នេប៉ាល់ចេញច្បាប់ថ្មី ៖ ហាមសាលារៀនបង្ខំសិស្សឱ្យកាត់សក់

រដ្ឋាភិបាលនេប៉ាល់បានអនុម័តវិសោធនកម្ម នៃបទប្បញ្ញត្តិអប់រំ ដោយដាក់ចេញវិធានការថ្មីហាមឃាត់សាលារៀនមិនឱ្យបង្ខំសិស្សកាត់សក់ ឬកាត់សក់ដោយគ្មានការយល់ព្រមពីសិស្ស។ វិធានការនេះមានគោលបំណងការពារសេចក្តីថ្លៃថ្នូរ សេរីភាពក្នុងការជ្រើសរើសផ្ទាល់ខ្លួន និងសុខុមាលភាពរបស់សិស្ស ព្រមទាំងលើកកម្ពស់បរិយាកាសសិក្សាដែលគោរពសិទ្ធិកុមារ។

យោងតាមសារព័ត៌មាន Nepal Journal ចេញផ្សាយកាលពីពេលថ្មីៗនេះថា បទប្បញ្ញត្តិថ្មីទទួលស្គាល់ថា ការបង្ខំសិស្សកាត់សក់ ឬកាត់សក់ដោយគ្មានការយល់ព្រម អាចបង្កផលប៉ះពាល់ដល់សុខភាពផ្លូវកាយ សុខភាពផ្លូវចិត្ត និងសុខុមាលភាពផ្លូវចិត្តសង្គមរបស់សិស្ស។ ដូច្នេះ សាលារៀនមិនអាចអនុវត្តវិធានការបែបនេះតទៅទៀតឡើយ។

បន្ថែមពីនេះ រដ្ឋាភិបាលនេប៉ាល់ក៏បានហាមឃាត់រាល់សកម្មភាពនៅក្នុងគ្រឹះស្ថានអប់រំដែលអាចបង្កផលប៉ះពាល់អវិជ្ជមានដល់សុខភាពផ្លូវកាយ ផ្លូវចិត្ត ឬសុខុមាលភាពផ្លូវចិត្តសង្គមរបស់សិស្ស។ គោលបំណង នៃវិធានការនេះ គឺធានាឱ្យសាលារៀនក្លាយជាបរិយាកាសសិក្សាប្រកបដោយសុវត្ថិភាព ការគោរព និងការគាំទ្រដល់ការអភិវឌ្ឍរបស់សិស្ស។

ក្រោមបទប្បញ្ញត្តិថ្មី សាលារៀនក៏ត្រូវបានហាមឃាត់មិនឱ្យប្រមាថ មាក់ងាយ ឬរើសអើងសិស្សដោយផ្អែកលើរូបរាង សម្លៀកបំពាក់ ម៉ូដសក់ ឬរបៀបតុបតែងខ្លួនផ្ទាល់ខ្លួន។ ជាមួយគ្នានេះដែរ សាលារៀនមិនអាចដាក់ទណ្ឌកម្មសិស្សដោយបង្ខំឱ្យឈរហាលថ្ងៃ ឬធ្វើឱ្យសិស្សអាម៉ាស់មុខជាសាធារណៈ ដោយសារការមិនទាន់បង់ថ្លៃសិក្សានោះទេ។

រដ្ឋាភិបាលនេប៉ាល់បានបញ្ជាក់ថា ការធ្វើវិសោធនកម្មបទប្បញ្ញត្តិអប់រំលើកនេះ គឺដើម្បីពង្រឹងការការពារសិទ្ធិ សេចក្តីថ្លៃថ្នូរ ការគោរពខ្លួនឯង និងសុខុមាលភាពរបស់សិស្ស ស្របតាមគោលការណ៍អប់រំដែលផ្តោតលើសិទ្ធិកុមារ ការមិនរើសអើង និងការគោរពភាពខុសគ្នារបស់បុគ្គល៕

លោកស្រី សែន ដាវិត | Mrs. Sen David

ជីវប្រវត្តិ ៖ លោកស្រី សែន ដាវិតបានបញ្ចប់ការសិក្សាផ្នែករដ្ឋបាលសាធារណៈ នៅសាកលវិទ្យាល័យភូមិន្ទនីតិសាស្រ្ដ និងវិទ្យាសាស្រ្ដសេដ្ឋកិច្ច។ លោកស្រីមានបទពិសោធន៍ជាអ្នកសារព័ត៌មាន ក្នុងផ្នែកបោះពុម្ព វិទ្យុ និងជាអ្នករាយការណ៍ព័ត៌មានទូរទស្សន៍។

នេប៉ាល់ចេញច្បាប់ថ្មី ៖ ហាមសាលារៀនបង្ខំសិស្ស​ឱ្យ​កាត់សក់

លោកស្រី សែន ដាវិត | Mrs. Sen David

នេប៉ាល់ចេញច្បាប់ថ្មី ៖ ហាមសាលារៀនបង្ខំសិស្សឱ្យកាត់សក់