សេដ្ឋកិច្ចថៃ រងសម្ពាធពីទេសចរណ៍ធ្លាក់ចុះ និងថ្លៃថាមពលខ្ពស់

បរទេស៖ កំណើនសេដ្ឋកិច្ចថៃបានកើនឡើងយឺតក្នុងត្រីមាសទី២ ដោយសារតម្លៃថាមពលខ្ពស់ និងការរំខានពីជម្លោះនៅមជ្ឈិមបូព៌ា បានប៉ះពាល់ដល់វិស័យទេសចរណ៍ ការចំណាយរបស់គ្រួសារ និងវិស័យផលិតកម្ម។ នេះបើយោងតាមការរាយការណ៍របស់ Thai Enquirer។

ធនាគារកណ្តាលថៃ (BOT) បានឱ្យដឹងថា កំណើនសេដ្ឋកិច្ចបានកើនឡើងយឺតក្នុងត្រីមាសទី២ ប៉ុន្តែមិនបានបង្ហាញតួលេខជាក់លាក់នោះទេ។ វិស័យទេសចរណ៍ជាកត្តាចម្បងមួយដែលធ្វើឱ្យកំណើនយឺត ដោយក្នុងខែមិថុនា ចំនួនភ្ញៀវទេសចរបរទេសបានធ្លាក់ចុះ ១៣,១ ភាគរយ ខណៈសន្ទស្សន៍ចំណូលពីទេសចរណ៍ធ្លាក់ចុះ ១២,៨ ភាគរយ បើធៀបនឹងខែឧសភា។

ការធ្លាក់ចុះនៃចំនួនភ្ញៀវទេសចរភាគច្រើនមកពីមជ្ឈិមបូព៌ា អឺរ៉ុប ចិន ឥណ្ឌា និងកូរ៉េខាងត្បូង ដោយសារតម្លៃថាមពលខ្ពស់បានកាត់បន្ថយតម្រូវការ និងជើងហោះហើរ។ សូម្បីតែចំនួនភ្ញៀវទេសចរម៉ាឡេស៊ី ដែលជាប្រទេសជិតខាងរបស់ថៃ ក៏បានធ្លាក់ចុះផងដែរ។

ការធ្លាក់ចុះនេះបានដាក់សម្ពាធលើសណ្ឋាគារ ភោជនីយដ្ឋាន និងសេវាកម្មដឹកជញ្ជូនអ្នកដំណើរ។ មិនត្រឹមតែប៉ុណ្ណោះ ការចំណាយលើការប្រើប្រាស់ផ្ទាល់ខ្លួនបានធ្លាក់ចុះក្នុងត្រីមាសទី២ ខណៈថ្លៃជីវភាពរស់នៅកាន់តែខ្ពស់បានដាក់សម្ពាធលើការចំណាយរបស់ប្រជាពលរដ្ឋ។

ទិន្នផលផលិតកម្មក៏បានថយចុះផងដែរ ដោយសារការជួសជុលរោងចក្រចម្រាញ់ប្រេង ខណៈការផលិតសារធាតុគីមី រថយន្តមិនមែនអគ្គិសនី (Non-EV) និងគ្រឿងបរិក្ខារអគ្គិសនីបានចុះខ្សោយ។

យ៉ាងណាក៏ដោយ វិធានការជួយសម្រួលរបស់រដ្ឋាភិបាលបានជំរុញឱ្យការចំណាយលើទំនិញប្រើប្រាស់កើនឡើងបន្តិចវិញក្នុងខែមិថុនា ខណៈការលក់រថយន្ត និងម៉ូតូទទួលបានផលប្រយោជន៍ពីតម្រូវការយានយន្តអគ្គិសនី (EV) ដែលបានកើនឡើង។

ទន្ទឹមនឹងនេះ បច្ចេកវិទ្យានៅតែជាវិស័យលេចធ្លោរបស់ថៃ ដោយការនាំចេញគ្រឿងអេឡិចត្រូនិក និងការវិនិយោគលើមជ្ឈមណ្ឌលទិន្នន័យបានកើនឡើង។ គិតត្រឹមខែមិថុនា អតិផរណាទូទៅស្ថិតនៅកម្រិត ២,៤២ ភាគរយ ខណៈអតិផរណាស្នូលមាន ១,២៣ ភាគរយ។

ក្នុងខែមិថុនា គណនីចរន្តរបស់ថៃមានឱនភាព ៣,៥ ពាន់លានដុល្លារ ប៉ុន្តែតួលេខនេះបានប្រសើរឡើងពីខែឧសភា ដោយសាររដូវកាលដែលក្រុមហ៊ុនបរទេសបង្វែរប្រាក់ចំណេញ និងប្រាក់ភាគលាភត្រឡប់ទៅប្រទេសរបស់ពួកគេបានបញ្ចប់។

ជញ្ជីងពាណិជ្ជកម្មមិនមានការប្រែប្រួលច្រើននោះទេ ដោយការកើនឡើងនៃការនាំចូលមាសបានប៉ះប៉ូវការធ្លាក់ចុះនៃការនាំចូលប្រេង។ ទោះបីការចំណាយរបស់រដ្ឋាភិបាលកើនឡើងក៏ដោយ ការចំណាយទុនវិនិយោគរបស់សហគ្រាសសាធារណៈបានថយចុះ។

BOT បានព្រមានថា ស្ថានភាពការងារក្នុងវិស័យផលិតកម្មត្រូវការការតាមដានយ៉ាងយកចិត្តទុកដាក់ ដោយសារផលិតកម្មចុះខ្សោយ ដើមទុនកើនឡើង និងការប្រកួតប្រជែងកាន់តែខ្លាំងពីការនាំចូល។

ធនាគារកណ្តាលថៃព្យាករណ៍ថា សេដ្ឋកិច្ចនឹងកើនឡើង ២,៣ ភាគរយក្នុងឆ្នាំ២០២៦ ខណៈអតិផរណាទូទៅត្រូវបានរំពឹងថានឹងមានអត្រាជាមធ្យម ២,៨ ភាគរយ។

លើសពីនេះ BOT បានគូសបញ្ជាក់ពីហានិភ័យចម្បងៗសម្រាប់សេដ្ឋកិច្ចថៃ រួមមានជម្លោះនៅមជ្ឈិមបូព៌ា នយោបាយពាណិជ្ជកម្មរបស់សហរដ្ឋអាម៉េរិក ការស្តារឡើងវិញនៃវិស័យទេសចរណ៍ ការកើនឡើងនៃដើមទុនរបស់គ្រួសារ និងអាជីវកម្ម ប្រសិទ្ធភាពនៃជំនួយរដ្ឋាភិបាល និងបាតុភូតអាកាសធាតុ អែលនីញ៉ូ (El Niño)៕

កញ្ញា យឿន ពុធធីតា | Ms. Yoeun Puththyda

អ្នកសារព័ត៌មានអន្តរជាតិ

សេដ្ឋកិច្ច​ថៃ​ រង​សម្ពាធ​ពី​ទេសចរណ៍​ធ្លាក់ចុះ​ និង​ថ្លៃ​ថាមពល​ខ្ពស់​

កញ្ញា យឿន ពុធធីតា | Ms. Yoeun Puththyda

អ្នកសារព័ត៌មានអន្តរជាតិ

សេដ្ឋកិច្ចថៃ រងសម្ពាធពីទេសចរណ៍ធ្លាក់ចុះ និងថ្លៃថាមពលខ្ពស់