ក្នុង​ឱកាសថ្លែងសន្ទរកថា ផ្ដោតលើប្រធានបទ «យើងឃើញ យើងយកចិត្តទុកដាក់ យើងរួមគ្នាធ្វើសកម្មភាព» ក្នុងកិច្ចប្រជុំពេញអង្គ នៃសហគមន៍ OB-PS នាថ្ងៃទី១៧ ខែមិថុនា ឆ្នាំ២០២៦ នៅសណ្ឋាគារសុខា ក្នុងខេត្តសៀមរាប លោកជំទាវ ឌិត នីតា ប្រធានក្រុមប្រឹក្សាខេត្ត នៃសមាគមកាយប្ញទ្ធិនារីកម្ពុជា សាខាខេត្តកំពត និងជាអនុប្រធានសមាគមមីក្រូហិរញ្ញវត្ថុកម្ពុជា មានប្រសាសន៍ថា ក្មេងស្រីម្នាក់ដែលទទួលបានការយកចិត្តទុកដាក់យ៉ាងពិតប្រាកដ នឹងក្លាយជាកីត្បាញសម្រាប់មនុស្សពេញមួយជំនាន់។

លោកជំទាវ ឌិត នីតា បានសម្តែងនូវក្តីរំភើបយ៉ាងក្រៃលែង ដែលបានទទួលកិត្តិយសថ្លែងសុន្ទរកថាថ្វាយចំពោះព្រះរាជបុត្រី ម្ចាស់ក្សត្រី និងភ្ញៀវកិត្តិយសទាំងអស់មកពី ២៤ប្រទេស ដែលបានលះបង់ពេលវេលា និងកម្លាំងកាយចិត្តដើម្បីគាំទ្រគំនិតដ៏ស្ងប់ស្ងាត់មួយ ប៉ុន្តែមានឥទ្ធិពលខ្លាំងក្លាថា «ក្មេងស្រីគ្រប់រូប នៅគ្រប់ទីកន្លែងក្នុងពិភពលោក គឺសុទ្ធតែមានតម្លៃស័ក្តិសមនឹងទទួលបានពេលវេលា ការយកចិត្តទុកដាក់ និងការវិនិយោគរបស់យើង»។

ប្រធានក្រុមប្រឹក្សាខេត្ត នៃសមាគមកាយប្ញទ្ធិនារីកម្ពុជា សាខាខេត្តកំពត លើកឡើងថា បើពិនិត្យមើលដៃរបស់អ្នកតម្បាញឱ្យជិត នឹងឃើញរឿងបីយ៉ាង គឺដំបូង នាង «ឃើញ» ៖ នាងត្រូវតែស្វែងរកសរសៃស្រឡាយ ជ្រើសរើសវា និងយល់ពីវា។ បន្ទាប់មក នាង «យកចិត្តទុកដាក់» ៖ នាងភ្ជាប់វាទៅនឹងសរសៃស្រឡាយផ្សេងទៀត ដោយជំនាញ និងការអត់ធ្មត់។ នេះគឺជាសិល្បៈសិប្បកម្ម និងជាការងារដ៏ហ្មត់ចត់។ ហើយបន្ទាប់មកទៀត នាង «ធ្វើសកម្មភាព» ៖ ដៃរបស់នាងបោះត្រឡុក កីត្បាញដំណើរការ ហើយផ្ទាំងក្រណាត់ក៏រីកធំឡើង។

លោកជំទាវ ឌិត នីតា បន្ថែមថា «យើងឃើញ យើងយកចិត្តទុកដាក់ យើងរួមគ្នាធ្វើសកម្មភាព» មិនមែនជាគំនិតបីដាច់ដោយឡែកពីគ្នានោះទេ គឺជាចលនាបីនៃដៃតែមួយគូ។ ហើយចលនាកណ្តាល គឺការយកចិត្តទុកដាក់។ លោកជំទាវ បន្តថា ការមើលឃើញ ដោយគ្មានការយកចិត្តទុកដាក់ គឺគ្រាន់តែជាការអាណិតអាសូរប៉ុណ្ណោះ ហើយការធ្វើសកម្មភាព ដោយគ្មានការយកចិត្តទុកដាក់ គឺគ្រាន់តែជាសំឡេងរំខាន។ ការយកចិត្តទុកដាក់ គឺជាអ្វីដែលភ្ជាប់រឿងទាំងពីរផ្សេងទៀតចូលគ្នា។ យកចិត្តទុកដាក់ មិនមែនគ្រាន់តែជាអារម្មណ៍នោះទេ វាគឺជាសិប្បកម្មដែលតម្រូវឱ្យយើងរៀន អនុវត្ត និងអត់ធ្មត់ រហូតដល់ដៃរបស់យើងស្គាល់ការងារនេះច្បាស់ ទោះបីជាយើងហត់នឿយក៏ដោយ។

