អតីតព្រលានយន្តហោះអន្តរជាតិ-ភ្នំពេញ នឹងបើកឱ្យសាធារណជនចូលលេងកម្សាន្តរយៈពេល៩ថ្ងៃ អំឡុងបុណ្យចូលឆ្នាំខ្មែរ

ភ្នំពេញ ៖ អតីតអាកាសយានដ្ឋានអន្តរជាតិភ្នំពេញ ឬព្រលានយន្តហោះពោធិ៍ចិនតុង ដែលរាជរដ្ឋាភិបាលអភិវឌ្ឍន៍ធ្វើជាសួនសាធារណៈ នឹងត្រូវបើកសាកល្បងឱ្យសាធារណជនចូលទស្សនាកម្សាន្ត ហាត់ប្រាណ និងលេងកីឡា ដោយឥតគិតថ្លៃរយៈពេល០៩ថ្ងៃ គឺចាប់ពីថ្ងៃទី១១ ដល់ថ្ងៃទី១៩ ខែមេសា ឆ្នាំ២០២៦ ។

បើតាមសេចក្ដីជូនដំណឹងរបស់ក្រុមការងារអន្តរក្រសួង ដើម្បីសិក្សាអំពីការគ្រប់គ្រង និងប្រើប្រាស់អាកាសយានដ្ឋានអន្តរជាតិភ្នំពេញ (ចាស់) បានឱ្យដឹងថា ក្នុងគោលបំណងចូលរួមអបអរសាទរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងដើម្បីឱ្យសាធារណជនឃើញច្បាស់ពីស្ថាបត្យកម្មនៃអាកាសយានដ្ឋានអន្តរជាតិភ្នំពេញ ដែលមានតម្លៃជាប្រវត្តិសាស្ត្រ សាធារណជនអាចចូលទស្សនា កម្សាន្ត ហាត់ប្រាណ និងលេងកីឡា ដោយឥតគិតថ្លៃ ចាប់ពីថ្ងៃទី១១ ដល់ថ្ងៃទី១៩ ខែមេសា ២០២៦ ចាប់ពីម៉ោង៥ព្រឹក ដល់ម៉ោង៩យប់ ។

សេចក្ដីជូនដំណឹងបានបន្តថា បងប្អូនប្រជាពលរដ្ឋអាចចូលទស្សនាជុំវិញតំបន់ និងអគារជាច្រើន ក្នុងនោះរួមមាន អគារផ្លិត និងប៉មបញ្ជាហោះហើរ (Tower) ដែលត្រូវបានកសាងឡើងនៅក្នុងអំឡុងទសវត្សរ៍ឆ្នាំ១៩៥០ តំបន់ជុំវិញបរិវេណអគារចេញ-ចូលអ្នកដំណើរវីអាយភី ( VIP) ចំណតយន្តហោះស៊ីវិល និងតំបន់ផ្លូវរត់របស់យន្តហោះជាដើម ដែលសុទ្ធសឹងតែជាតំបន់ និងទីតាំងប្រវត្តិសាស្ត្រនៃវិស័យអាកាសចរស៊ីវិលកម្ពុជា ។ បន្ថែមពីលើនេះ រាជរដ្ឋាភិបាលក៏បានតុបតែងលម្អនៅតំបន់មួយចំនួន និងការដាក់បដាផ្សេងៗ ដែលមានរូបភាពជាល្បែងប្រពៃណីជាតិ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរសម្រាប់ឆ្នាំ២០២៦ ក្នុងបរិវេណព្រលានយន្តហោះនេះផងដែរ ។

អ្នកជំនាញនៃវិស័យអចលនទ្រព្យបានលើកឡើងកន្លងមកថា ការដែលទុកទីតាំងព្រលានយន្តហោះភ្នំពេញចោលមិនធ្វើអ្វី នឹងធ្វើឱ្យតំបន់ជុំវិញនោះលែងមានភាពទាក់ទាញ ទាំងការវិនិយោគ និងការធ្វើអាជីវកម្ម ។ ប៉ុន្តែបើសិនជារដ្ឋាភិបាលអភិវឌ្ឍន៍ទីតាំងអតីតព្រលានយន្តហោះអន្តរជាតិមួយនេះទៅជាសួនកម្សាន្ត តំបន់ពាណិជ្ជកម្មវិញនោះ នឹងធ្វើឱ្យតំបន់ជុំវិញនៅតែមានភាពទាក់ទាញ ហើយកាន់តែមានសក្ដានុពល ។

លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា បើសិនជាទីតាំងអតីតព្រលានយន្តហោះអន្តរជាតិភ្នំពេញ ត្រូវបានកែច្នៃឱ្យមានសកម្មភាព នឹងធ្វើឱ្យតំបន់ជុំវិញនោះជាពិសេសអាជីវកម្មនៅតាមបណ្ដោយផ្លូវសហព័ន្ធរុស្ស៊ីទល់មុខនឹងអាកាសយានដ្ឋានកាន់តែមានភាពរស់រវើក និងអាចផ្ដល់ជាចំណូលដល់ពលរដ្ឋនៅទីនោះ ។ ប៉ុន្តែបើសិនជាទុកវាចោលវិញ អតីតព្រលានយន្តហោះភ្នំពេញនឹងក្លាយជាទីតាំងដែលគេទៅហួសមកហួស ។

លោកបន្តថា ទីតាំងជុំវិញតំបន់អាកាសយានដ្ឋានអន្តរជាតិភ្នំពេញ ( ចាស់ )នេះ នឹងកាន់តែមានសក្ដានុពល ពីព្រោះ ទីតាំងនោះអាចសង់អគារបានខ្ពស់ជាងមុន ដោយមិនជាប់បំរាម ឬប៉ះពាល់ដល់ផ្លូវហោះឡើង-ចុះចតរបស់យន្តហោះ ខណៈផ្លូវសហព័ន្ធរុស្ស៊ីក៏ជាផ្លូវសំខាន់មួយសម្រាប់ចេញ និងចូលរាជធានីភ្នំពេញ ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។