FBI ទម្លាយថា ក្រុម Hacker គាំទ្រដោយកូរ៉េខាងជើង ប្រើល្បិច call Video ក្លែងក្លាយ លួចលុយគ្រីបតូជាង ៤០០ លានដុល្លារពីជនរងគ្រោះជាង ៩០០ នាក់ | APSARA MEDIA SERVICES

បណ្ដាញផ្សព្វផ្សាយយើងខ្ញុំផ្សេងទៀត

EconomyEducationSportsInfotainmentAMS TravelKhmer CivilizationPolitico 360 Dark ModeAMS ONE-MINUTEកម្ពុជាមាតុភូមិខ្ញុំសច្ចធម៌ប្រវត្តិសាស្ត្រAPSARA TV 11សម្លេងយុវជនសម្លេងមាតុភូមិ
APSARA Media Services Light Logo
FBI ទម្លាយថា ក្រុម Hacker គាំទ្រដោយកូរ៉េខាងជើង ប្រើល្បិច call Video ក្លែងក្លាយ លួចលុយគ្រីបតូជាង ៤០០ លានដុល្លារពីជនរងគ្រោះជាង ៩០០ នាក់

FBI ទម្លាយថា ក្រុម Hacker គាំទ្រដោយកូរ៉េខាងជើង ប្រើល្បិច call Video ក្លែងក្លាយ លួចលុយគ្រីបតូជាង ៤០០ លានដុល្លារពីជនរងគ្រោះជាង ៩០០ នាក់

បរទេស ៖ ការិយាល័យស៊ើបអង្កេតសហព័ន្ធអាម៉េរិក (FBI) បានរាយការណ៍ថា ក្រុម Hacker ដែលគាំទ្រដោយរដ្ឋាភិបាលកូរ៉េខាងជើង លួចយករូបិយប័ណ្ណគ្រីបតូ ដែលគិតជាទឹកប្រាក់ជាង ៤០០ លានដុល្លារ ពីជនរងគ្រោះជាង ៩០០ នាក់ ក្នុងរយៈពេល ១៨ ខែកន្លងមក នេះបើយោងតាមការចុះផ្សាយរបស់ BBC។

នាយកផ្នែកសន្តិសុខតាមប្រព័ន្ធអ៊ីនធឺណិតរបស់ FBI លោក Brett Leatherman លើកឡើងថា របបកូរ៉េខាងជើងពឹងផ្អែកលើប្រាក់ចំណូលពីការលួចរូបិយប័ណ្ណគ្រីបតូរាប់ពាន់លានដុល្លារ ដើម្បីយកទៅផ្គត់ផ្គង់ការផលិតអាវុធខុសច្បាប់របស់ខ្លួនក្នុងរយៈពេលប៉ុន្មានឆ្នាំចុងក្រោយនេះ។ សេចក្តីរាយការណ៍នេះកើតឡើងតែមួយសប្តាហ៍ប៉ុណ្ណោះ បន្ទាប់ពីក្រុមហ៊ុនជួញដូររូបិយប័ណ្ណគ្រីបតូធំជាងគេបំផុតលើពិភពលោក Binance ទម្លាយឱ្យដឹងថា ក្រុម Hacker បានប្រើប្រាស់កិច្ចសម្ភាសន៍ការងារក្លែងក្លាយ ដើម្បីលួចប្រាក់ក្នុងកំណត់ត្រាខ្ពស់បំផុតរហូតដល់ ៦,៣ ពាន់លានដុល្លារពីក្រុមហ៊ុន។ ភ្នាក់ងារអនុវត្តច្បាប់របស់អាមេរិកសន្មត់ថា ការលួចចូលប្រព័ន្ធក្រុមហ៊ុន Binance ដែលត្រូវបានចាត់ទុកថាជាការលួចរូបិយប័ណ្ណគ្រីបតូដ៏ធំបំផុតមិនធ្លាប់មាននេះ គឺជាស្នាដៃរបស់ក្រុមដែលមានទំនាក់ទំនងជាមួយកូរ៉េខាងជើង។ យ៉ាងណាមិញ ទីក្រុងព្យុងយ៉ាងបានបដិសេធការចោទប្រកាន់នេះ។

