបស់លោកទទួលបានភ្ញៀវកើនឡើងប្រមាណ ៥ ដង បើប្រៀបធៀបនឹងថ្ងៃធម្មតា ដែលមានភ្ញៀវប្រមាណ ៨០ នាក់ក្នុងមួយថ្ងៃ។ ហាងបើកលក់ចាប់ពីម៉ោង ៦ ព្រឹក ដល់ម៉ោង ២ រសៀល ហើយក្នុងប៉ុន្មានថ្ងៃនៃរដូវបុណ្យនេះ ក៏មានភ្ញៀវមកពីក្រៅខេត្តចូលមកទទួលទានអាហារច្រើនផងដែរ។

លោក ម៉ូវ ឆាយ ទទួលស្គាល់ថា អ្នកណាក៏ចង់សម្រាក និងចង់ចំណាយពេលជាមួយគ្រួសារដែរ ប៉ុន្តែលោកមើលឃើញថា ការបើកហាងក្នុងពេលដែលមនុស្សធ្វើដំណើរកម្សាន្តច្រើន គឺជាឱកាសមិនគួររំលង។ ម្យ៉ាងទៀត លោក គ្រួសារ និងបុគ្គលិកហាងបានសម្រាកមួយថ្ងៃរួចហើយនៅថ្ងៃកាន់បិណ្ឌទី១ ដើម្បីទៅវត្តធ្វើបុណ្យជុំគ្នា។

លោកក៏យល់ថា ការបន្តបើកហាងរបស់អាជីវករក្នុងពេលតម្រូវការកើនឡើង អាចជួយរក្សាការប្រកួតប្រជែងតម្លៃនៅលើទីផ្សារ ដើម្បីកុំឱ្យអ្នកលក់មួយចំនួនឆ្លៀតឱកាសដំឡើងថ្លៃហួសហេតុ ក្នុងរដូវបុណ្យ។

ក្រៅពីអ្នកលក់ដូរ អ្នកផ្តល់សេវាដឹកជញ្ជូនក៏មើលឃើញឱកាសបង្កើនប្រាក់ចំណូលក្នុងរដូវបុណ្យនេះដែរ។ លោក ប៉ុក ពៅ ហៅ រ៉ាទីត ដែលមានស្រុកកំណើតនៅខេត្តព្រៃវែង និងបានកសាងគ្រួសារនៅខេត្តបាត់ដំបង បានចាប់យកមុខរបររត់កង់បីឥណ្ឌាជាមុខរបរចម្បង ដោយឆ្លៀតរកប្រាក់ចំណូលបន្ថែមនៅពេលមានតម្រូវការដឹកជញ្ជូនកើនឡើង។

លោក រ៉ាទីត បានប្រាប់ AMS ថា ជាធម្មតា លោកឈប់ចាំដឹកភ្ញៀវនៅតំបន់ខាងក្រោយវត្តទួលតាឯក ហើយអាចរត់បានប្រមាណ ៧ ទៅ ៨ ជើងក្នុងមួយថ្ងៃ ដោយរកប្រាក់ចំណូលបានប្រហែល ៤ ម៉ឺនរៀល។ ប៉ុន្តែចាប់តាំងពីថ្ងៃកាន់បិណ្ឌទី១ រហូតដល់ថ្ងៃភ្ជុំធំ ចំនួនភ្ញៀវដែលលោកដឹកបានកើនឡើង ហើយប្រាក់ចំណូលប្រចាំថ្ងៃក៏កើនដល់ចន្លោះពី ៨ ម៉ឺន ទៅ ១០ ម៉ឺនរៀល។

ទោះជាយ៉ាងណា លោក រ៉ាទីត បានបញ្ជាក់ថា ប្រាក់ចំណូលដែលកើនឡើងមិនមានន័យថា លោកអាចសន្សំប្រាក់បានច្រើននោះទេ ព្រោះការចំណាយលើហ្គាសសម្រាប់កង់បីកំពុងកើនឡើង។ ស្របពេលទំនិញមួយចំនួនក៏ឡើងថ្លៃដែរ ចំណូលដែលរកបានគ្រាន់តែជួយទប់ទល់នឹងការចំណាយប្រចាំថ្ងៃរបស់គ្រួសារ ដោយមិនមានលទ្ធភាពសន្សំទុកបានច្រើនឡើយ។

