ប្រមុខ UN ជំរុញឱ្យបង្កើនការវិនិយោគលើសន្តិភាពក្នុងកិច្ចប្រជុំកំពូលហ្វ្រង់កូហ្វូនីនៅ កម្ពុជា | APSARA MEDIA SERVICES

បណ្ដាញផ្សព្វផ្សាយយើងខ្ញុំផ្សេងទៀត

EconomyEducationSportsInfotainmentAMS TravelKhmer CivilizationPolitico 360 Dark ModeAMS ONE-MINUTEកម្ពុជាមាតុភូមិខ្ញុំសច្ចធម៌ប្រវត្តិសាស្ត្រAPSARA TV 11សម្លេងយុវជនសម្លេងមាតុភូមិ
APSARA Media Services Light Logo
ប្រមុខ UN ជំរុញឱ្យបង្កើនការវិនិយោគលើសន្តិភាពក្នុងកិច្ចប្រជុំកំពូលហ្វ្រង់កូហ្វូនីនៅ កម្ពុជា

ប្រមុខ UN ជំរុញឱ្យបង្កើនការវិនិយោគលើសន្តិភាពក្នុងកិច្ចប្រជុំកំពូលហ្វ្រង់កូហ្វូនីនៅ កម្ពុជា

ភ្នំពេញ ៖ ការបង្កើនការវិនិយោគលើសន្តិភាព ពិសេសគោរពតាមច្បាប់អន្តរជាតិ និងប្រព័ន្ធអន្តរជាតិ នឹងធ្វើឱ្យប្លុកហ្វ្រង់កូហ្វូនី ក្លាយជាកន្លែងរស់នៅកាន់តែប្រសើរឡើង នេះបើតាមការអះអាងរបស់អគ្គលេខាធិការអង្គការសហប្រជាជាតិ លោក António Guterres កាលពីថ្ងៃ អាទិត្យ ក្នុងពិធីបើកកិច្ចប្រជុំកំពូលហ្រ្វង់កូហ្វូនីលើកទី២០ នៅកម្ពុជា ។

ក្នុងនាមជាអគ្គលេខាធិការយូអិន មុនពេលចាកចេញពីតំណែង តាមរយៈសារជាវីដេអូទៅកាន់មេដឹកនាំហ្វ្រង់កូហ្វូនី លោក Guterres បានបញ្ជាក់ថា ៖ «ដូចដែលប្រធានបទលបានរៀបចំឡើង សន្តិភាព គឺជាការវិនិយោគដ៏ល្អបំផុត ដែលគួរតែយកចិត្តទុកដាក់វិនិយោគ»។

ក្រៅពីអំពាវនាវឱ្យបង្កើនការវិនិយោគលើសន្តិភាព លោក Guterres ក៏បានសង្កត់ធ្ងន់លើសារៈសំខាន់នៃការចូលរួមរបស់ស្ត្រី និងយុវជន ក្នុងដំណើរការធ្វើសេចក្តីសម្រេចចិត្ត ព្រមទាំងការពង្រឹងពហុភាគីនិយម ដើម្បីដោះស្រាយបញ្ហាប្រឈមរួមរបស់ពិភពលោក ។

តាមសារព័ត៌មានរវ៉ាន់ដា Taarifa ប្រមុខអង្គការសហប្រជាជាតិរូបនេះ បានព្រមានថា បច្ចុប្បន្ន ការចំណាយលើវិស័យយោធានៅទូទាំងពិភពលោក មានទំហំធំជាងជំនួយសម្រាប់ការអភិវឌ្ឍរហូតដល់ ១៣ ដង ។

លោក Guterres បានបញ្ជាក់ថា ពិភពលោកកំពុងបង្កើនការបញ្ជាទិញអាវុធក្នុងទំហំទឹកប្រាក់ដ៏ច្រើនសម្បើម រីឯការវិនិយោគលើសន្តិភាពវិញ ទទួលបានការយកចិត្តទុកដាក់ និងការគាំទ្រកាន់តែតិចតួចទៅៗ ខណៈប្រទេសជាច្រើនក៏កំពុងប្រឈមមុខនឹងសម្ពាធផងដែរ ដោយត្រូវជ្រើសរើសរវាងការសងបំណុល និងការផ្តល់សេវាបម្រើដល់ប្រជាជនរបស់ខ្លួន ។

ឆ្លើយតបបញ្ហានេះ លោក Guterres បានអះអាងថា ការវិនិយោគឡើងវិញលើសន្តិភាព មានន័យថា ការគាំទ្រការទូត ការគោរពច្បាប់អន្តរជាតិ និងការចែករំលែកវិបុលភាពឱ្យបានទូលំទូលាយ ។

លោកថា ៖ «ការពង្រឹងប្រព័ន្ធពហុភាគីនិយម គួរតែចាប់ផ្តើមពីការផ្តល់អាសនៈអចិន្ត្រៃយ៍ដល់ទ្វីបអាហ្វ្រិក ក្នុងក្រុមប្រឹក្សាសន្តិសុខអង្គការសហប្រជាជាតិ និងការកសាងប្រព័ន្ធហិរញ្ញវត្ថុអន្តរជាតិមួយដែលមានភាពយុត្តិធម៌»។

ចុងបញ្ចប់នៃសាររបស់លោក Guterres បានគូសបញ្ជាក់ពីតួនាទីរបស់សហគមន៍ហ្វ្រង់កូហ្វូនី ក្នុងការកសាងទំនុកចិត្ត និងសន្តិភាព ដោយលោកបានចាត់ទុកភាសារួមថា ជាដើមទុនដ៏សំខាន់សម្រាប់បង្កើតទំនុកចិត្តរវាងប្រទេស និងប្រជាជន ហើយក្នុងនាមជាអគ្គលេខាធិការអង្គការសហប្រជាជាតិ លោកបានវាយតម្លៃខ្ពស់ចំពោះភាពជាដៃគូរបស់អង្គការអន្តរជាតិមួយនេះ ក្នុងការជំរុញសន្តិភាព ការអភិវឌ្ឍប្រកបដោយចីរភាព សិទ្ធិមនុស្ស និងពហុភាសានិយម ៕ ប្រភព ៖ Taarifa ប្រែសម្រួល ៖ ឈឹម ទីណា

លោក អ៊ា សុវណ្ណារ៉ា | Mr. Ea Sovannara

លោក អ៊ា សុវណ្ណារ៉ា | Mr. Ea Sovannara

ជីវប្រវត្តិ: លោកមានបទពិសោធន៍ជាង ១០ឆ្នាំក្នុងប្រព័ន្ធផ្សព្វផ្សាយផ្នែកសេដ្ឋកិច្ច អប់រំ សង្គម និងកម្សាន្ត។ បច្ចុប្បន្នលោកជាការីនិពន្ធនៃសារព័ត៌មាន AMS Economy។

ឆ្នាំ២០២៥ © រក្សាសិទ្ធិគ្រប់យ៉ាងដោយ៖ អគ្គនាយកដ្ឋានវិទ្យុ និងទូរទស្សន៍អប្សរា