បរទេស៖  អាម៉េរិកអនុម័តឱ្យក្រុមហ៊ុនបចេ្ចកវិទ្យា Nvidia លក់ឈីបប្រភេទ H200 ដល់ក្រុមហ៊ុនចិនធំៗចំនួន ១០ បន្ទាប់ពីជំនួបប្រជុំកំពូលរវាងមេដឹកនាំមហាអំណាចចិន និងអាម៉េរិកដែលបានប្រព្រឹត្តិទៅកាលពីថ្មីៗនេះ។ នេះបើយោងតាមការរាយការណ៍ពីរ៉យទ័រ។

កាលពីថ្ងៃព្រហស្បតិ៍ ភាគហ៊ុនរបស់ Nvidia កើនឡើងជាង ៤០ ភាគរយ បើធៀបនឹងអត្រាទាបជាងគេបង្អស់នៅឆ្នាំនេះ បន្ទាប់ពីមានការប្រកាសថាអាម៉េរិកបានអនុម័តឱ្យមានការលក់ឈីបប្រភេទ H200 ទៅកាន់ក្រុមហ៊ុនចិនធំៗចំនួន ១០ រួមទាំង Alibaba (BABA), Tencent (TCEHY), ByteDance, និង JD.com (JD) ជាដើម។

ក្រសួងពាណិជ្ជកម្មអាម៉េរិកបានអនុម័តលើការលក់ H200 គឺជាដំណឺងដ៏ល្អ បន្ទាប់ពីមានការរឹតបន្តឹងលើការលក់បន្ទះឈីបកម្រិតខ្ពស់ទៅឱ្យចិនក្នុងរយៈពេលជាងមួយឆ្នាំកន្លងមកនេះ។ អ្នកចែកចាយមួយចំនួនរួមមាន Lenovo និង Foxconn ក៏ត្រូវបានអនុម័តផងដែរ។ ការអនុម័តនេះអនុញ្ញាតឱ្យអតិថិជនចិនអាចទិញបន្ទះឈីប AI H200 ដោយផ្ទាល់ពី Nvidia ឬ តាមអ្នកចែកចាយទាំងពីរនេះបានរហូតដល់ ៧៥ ០០០ បន្ទះក្រោមលក្ខខណ្ឌអាជ្ញាប័ណ្ណរបស់អាម៉េរិក។

មុនពេលមានការរឹតបន្តឹង ការទិញរបស់ចិនមានចំណែកប្រហែល ១៣ ភាគរយ នៃប្រាក់ចំណូលរបស់ Nvidia ប៉ុន្តែក្រុមហ៊ុនបាត់បង់ចំណូលមួយផ្នែកធំ នៅពេលដែលអាម៉េរិកហាមឃាត់មិនឱ្យលក់ឈីបទៅចិន។ នេះមានន័យថា ទោះបីជាអាម៉េរិកមិនទាន់អនុញ្ញាតឱ្យលក់ឈីបដែលមានកម្រិតខ្ពស់ខ្លាំងបំផុត ប៉ុន្តែលក់បានត្រឹមប្រភេទមធ្យមដូចជា H200 ក៏ដោយ ប៉ុន្តែការអនុញ្ញាតឱ្យចិនត្រឡប់មកវិញនៅតែអាចរកចំណូលរាប់ពាន់លានដុល្លារដល់ក្រុមហ៊ុន។ ជាក់ស្តែង ភាគហ៊ុនរបស់ Nvidia កើនឡើងខ្ពស់ជាង ៤០ ភាគរយ បន្ទាប់ពីមានដំណឹងអនុញ្ញាតឱ្យលក់ឈីប H200 ទៅឱ្យចិន។

ទោះបីជាការអនុញ្ញាតនេះប្រៀបបានដូចជាការបើកភ្លើងខៀវហើយក្តី ប៉ុន្តែ Nvidia មិនទាន់បាន​ដឹកជញ្ជូនណាមួយទៅឱ្យចិននៅឡើយទេ ខណៈដែលទីក្រុងប៉េកាំងមិនទាន់បានអនុញ្ញាតឱ្យក្រុមហ៊ុនក្នុងស្រុកធ្វើការបញ្ជាទិញផងដែរ។

ជាក់ស្តែង អាម៉េរិកបានអនុញ្ញាតឱ្យក្រុមហ៊ុន Nvidia លក់បន្ទះឈីប H200 ទៅឱ្យ​ប្រទេសចិន​តាំង ពីខែមករាមកម៉្ល៉េះ ប៉ុន្តែទីក្រុងប៉េកាំងទីក្រុងប៉េកាំងបញ្ជាឱ្យក្រុមហ៊ុនបច្ចេកវិទ្យាក្នុងស្រុកធ្វើពហិការលើបន្ទះឈីបដែលជាប់ពាក់ព័ន្ធជាមួយនឹង Nvidia។

រដ្ឋាភិបាលចិនបង្ហាញក្តីបារម្ភថា ការនាំចូលឈីប Nvidia អាចធ្វើឱ្យចិនពឹងផ្អែកលើបច្ចេកវិទ្យាបរទេស និងប៉ះពាល់ដល់ការអភិវឌ្ឍឈីបក្នុងស្រុករបស់ខ្លួន ដូចជាឈីបរបស់ Huawei ជាដើម​។ ចិនចង់ឱ្យក្រុមហ៊ុនបច្ចេកវិទ្យាធំៗរបស់ខ្លួនងាកមកប្រើឈីបក្នុងស្រុកវិញ ទោះបីជាវានៅមានសមត្ថភាពយឺតជាង Nvidia បន្តិចក៏ដោយ។

នាយកប្រតិបត្តិ Nvidia លោក Jensen Huang លើកឡើងថា ការរឹតបន្តឹងរបស់អាម៉េរិកកន្លងមកបានធ្វើឱ្យ Nvidia បាត់បង់ទីផ្សារនៅចិនស្ទើរតែទាំងស្រុង ឬស្ទើរតែស្មើនឹងសូន្យ។ កាលពីខែមុន រដ្ឋមន្ត្រីក្រសួងពាណិជ្ជកម្មលោក Howard Lutnick លើកឡើងដែរថា រដ្ឋាភិបាលចិនមិនទាន់អនុញ្ញាតឱ្យក្រុមហ៊ុនក្នុងស្រុកទិញឈីបពីអាម៉េរិកទៀតនោះទេ ព្រោះពួកគេកំពុងព្យាយាមរក្សាការវិនិយោគផ្តោតលើឧស្សាហកម្មឈីបក្នុងស្រុកវិញ៕​