សម្រាប់លោក រ៉ាទីត ការបន្តរត់កង់បីក្នុងរដូវបុណ្យគឺជាឱកាសដើម្បីរកប្រាក់បន្ថែម ប៉ុន្តែចំណូលដែលទទួលបានត្រូវគិតគូរជាមួយថ្លៃដើមផងដែរ។ នេះបង្ហាញថា ទោះបីចំនួនជើងដឹកជញ្ជូន និងប្រាក់ចំណូលកើនឡើងក៏ដោយ ការចំណាយខ្ពស់នៅតែជាកត្តាដែលធ្វើឱ្យអ្នកប្រកបរបរមួយចំនួនពិបាកសល់ប្រាក់សម្រាប់សន្សំ។

ជុំវិញស្ថានភាពនេះ លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានទទួលស្គាល់ថា សកម្មភាពលក់ដូរ និងដឹកជញ្ជូនក្នុងរដូវបុណ្យភ្ជុំបិណ្ឌមានសន្ទុះខ្លាំង ដែលបង្កើតឱកាសទទួលបានប្រាក់ចំណូលខ្ពស់ក្នុងរយៈពេលខ្លីសម្រាប់អ្នកផ្តល់សេវា។

លោកសង្កេតឃើញថា ក្នុងអំឡុងពេលបុណ្យកាន់បិណ្ឌ-ភ្ជុំបិណ្ឌ អ្នករត់តាក់ស៊ី កង់បី និងម៉ូតូឌុបមួយចំនួនបានផ្អាកការប្រើប្រាស់កម្មវិធីដឹកជញ្ជូន (App) ហើយងាកមកទទួលភ្ញៀវតាមជើង ដោយចរចាតម្លៃដែលព្រមព្រៀងគ្នា។ តាមការសង្កេតរបស់លោក វិធីនេះអាចឱ្យអ្នកផ្តល់សេវាទទួលបានប្រាក់ច្រើនជាងការភ្ជាប់សេវាជាមួយកម្មវិធីក្នុងរដូវបុណ្យ។

លោក វ៉ន ពៅ ក៏បានកត់សម្គាល់ថា អ្នកប្រកបរបរសេដ្ឋកិច្ចក្រៅប្រព័ន្ធជាច្រើននៅឆ្នាំ២០២៦នេះ មិនបានឈប់លក់ដូរ ឬរត់កង់បីដើម្បីទៅលេងស្រុកកំណើតឡើយ ប៉ុន្តែបន្តធ្វើការដើម្បីឆ្លៀតយកឱកាសរកប្រាក់ចំណូល ក្នុងពេលដែលប្រជាពលរដ្ឋជាច្រើនឈប់សម្រាក និងធ្វើដំណើរកម្សាន្ត។

លោកបន្ថែមថា ការខិតខំរកប្រាក់ក្នុងរដូវបុណ្យនេះ គឺដើម្បីដោះស្រាយការចំណាយពីមុនៗ និងសល់ប្រាក់ខ្លះសម្រាប់បន្តដើមទុនក្រោយពិធីបុណ្យចប់។ ទោះជាយ៉ាងណា ការចំណាយក៏មានច្រើនដែរ ដោយសារតម្លៃប្រេងសាំង និងហ្គាសកើនឡើង ព្រមទាំងគ្រឿងទេស ត្រី និងសាច់ដែលអាជីវករត្រូវទិញយកមកធ្វើម្ហូបសម្រាប់លក់។

