រដ្ឋចំណាយ ៦ លានដុល្លារ ដំឡើងអំពូលសូឡា ១,២០០ គីឡូម៉ែត្រ នៅ ១៣ រាជធានី-ខេត្ត

ភ្នំពេញ៖ រាជរដ្ឋាភិបាលកម្ពុជា នឹងចំណាយថវិកាប្រមាណ ៦ លានដុល្លារអាម៉េរិក ដើម្បីដំឡើងអំពូលសូឡាប្រភេទ LED បំភ្លឺតាមដងផ្លូវសាធារណៈប្រវែង ១,២០០ គីឡូម៉ែត្រ នៅរាជធានី-ខេត្តចំនួន ១៣ ដើម្បីបង្កើនសុវត្ថិភាព និងភាពងាយស្រួលសម្រាប់ប្រជាពលរដ្ឋធ្វើដំណើរនៅពេលយប់។

ក្នុងឱកាសអញ្ជើញជាគណៈអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ១០ នៅព្រឹកថ្ងៃទី១ ខែតុលា ឆ្នាំ២០២៦ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសគាំទ្រ និងបញ្ជាឱ្យក្រសួងរ៉ែ និងថាមពល អគ្គិសនីកម្ពុជា និងអាជ្ញាធររាជធានី-ខេត្តគោលដៅទាំង ១៣ សហការគ្នាពន្លឿនការដំឡើងអំពូលសូឡានេះ។

សម្ដេចធិបតីមានប្រសាសន៍ថា បន្ទាប់ពីអនុវត្តនៅរាជធានី-ខេត្តទាំង ១៣ រួច រាជរដ្ឋាភិបាលនឹងពង្រីកការដំឡើងទៅកាន់ផ្លូវសំខាន់ៗ ជាពិសេសផ្លូវដែលត្រូវធ្វើដំណើរដោយល្បឿនលឿន នៅទូទាំងរាជធានី-ខេត្តទាំង ២៥។

សម្ដេចធិបតីបានចាត់ទុកការងារដែលបម្រើផលប្រយោជន៍សាធារណៈ និងប្រជាពលរដ្ឋជាការងារអាទិភាព។ លោកបន្តថា ការដំឡើងអំពូលសូឡាមិនត្រឹមតែជួយបង្កើនសោភណភាពតាមដងផ្លូវប៉ុណ្ណោះទេ ប៉ុន្តែថែមទាំងអាចជួយកាត់បន្ថយគ្រោះថ្នាក់ចរាចរណ៍ និងធានាសន្តិសុខ សុវត្ថិភាពសម្រាប់ការធ្វើដំណើរនៅពេលយប់ផងដែរ។

សម្ដេចធិបតីមានប្រសាសន៍ថា ការប្រើប្រាស់ប្រព័ន្ធសូឡាធ្វើឱ្យការដំឡើងអំពូលបំភ្លឺផ្លូវមានភាពងាយស្រួលជាងមុន ខណៈបង្គោលអំពូលក៏អាចផលិតបានក្នុងស្រុក ដែលអាចផ្តល់ឱកាសដល់សិប្បកម្មក្នុងស្រុកបង្កើនប្រាក់ចំណូល និងជួយកាត់បន្ថយថ្លៃចំណាយ។

សម្ដេចធិបតី ហ៊ុន ម៉ាណែត បានមានប្រសាសន៍ថា៖ «ពីមុនប្រើប្រាស់ភ្លើង តែ ១,០០០គីឡូម៉ែត្រ ក៏ពិបាករកលុយតដែរ តែឥឡូវយើងប្រើសូឡា យើងដំឡើងតែម្ដងទេ»។ សម្ដេចបន្ថែមថា ការផលិតបង្គោលក្នុងស្រុក គឺជាការគិតគូរគ្រប់ជ្រុងជ្រោយ ដែលអាចឱ្យសិប្បកម្មកូនខ្មែរមានលទ្ធភាពរកចំណូលបាន និងជួយកាត់បន្ថយថ្លៃចំណាយ។

ចំពោះការអនុវត្តជាក់ស្ដែង ខេត្តពោធិ៍សាត់បានចាប់ផ្ដើមដំឡើងអំពូលសូឡាមុនគេ ដោយបានបញ្ចប់ការដំឡើងលើចម្ងាយផ្លូវ ២៥គីឡូម៉ែត្រ តាមបណ្ដោយផ្លូវជាតិលេខ៥ ចាប់ពីចំណុចផ្លូវចូលទីគោរពសក្ការៈបូជាអ្នកតាឃ្លាំងមឿង នៃទីរួមខេត្ត រហូតដល់ស្រុកក្រគរ។

តាមគម្រោងរបស់រដ្ឋបាលខេត្តពោធិ៍សាត់ ការដំឡើងនឹងបន្តចាប់ពីព្រំប្រទល់ខេត្តបាត់ដំបង រហូតដល់ខេត្តកំពង់ឆ្នាំង ហើយគ្រោងនឹងបញ្ចប់ការដំឡើងបាន ១០០ភាគរយ យ៉ាងយូរត្រឹមឆ្នាំ២០២៨។

ជាមួយគ្នានេះ ការដំឡើងអំពូលបំភ្លឺផ្លូវសាធារណៈក៏ត្រូវបានពង្រីកទៅតាមស្រុក និងក្រុងមួយចំនួនផ្សេងទៀត ខណៈរាជរដ្ឋាភិបាលកំពុងផ្ដោតការយកចិត្តទុកដាក់លើការបំភ្លឺតាមដងផ្លូវសាធារណៈ។

រាជធានី-ខេត្តចំនួន ១៣ ដែលនឹងដំឡើងអំពូលសូឡាក្នុងដំណាក់កាលដំបូង រួមមាន រាជធានីភ្នំពេញ ខេត្តកណ្ដាល កំពង់ស្ពឺ កំពង់ឆ្នាំង បាត់ដំបង បន្ទាយមានជ័យ សៀមរាប កំពង់ចាម តាកែវ ព្រះសីហនុ កោះកុង កំពត និងខេត្តកែប៕

រដ្ឋចំណាយ ៦ លានដុល្លារ ដំឡើងអំពូលសូឡា ១,២០០ គីឡូម៉ែត្រ នៅ ១៣ រាជធានី-ខេត្ត

លោក ជិន សុភ័ក្ដ្រ | Mr. Chin Sopheak

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន

រដ្ឋ​ចំណាយ​ ​៦ ​​លាន​ដុល្លារ ​ដំឡើង​អំពូល​សូឡា​ ​១​,​២០០ ​គីឡូម៉ែត្រ​ ​នៅ​ ១៣​ ​រាជធានី​-​ខេត្ត

លោក​ ​ជិន​ សុភ័ក្ដ្រ | Mr. Chin Sopheak

រដ្ឋចំណាយ ៦ លានដុល្លារ ដំឡើងអំពូលសូឡា ១,២០០ គីឡូម៉ែត្រ នៅ ១៣ រាជធានី-ខេត្ត

លោក ជិន សុភ័ក្ដ្រ | Mr. Chin Sopheak