បេក្ខជនបាក់ឌុបត្រៀមខ្លួនជ្រើសរើសជំនាញសិក្សាបន្ត ខណៈអ្នកឃ្លាំមើលសង្គមស្នើឱ្យជ្រើសរើសតាមឧបនិស្ស័យ និងសមត្ថភាព

ក្រសួងអប់រំ យុវជន និងកីឡា គ្រោងនឹងប្រកាសលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ នៅថ្ងៃទី២ ខែកញ្ញា ខាងមុខ, កំឡុងរង់ចាំលទ្ធផលនេះ បេក្ខជនខ្លះបានគិតគូររួចហើយចំពោះជំនាញដែលពួកគេនឹងត្រូវបន្តការសិក្សា ប៉ុន្តែខ្លះទៀតក៏កំពុងតែពិចារណានៅឡើយ។

យុវសិស្ស ឈុំ ប៊ុនឈា ដែលទើបប្រឡងបាក់ឌុបរួច បាននិយាយថា ខ្លួននឹងជ្រើសរើសជំនាញវេជ្ជសាស្ត្រ ព្រោះជាជំនាញដែលខ្លួនស្រលាញ់តាំងពីតូច។ ដើម្បីត្រៀមខ្លួនសម្រាប់ការសិក្សាផ្នែកនេះ យុវសិស្ស ប៊ុនឈា បានខិតខំរៀនផ្នែកវិទ្យាសាស្ត្រ ជាពិសេសមុខវិជ្ជាគណិតវិទ្យា ជីវវិទ្យា និងគីមីវិទ្យា។ ចំណែកយុវតី ព្រីម ពេជ្ររ៉ានី វិញថា ខ្លួននឹងជ្រើសរើសជំនាញបច្ចេកទេសផ្នែកអគ្គិសនី ដោយសាររំពឹងថា ជំនាញនេះអាចជួយឱ្យនាងឆាប់ទទួលបានការងារ និងមានតម្រូវការខ្ពស់នៅលើទីផ្សារការងារ។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា លើកទឹកចិត្តឱ្យយុវសិស្សបន្តការសិក្សា ដោយជ្រើសរើសជំនាញឱ្យស្របតាមឧបនិស្ស័យ និងសមត្ថភាពរបស់ខ្លួន។ តែជាមួយគ្នានេះ លោកក៏បានរំលេចពីសារៈសំខាន់នៃការសិក្សាជំនាញវិជ្ជាជីវៈ ដោយថា ក្រោយបញ្ចប់ការបណ្តុះបណ្តាល យុវជន និងសាធារណជនទូទៅ អាចមានភាពងាយស្រួលក្នុងការទទួលបានការងារ និងមានឱកាសបង្កើតការងារដោយខ្លួនឯង។

យោងតាមឯកសារ «ទស្សនវិស័យមុខរបរ និងការងារ - តម្រូវការជំនាញ និងការងារសម្រាប់យុវជន» ដែលទើបចេញផ្សាយកាលពីពេលថ្មីៗនេះ បានបង្ហាញថា តម្រូវការជំនាញនៅកម្ពុជាកំពុងមានភាពសម្បូរបែប និងផ្លាស់ប្តូរពីជំនាញផ្តោតលើផលិតកម្មក្នុងឧស្សាហកម្មដែលមានស្រាប់ និងឧស្សាហកម្មផលិតកម្មធុនស្រាល ទៅរកជំនាញបច្ចេកទេស ឌីជីថល បៃតង និងជំនាញដែលមានតម្លៃបន្ថែមខ្ពស់ជាងមុន។

ក្នុងនោះសម្រាប់រយៈពេលខ្លីពី ០ ដល់៣ឆ្នាំ តម្រូវការជំនាញត្រូវបានរំពឹងថា នឹងផ្តោតសំខាន់លើជំនាញកម្រិតខ្ពស់ និងមធ្យម រួមមាន គណនេយ្យ និងពន្ធដារ ការគ្រប់គ្រង និងរដ្ឋបាល ស្ថាបត្យកម្ម និងការរៀបចំទីក្រុង បច្ចេកវិទ្យាការពារបរិស្ថាន កម្មវិធីកុំព្យូទ័រ និងកម្មវិធីទូរស័ព្ទ ច្បាប់ ការកែច្នៃអាហារ វាយនភណ្ឌ ព្រមទាំងផលិតកម្មដំណាំ និងសត្វ។

សម្រាប់រយៈពេលមធ្យមពី ៣ ដល់៥ឆ្នាំ តម្រូវការទីផ្សារការងារត្រូវបានព្យាករថា នឹងផ្លាស់ប្តូរឆ្ពោះទៅរកជំនាញដែលតម្រង់ទិសឧស្សាហកម្ម និងបច្ចេកវិទ្យាកាន់តែច្រើន។ ជំនាញដែលមានសក្តានុពលរួមមាន បញ្ញាសិប្បនិម្មិត អេឡិចត្រូនិក និងស្វ័យប្រវត្តិកម្ម ការរចនា និងគ្រប់គ្រងមូលដ្ឋានទិន្នន័យ និងបណ្តាញ មេកានិក និងជាងលោហៈ អគ្គិសនី និងថាមពល បច្ចេកវិទ្យាវិនិច្ឆ័យរកកំហុស និងសុវត្ថិភាពការងារ។

ចំណែករយៈពេលវែងពី ៥ ដល់១០ឆ្នាំ ក្រសួងបានបង្ហាញថា តម្រូវការខ្ពស់នឹងផ្តោតលើជំនាញកម្រិតខ្ពស់ដែលពាក់ព័ន្ធនឹងឧស្សាហកម្មយុទ្ធសាស្ត្រ ដូចជា ការគ្រប់គ្រងសំណល់ វិស្វកម្មគីមី វិស្វកម្មមេកានិក បច្ចេកវិទ្យាមន្ទីរពិសោធន៍ បច្ចេកវិទ្យាការពារបរិស្ថាន និងស្វ័យប្រវត្តិកម្ម៕

លោកស្រី សែន ដាវិត | Mrs. Sen David

ជីវប្រវត្តិ ៖ លោកស្រី សែន ដាវិតបានបញ្ចប់ការសិក្សាផ្នែករដ្ឋបាលសាធារណៈ នៅសាកលវិទ្យាល័យភូមិន្ទនីតិសាស្រ្ដ និងវិទ្យាសាស្រ្ដសេដ្ឋកិច្ច។ លោកស្រីមានបទពិសោធន៍ជាអ្នកសារព័ត៌មាន ក្នុងផ្នែកបោះពុម្ព វិទ្យុ និងជាអ្នករាយការណ៍ព័ត៌មានទូរទស្សន៍។