យោងតាម FBI និងក្រសួងយុត្តិធម៌អាមេរិក បានឱ្យដឹងថា គម្រោងឆបោកចុងក្រោយបង្អស់ដែលមានឈ្មោះថា «FaceStealer» បានដាក់គោលដៅវាយប្រហារទៅលើអ្នកធ្វើការនៅក្នុងវិស័យគ្រីបតូ និងវិស័យ Web3 ជាពិសេសគឺអ្នកដែលពាក់ព័ន្ធនឹងការអភិវឌ្ឍ និងការថែទាំកម្មវិធីកូដចំហ។ ក្រុម Hacker នេះប្រើប្រាស់គណនីបណ្ដាញសង្គមក្លែងក្លាយ ឬគណនីដែលលួចបានសម្រេច ដើម្បីអញ្ជើញជនរងគ្រោះដែលជាគោលដៅឱ្យចូលរួមក្នុងការខលជាវីដេអូ តាមរយៈកម្មវិធីក្លែងបន្លំរបស់ Zoom, Microsoft Teams និង Google Meet។ បន្ទាប់មក ក្រុម Hacker ចាក់វីដេអូដែលបានថតទុករបស់ជនរងគ្រោះមុនៗដែលស្គាល់គ្នាជាមួយជនរងគ្រោះថ្មី ដើម្បីបន្លំធ្វើឱ្យមើលទៅដូចជាការហៅទូរស័ព្ទពិតប្រាកដ ប៉ុន្តែពួកគេនឹងធ្វើពុតជាមានបញ្ហាដាច់សំឡេង។ ភ្លាមៗនោះ ផ្ទាំងសារមួយនឹងលោតឡើងនៅលើអេក្រង់របស់ជនរងគ្រោះ ដោយស្នើសុំឱ្យពួកគេ «ជួសជុល (Fix)» បញ្ហាសំឡេងនោះតាមរយៈការចុចលើ Link មួយ។ ការចុចនេះ នឹងទាញយកមេរោគចូលទៅក្នុងឧបករណ៍របស់ជនរងគ្រោះ ដែលអនុញ្ញាតឱ្យក្រុម Hacker អាចចូលប្រើប្រាស់ទិន្នន័យ បញ្ជីទំនាក់ទំនង និងកម្មវិធីនានា ព្រមទាំងលួចថតវីដេអូខលទាំងនេះដោយសម្ងាត់ ដើម្បីយកទៅប្រើប្រាស់ជាឧបករណ៍សម្រាប់បោកប្រាស់ជនរងគ្រោះថ្មីៗបន្តទៀត។

FBI ពណ៌នាអំពី FaceStealer ថា ជាគម្រោងបោកបញ្ឆោតបែបចិត្តសាស្ត្រដ៏មានប្រសិទ្ធភាពខ្ពស់ ដែលមានសមត្ថភាពបំភាន់ភ្នែកសូម្បីតែអ្នកប្រើប្រាស់កុំព្យូទ័រដែលមានបទពិសោធន៍ផ្នែកបច្ចេកទេសខ្ពស់ ក៏ត្រូវមានការប្រុងប្រយ័ត្នបំផុតដែរចំពោះសន្តិសុខ៕

កញ្ញា យឿន ពុធធីតា | Ms. Yoeun Puththyda

កញ្ញា យឿន ពុធធីតា | Ms. Yoeun Puththyda

អ្នកសារព័ត៌មានអន្តរជាតិ និងបានបញ្ចប់ការសិក្សាថ្នាក់បរិញ្ញាបត្រផ្នែកសេដ្ឋកិច្ចអន្តរជាតិពីវិទ្យាស្ថានសិក្សាអន្តរជាតិ និងគោលនយោបាយសាធារណៈ (IISPP)

ឆ្នាំ២០២៥ © រក្សាសិទ្ធិគ្រប់យ៉ាងដោយ៖ អគ្គនាយកដ្ឋានវិទ្យុ និងទូរទស្សន៍អប្សរា