«ឥឡូវនេះ នាងខ្ញុំកំពុងទទួលសរសៃស្រឡាយពីលោកជំទាវអគ្គស្នងការ ប៉ុន្តែការកាន់សរសៃស្រឡាយ គឺគ្រាន់តែជាការចាប់ផ្តើមប៉ុណ្ណោះ យើងត្រូវតែធ្វើសកម្មភាព។ យើងត្រូវតែលះបង់ខ្លួន ដើម្បីក្លាយជាអ្នកដែលមើលឃើញ អ្នកដែលយកចិត្តទុកដាក់ និងអ្នកដែលត្បាញផ្ទាំងក្រណាត់ដ៏ល្អប្រសើរនៃសហគមន៍របស់យើង»

ប្រធានក្រុមប្រឹក្សាខេត្ត នៃសមាគមកាយប្ញទ្ធិនារីកម្ពុជា សាខាខេត្តកំពត បញ្ជាក់ថា ការមើលឃើញក្មេងស្រីម្នាក់ គឺគ្រាន់តែជាការចាប់ផ្តើមប៉ុណ្ណោះ ហើយការដាក់សរសៃស្រឡាយនៅក្នុងដៃរបស់នាង គឺគ្រាន់តែជាការចាប់ផ្តើម ប៉ុន្តែការចាប់ផ្តើមមិនមែនជាទីបញ្ចប់នោះទេ ព្រោះថា សរសៃស្រឡាយមួយសរសៃ ដោយខ្លួនវាផ្ទាល់ វាមិនទាន់ក្លាយជាផ្ទាំងក្រណាត់នៅឡើយទេ នាងត្រូវតែចាប់ផ្តើមត្បាញ។ ដូច្នេះ សូមផ្តល់សរសៃស្រឡាយ ឱកាស ការអប់រំ និងឧបករណ៍ហិរញ្ញវត្ថុដល់ពួកគេ ហើយសូមកុំបញ្ឈប់ត្រឹមនោះ។ លើសពីនេះ សូមផ្តល់រឿងទីពីរដល់ពួកគេផងដែរ នោះគឺទំនុកចិត្តក្នុងការនាំយកវាឈានជើងចេញផុតពីមាត់ទ្វារផ្ទះ និងសូមធ្វើជាបន្ទប់មួយដែលឱនផ្អៀងខ្លួនមកស្តាប់សំឡេងរបស់នាង។

លោកជំទាវ បានលើកឡើងពីគំរូដឹកនាំរបស់ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការនៃសមាគមកាយប្ញទ្ធិនារីកម្ពុជា ដែលបានដឹកនាំសមាជិកសកម្ម និងសមាជិកគាំទ្ររាប់លាននាក់ ដោយក្តីយកចិត្តទុកដាក់ និងបានផ្លាស់ប្តូរជីវិតក្មេងស្រីជាច្រើនដូចជា កញ្ញា រីតា ដែលទទួលបានអាហារូបករណ៍ទៅសិក្សានៅប្រទេសអូស្ត្រាលី និងកញ្ញា ស្រីពុំ ដែលបានក្លាយជាអ្នកដឹកនាំវ័យក្មេង។ «នាងខ្ញុំធ្លាប់ជាក្មេងស្រីស្ងប់ស្ងាត់ម្នាក់ដែលត្រូវការនរណាម្នាក់មើលឃើញ។ ថ្ងៃនេះ តាមរយៈសមាគមមីក្រូហិរញ្ញវត្ថុកម្ពុជា និងសមាគមកាយប្ញទ្ធិនារីកម្ពុជា នាងខ្ញុំព្យាយាមធ្វើជាមនុស្សម្នាក់នោះសម្រាប់ជំនាន់ក្រោយ ដើម្បីកត់សម្គាល់ពីភាពរឹងមាំរបស់ពួកគេ មុនពេលពួកគេមើលឃើញវាដោយខ្លួនឯង»៕