ស្វែងយល់ពីនីតិវិធីចុះបញ្ជីដីធ្លីបំពេញបន្ថែម ក្នុងករណីម្ចាស់ដីមិនបានចុះបញ្ជីដីធ្លីមានលក្ខណៈជាប្រព័ន្ធ

ភ្នំពេញ ៖ ក្នុងឆ្នាំ២០២៦នេះ ក្រសួងរៀបចំដែនដី នគរូបនីយកម្ម និងសំណង់ បានប្រកាសបញ្ចប់ការវាស់វែង និងចុះបញ្ជីដីធ្លីជូនប្រជាពលរដ្ឋនៅទូទាំងប្រទេស និងបានចេញបណ្ណប្រគល់ជូនម្ចាស់ក្បាលដីជាបន្តបន្ទាប់ហើយផងដែរ ។ យ៉ាងណាក្ដី ក៏មានពលរដ្ឋជាម្ចាស់កម្មសិទ្ធិដីធ្លីមួយចំនួនខកខានមិនបានចុះបញ្ជីដីធ្លីមានលក្ខណៈជាប្រព័ន្ធ ប៉ុន្តែសូមកុំបារម្ភ បងប្អូនប្រជាពលរដ្ឋនៅតែអាចចុះបញ្ជីដីធ្លីតាមរយៈការចុះបញ្ជីដីធ្លីបំពេញបន្ថែមបាន ។

បើតាមសារាចរណ៍ណែនាំរបស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញពីនីតិវិធីនៃការចុះបញ្ជីដីធ្លីបំពេញបន្ថែមដើម្បីឱ្យម្ចាស់ដីដែលខកខានមិនបានចុះបញ្ជីមានលក្ខណៈជាប្រព័ន្ធអាចចុះបញ្ជីបំពេញបន្ថែមបាន ដោយជាដំបូងម្ចាស់អចលនវត្ថុដែលមិនបានចូលរួមបំពេញបែបបទតាមកាលកំណត់ក្នុងពេលដែលប្រកាសតំបន់វិនិច្ឆ័យ និងកិច្ចដំណើរការការអនុវត្តនីតិវិធីចុះបញ្ជីមានលក្ខណៈជាប្រព័ន្ធ ត្រូវដាក់ស្នើសុំចុះបញ្ជីដីមកការិយាល័យរៀបចំដែនដី នគរូបនីយកម្ម សំណង់ និងភូមិបាល តាមរយៈមេឃុំ ចៅសង្កាត់ ដែលជាទីតាំងដីនោះស្ថិតនៅ ។

បន្ទាប់មកមេឃុំ ចៅសង្កាត់ ត្រូវពិនិត្យលក្ខណៈ ផលហេតុសមស្រប ផ្ដល់យោបល់ និងបញ្ជូនសំណុំឯកសារមកការិយាល័យរៀបចំដែនដី នគរូបនីយកម្ម សំណង់ និងភូមិបាល ស្រុក/ខណ្ឌ ហើយបើសិនជាការិយាល័យជំនាញពិនិត្យឃើញថាមានហេតុផលសមស្រប មន្ត្រីជំនាញនឹងរាយការណ៍ជូនអភិបាលស្រុក ខណ្ឌ ដើម្បីផ្ដល់យោបល់ និងសហការចុះពិនិត្យទិដ្ឋភាពបច្ចេកទេស និងរដ្ឋបាលគតិយុត្តិ ហើយកំណត់ព្រំ វាស់វែង និងកសាង ទម្រង់បែបបទនៃការប្រមូលទិន្នន័យក្បាលដី ដែលបានស្នើសុំ ។ ក្នុងករណីក្បាលដីស្នើសុំចុះបញ្ជីស្ថិតនៅចន្លោះក្បាលដីដែលបានចុះបញ្ជីមានលក្ខណៈជាប្រព័ន្ធរួចហើយ ព្រំនៃក្បាលដីនោះ មិនចាំបាច់ធ្វើការកំណត់ថ្មីទៀតទេ ។ ចំពោះក្បាលដីដែលមិនទាន់បានកំណត់ព្រំជាផ្លូវការ ជាមួយក្បាលដីជាប់ព្រំគ្នាសោះ ឬបានកំណត់ព្រំខ្លះ ចាំបាច់ត្រូវធ្វើការកំណត់ព្រំ ដែលនៅសេសសល់តាមនីតិវិធី ។ ម្យ៉ាងទៀត ត្រូវស្រង់យកចំណែកពាក់ព័ន្ធនឹងការចុះបញ្ជីបំពេញបន្ថែមនេះពីប្លង់សុរិយោដីដែលជាលទ្ធផលនៃការចុះបញ្ជីមានលក្ខណៈជាប្រព័ន្ធលើកមុន មកគូសបំពេញព្រំប្រទល់ដែលទើបកំណត់ក្រោយ ហើយដាក់លេខក្បាលដី តពីលេខលើកមុន ។

