ភាគហ៊ុន RGPPSEZ កើន ៣៩% ក្រោយចុះបញ្ជីផ្សារមូលបត្រកម្ពុជារយៈពេល ១០ ឆ្នាំ

ភ្នំពេញ៖ តម្លៃទីផ្សារភាគហ៊ុនរបស់ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ដែលជាក្រុមហ៊ុនអភិវឌ្ឍតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) បានកើនឡើង ៣៩% ដល់ជាង ៥៧ លានដុល្លារអាម៉េរិក បន្ទាប់ពីក្រុមហ៊ុននេះបានចុះបញ្ជីក្នុងផ្សារមូលបត្រកម្ពុជា (CSX) អស់រយៈពេល ១០ ឆ្នាំ។

យោងតាមសេចក្តីប្រកាសព័ត៌មានរបស់ក្រុមហ៊ុន ចេញផ្សាយនៅថ្ងៃទី១០ ខែវិច្ឆិកា ឆ្នាំ ២០២៦ ក្នុងឱកាសខួប ២០ឆ្នាំនៃការបង្កើត RGPPSEZ តម្លៃទីផ្សាររបស់ក្រុមហ៊ុនបានកើនពី ៤១,២៦៤,៨៧៥ ដុល្លារអាម៉េរិក នៅពេលចុះបញ្ជីក្នុងឆ្នាំ ២០១៦ ដល់ ៥៧,៤១១,៧៥៨ ដុល្លារអាម៉េរិក នាពេលបច្ចុប្បន្ន។

ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ត្រូវបានចុះបញ្ជីក្នុងផ្សារមូលបត្រកម្ពុជាក្នុងឆ្នាំ ២០១៦ ក្នុងនាមជាក្រុមហ៊ុនឯកជនដំបូងគេដែលបានចុះបញ្ជីក្នុងផ្សារនេះ បន្ទាប់ពីតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ត្រូវបានបង្កើតឡើងក្នុងឆ្នាំ ២០០៦។

ក្រៅពីកំណើនតម្លៃទីផ្សារភាគហ៊ុន សកម្មភាពពាណិជ្ជកម្មរបស់ក្រុមហ៊ុនផលិតកម្មនៅក្នុងតំបន់សេដ្ឋកិច្ចពិសេសនេះក៏បានកើនឡើងគួរឱ្យកត់សម្គាល់ផងដែរ។ តម្លៃនាំចូលបានកើនពី ៣៧៨ លានដុល្លារអាម៉េរិកក្នុងឆ្នាំ ២០១៦ ដល់ ២,១៦៦ លានដុល្លារអាម៉េរិកក្នុងឆ្នាំ ២០២៥ ដែលស្មើនឹងកំណើន ៦ ដង។

ដោយឡែក តម្លៃនាំចេញបានកើនពី ៣១៦ លានដុល្លារអាម៉េរិកក្នុងឆ្នាំ ២០១៦ ដល់ ១,៣៤៦ លានដុល្លារអាម៉េរិកក្នុងឆ្នាំ ២០២២ និងបន្តកើនដល់ ២,១៤៤ លានដុល្លារអាម៉េរិកក្នុងឆ្នាំ ២០២៥ ស្មើនឹងកំណើន ៧ ដង។ ចំណែកតម្លៃបង្គរនៃការនាំចេញក្នុងរយៈពេលនេះមានចំនួន ៩,៩២៣ លានដុល្លារអាម៉េរិក ដែលជាការរួមចំណែកដល់ការអភិវឌ្ឍសេដ្ឋកិច្ចជាតិ។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន រ៉ូយ៉ាល់ គ្រុប និងក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានមានប្រសាសន៍ក្នុងឱកាសខួប ២០ ឆ្នាំថា ក្នុងរយៈពេលពីរទសវត្សរ៍កន្លងមកនេះ RGPPSEZ បានរីកចម្រើនតាមរយៈការជឿជាក់ ទំនុកចិត្ត និងការប្តេជ្ញាចិត្តរបស់វិនិយោគិន ដៃគូ បុគ្គលិក និងភាគីពាក់ព័ន្ធទាំងអស់។

អ្នកឧកញ៉ាបានថ្លែងថា៖ «ក្នុងរយៈពេល ២០ ឆ្នាំកន្លងមកនេះ RGPPSEZ បានរីកចម្រើនតាមរយៈការជឿជាក់ ទំនុកចិត្ត និងការប្តេជ្ញាចិត្តរបស់វិនិយោគិន ដៃគូ បុគ្គលិក និងភាគីពាក់ព័ន្ធទាំងអស់របស់យើង។ យើងមានមោទនភាពចំពោះអ្វីដែលយើងសម្រេចបានរួមគ្នា និងការរួមចំណែកដែលតំបន់នេះបានធ្វើឡើងចំពោះកិច្ចអភិវឌ្ឍន៍ឧស្សាហកម្ម និងសេដ្ឋកិច្ចរបស់កម្ពុជា»។