យោងតាមលោក វ៉ន ពៅ សមាគមរបស់លោកមានសមាជិកចំនួន ២៥.០០០ នាក់ នៅរាជធានី-ខេត្តចំនួន ៩ រួមមាន រាជធានីភ្នំពេញ ខេត្តសៀមរាប បាត់ដំបង បន្ទាយមានជ័យ ព្រះសីហនុ កំពត កែប កំពង់ស្ពឺ និងកំពង់ចាម។ តាមរយៈសមាគមនេះ អ្នកប្រកបរបរសេដ្ឋកិច្ចក្រៅប្រព័ន្ធត្រូវបានលើកទឹកចិត្តឱ្យទទួលបានសេវាសង្គមពី ប.ស.ស. ការជួយដោះស្រាយវិវាទ ការអប់រំអំពីច្បាប់ចរាចរណ៍ និងចំណេះដឹងផ្នែកបច្ចេកវិទ្យា ព្រមទាំងការភ្ជាប់ទំនាក់ទំនងជាមួយអាជ្ញាធរ និងស្ថាប័នពាក់ព័ន្ធ។

ការយកចិត្តទុកដាក់លើអ្នកប្រកបរបរសេដ្ឋកិច្ចក្រៅប្រព័ន្ធនេះ ស្របនឹងយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨។ អ្នកនាំពាក្យក្រសួងឧស្សាហកម្ម បច្ចេកវិទ្យា និងនវានុវត្តន៍ បានឱ្យដឹងកាលពីពេលថ្មីៗនេះថា អ្នកប្រកបរបរសេដ្ឋកិច្ចក្រៅប្រព័ន្ធប្រមាណ ៥០០.០០០ នាក់ ត្រូវបានចុះបញ្ជីទទួលស្គាល់ ហើយបានរួមចំណែកយ៉ាងសំខាន់ដល់សេដ្ឋកិច្ចកម្ពុជា តាមរយៈការបង្កើតប្រាក់ចំណូលសម្រាប់គ្រួសារ ការបង្កើតការងារ និងការគាំទ្រសកម្មភាពសេដ្ឋកិច្ចនៅមូលដ្ឋាន។

យុទ្ធសាស្ត្រជាតិនេះមានគោលដៅលើកកម្ពស់ជីវភាពរស់នៅ ពង្រឹងលទ្ធភាពទទួលបានការការពារ និងការគាំទ្រចាំបាច់ ព្រមទាំងជំរុញឱ្យសេដ្ឋកិច្ចក្រៅប្រព័ន្ធក្លាយជាកម្លាំងចលករក្នុងការអភិវឌ្ឍសេដ្ឋកិច្ចកម្ពុជាប្រកបដោយបរិយាបន្ន ចីរភាព និងភាពធន់នឹងវិបត្តិ។

សម្រាប់អ្នកលក់គុយទាវ និងអ្នករត់កង់បីដូចលោក ម៉ូវ ឆាយ និងលោក រ៉ាទីត រដូវបុណ្យមិនត្រឹមតែជាពេលវេលាសម្រាប់សម្រាក និងជួបជុំគ្រួសារប៉ុណ្ណោះទេ ប៉ុន្តែជាឱកាសសំខាន់ក្នុងការបង្កើនប្រាក់ចំណូល ដើម្បីទ្រទ្រង់ជីវភាពប្រចាំថ្ងៃ។ ទោះបីការងារកាន់តែមមាញឹក និងចំណូលកើនឡើងក៏ដោយ ការចំណាយលើថ្លៃដើមនៅតែជាបញ្ហាប្រឈម ដែលធ្វើឱ្យអ្នកប្រកបរបរទាំងនេះត្រូវបន្តខិតខំ ដើម្បីរក្សាលំនឹងជីវភាពគ្រួសាររបស់ខ្លួន៕

ភ្ជុំបិណ្ឌជាឱកាសបង្កើនចំណូលសម្រាប់អ្នកលក់គុយទាវនិងអ្នករត់កង់បី តែត្រូវលះបង់ពេលជួបជុំគ្រួសារ

លោក ជិន សុភ័ក្ដ្រ | Mr. Chin Sopheak

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន

លោក​ ​ជិន​ សុភ័ក្ដ្រ | Mr. Chin Sopheak

លោក ជិន សុភ័ក្ដ្រ | Mr. Chin Sopheak