ក្រោយពីរៀបចំសំណុំឯកសារគ្រប់គ្រាន់ ត្រូវបិទផ្សាយជាសាធារណៈនូវទិន្នន័យដែលប្រមូលបានក្នុងរយៈពេល៣០ថ្ងៃ នៅសាលាសង្កាត់ និងនៅការិយាល័យរៀបចំដែនដី នគរូបនីយកម្ម សំណង់ និងភូមិបាល ស្រុក/ខណ្ឌ ។ រាល់ការជំទាស់ ឬតវ៉ា ត្រូវធ្វើនៅការិយាល័យភូមិបាលស្រុក ខណ្ឌ ។ ការកែតម្រូវអាចធ្វើបានតាមសមត្ថកិច្ច និងគោលការណ៍ដែលបានកំណត់ដោយអនុក្រឹត្យពាក់ព័ន្ធ ។ បន្ទាប់មក ការិយាល័យភូមិបាល ត្រូវធ្វើរបាយការណ៍បូកសរុប ផ្ដល់យោបល់ និងសំណុំរឿងមកអភិបាលស្រុក ខណ្ឌ ដើម្បីសុំយោបល់ ហើយបញ្ជូនបន្តមកមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ត ក្រុង ពិនិត្យបន្ថែមលើលក្ខណៈបច្ចេកទេស រួចទើបបញ្ជូនទៅសាលាខេត្ត រាជធានី សុំយោបល់សម្រេច ។

នៅពេលអភិបាលខេត្ត ក្រុង យល់ព្រមហើយ សំណុំឯកសារនៃការវិនិច្ឆ័យត្រូវបញ្ជូនមកមន្ទីររៀបចំដែនដី នគរូបនីយកម្ម សំណង់ និងសុរិយោដីវិញ ដើម្បីធ្វើការចុះបញ្ជីក្នុងសៀវភៅគោលបញ្ជីដីធ្លីនៅក្នុងDigital File ហើយបោះពុម្ពប័ណ្ណ ចុះហត្ថលេខា រួចប្រគល់ជូនអ្នកស្នើសុំ ។ ករណីអភិបាលខេត្ត ក្រុង មិនយល់ព្រម ឬច្រានចោល ត្រូវបញ្ជាក់ឱ្យច្បាស់អំពីមូលហេតុដែលមិនយល់ព្រម ឬច្រានចោលនោះ ដើម្បីឆ្លើយតបទៅអ្នកស្នើសុំវិញ និងទុកជាឯកសារ ។

លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានលើកឡើងថា តាមរយៈបទពិសោធន៍របស់លោកជាច្រើនឆ្នាំ ការចុះបញ្ជីដីធ្លីបំពេញបន្ថែម ក៏ដូចជាកំណែទម្រង់ដីធ្លី ក្នុងក្របខណ្ឌទូទាំងប្រទេស នឹងធ្វើឱ្យមានភាពល្អប្រសើរ ងាយស្រួលក្នុងការរៀបចំនគរូបនីយកម្ម កាត់បន្ថយវិវាទ កាត់បន្ថយទំនាស់ដីធ្លីដែលតែងកើតមានឡើងដូចពេលកន្លងទៅជាមិនខាន និងមានប្រសិទ្ធភាពខ្ពស់ ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។