អ្នកឧកញ៉ាបានបន្ថែមថា ក្រុមហ៊ុននៅតែប្តេជ្ញាចិត្តក្នុងការគាំទ្រវិនិយោគិន ទាក់ទាញការវិនិយោគដែលមានគុណភាព និងរួមចំណែកដល់កំណើនសេដ្ឋកិច្ច និងការអភិវឌ្ឍឧស្សាហកម្មរបស់កម្ពុជាបន្តទៀត។

បច្ចុប្បន្ន RGPPSEZ មានក្រុមហ៊ុនវិនិយោគចំនួន ១១៧ មកពី ១៥ ប្រទេសជុំវិញពិភពលោក ដែលប្រកបសកម្មភាពផលិតកម្មលើមុខទំនិញជាច្រើនប្រភេទ ចាប់ពីចំណីអាហារ និងភេសជ្ជៈ រហូតដល់ការដំឡើងរថយន្ត។ ក្រុមហ៊ុនបានឱ្យដឹងថា មានកម្មករនិយោជិតជាង ៦៣,០០០ នាក់ កំពុងបម្រើការងារនៅក្នុងតំបន់នេះ។

ក្រៅពីការរួមចំណែកដល់ការនាំចូល និងនាំចេញ RGPPSEZ ក៏បានចូលរួមបង្កើតការងារ ជំរុញការអភិវឌ្ឍឧស្សាហកម្ម និងសកម្មភាពសេដ្ឋកិច្ចនៅតំបន់ជុំវិញផងដែរ។ ទីតាំងដែលពីមុនជាវាលស្រែ និងដីទំនេរ បានប្រែក្លាយទៅជាមជ្ឈមណ្ឌលវិនិយោគ និងផលិតកម្ម ដែលមានសកម្មភាពអាជីវកម្មយ៉ាងរស់រវើក។

ក្រុមហ៊ុនបានបញ្ជាក់ថា ការមានវត្តមានរបស់កម្មករនិយោជិតជាង ៦៣,០០០ នាក់នៅក្នុងតំបន់នេះ មិនត្រឹមតែផ្តល់ឱកាសការងារ និងប្រាក់ចំណូលដល់ប្រជាពលរដ្ឋប៉ុណ្ណោះទេ ប៉ុន្តែថែមទាំងផ្តល់ឱកាសឱ្យពួកគេរៀនសូត្រ និងទទួលបានជំនាញថ្មីៗផងដែរ។ សកម្មភាពទាំងនេះក៏បានជំរុញឱ្យតំបន់ជុំវិញដែលធ្លាប់ស្ងប់ស្ងាត់ និងដាច់ស្រយាលក្នុងរាជធានីភ្នំពេញ ក្លាយជាសហគមន៍ដែលមានសកម្មភាពអាជីវកម្មកាន់តែច្រើន។

ស្របពេលប្រារព្ធខួប ២០ ឆ្នាំ RGPPSEZ បានបង្ហាញពីផែនការបន្តពង្រីក និងបង្កើនសមិទ្ធផល ដោយផ្តោតលើការផ្តល់ហេដ្ឋារចនាសម្ព័ន្ធប្រកបដោយគុណភាព សេវាកម្មដែលអាចទុកចិត្តបាន និងការគាំទ្រវិនិយោគិនយ៉ាងទូលំទូលាយ ព្រមទាំងបន្តសហការជាមួយដៃគូ និងភាគីពាក់ព័ន្ធ ដើម្បីរួមចំណែកដល់កំណើនសេដ្ឋកិច្ចកម្ពុជាដែលមានភាពប្រកួតប្រជែង ចីរភាព និងពិពិធកម្មកាន់តែប្រសើរឡើង៕

ភាគហ៊ុន RGPPSEZ កើន ៣៩% ក្រោយចុះបញ្ជីផ្សារមូលបត្រកម្ពុជារយៈពេល ១០ ឆ្នាំ

អ្នកនាង យ៉ាត់ ម៉ាឡៃ | Mrs. YAT Malai

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន

ភាគហ៊ុន​ R​GPPSEZ ​កើន​ ៣៩​%​ ​ក្រោយ​ចុះ​បញ្ជី​ផ្សារ​មូលបត្រ​កម្ពុជា​រយៈពេល​ ១០ ​ឆ្នាំ

អ្នកនាង យ៉ាត់ ម៉ាឡៃ | Mrs. YAT Malai

ភាគហ៊ុន RGPPSEZ កើន ៣៩% ក្រោយចុះបញ្ជីផ្សារមូលបត្រកម្ពុជារយៈពេល ១០ ឆ្នាំ