ពិព័រណ៍ ICT បង្ហាញសិស្សកំពុងឈានទៅសម័យសរសេរកូដ និងបច្ចេកវិទ្យាឌីជីថលនៅកម្រិតមធ្យមសិក្សាបឋមភូមិនៅកម្ពុជា

ក្រសួងអប់រំ យុវជន និងកីឡា សហការជាមួយទីភ្នាក់ងារ KOICA ប្រចាំកម្ពុជា បានរៀបចំ «ពិព័រណ៍បច្ចេកវិទ្យាព័ត៌មាន និងគមនាគមន៍ (ICT Exhibition)» ដើម្បីបង្ហាញសមិទ្ធផលនៃការអភិវឌ្ឍការអប់រំឌីជីថល និងជំរុញជំនាញបច្ចេកវិទ្យាព័ត៌មាន និងការសរសេរកូដ (Coding) សម្រាប់សិស្ស និងគ្រូបង្រៀននៅកម្រិតមធ្យមសិក្សាបឋមភូមិ។

ពិធីនេះត្រូវបានរៀបចំឡើងនៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល ក្រោមអធិបតីភាពលោកជំទាវបណ្ឌិត ឃួន វិច្ឆិកា អគ្គនាយកនៃអគ្គនាយកដ្ឋានបណ្ដុះបណ្ដាល និងវិក្រឹតការ និងលោកស្រី Sejin Lee នាយករងប្រតិបត្តិនៃទីភ្នាក់ងារ KOICA ប្រចាំកម្ពុជា។

បើតាមក្រសួងអប់រំ ពិព័រណ៍នេះមានគោលបំណងបង្ហាញពីវឌ្ឍនភាពនៃការបង្រៀន និងការរៀនមុខវិជ្ជាបច្ចេកវិទ្យាព័ត៌មាន (ICT) ព្រមទាំងលើកទឹកចិត្តឱ្យគ្រូបង្រៀន និងសិស្សានុសិស្សអភិវឌ្ឍជំនាញឌីជីថល ដែលជាជំនាញចាំបាច់សម្រាប់ការសិក្សា ការងារ និងសេដ្ឋកិច្ចឌីជីថលនាពេលអនាគត។

លោក សុង សាវឿន គរុសិស្សនៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល បានប្រាប់ AMS ថា កម្មវិធីនេះមានអ្នកចូលរួមសរុប ១៦០នាក់ រួមមានគ្រូបង្រៀន ICT សិស្សមកពីសាលាគោលដៅចំនួន២០ និងគរុសិស្សមកពីមជ្ឈមណ្ឌលគរុកោសល្យភូមិភាគចំនួន៤។

លោកថា « ចំណុចសំខាន់នៃព្រឹត្តិការណ៍គឺការប្រកួតជំនាញឌីជីថលរវាងសិស្ស ដោយពួកគេត្រូវបង្ហាញសមត្ថភាពលើកម្មវិធី OpenOffice Writer, OpenOffice Calc និង Scratch ដែលជាកម្មវិធីសរសេរកូដសម្រាប់ការអប់រំ»។។

លោកបានបន្ថែមថា គ្រូបង្រៀនមុខវិជ្ជា ICT ក៏បានធ្វើបទបង្ហាញអំពីឧត្តមានុវត្តន៍ និងវិធីសាស្ត្របង្រៀនថ្មីៗ ដើម្បីចែករំលែកបទពិសោធន៍ និងលើកកម្ពស់គុណភាពនៃការបង្រៀនមុខវិជ្ជាបច្ចេកវិទ្យាព័ត៌មាន។

ពិព័រណ៍នេះបានប្រព្រឹត្តទៅពេញមួយថ្ងៃនៅបន្ទប់កុំព្យូទ័រ បណ្ណាល័យ និងសាលមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល ដោយមានការចូលរួមពីគ្រូ និងសិស្សមកពីសាលាគោលដៅចំនួន២០ ព្រមទាំងគរុសិស្សមកពីមជ្ឈមណ្ឌលគរុកោសល្យភូមិភាគនៅខេត្តកំពង់ចាម កណ្ដាល តាកែវ និងព្រៃវែង។

គួរបញ្ជាក់ថា គម្រោង «កសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជា» មានគោលបំណងលើកកម្ពស់គុណភាពការបង្រៀន និងការរៀនមុខវិជ្ជា ICT តាមរយៈការអភិវឌ្ឍកម្មវិធីសិក្សា សម្ភារបង្រៀន ការបណ្តុះបណ្តាលគ្រូ ការកែលម្អបរិយាកាសសិក្សា និងការពង្រឹងកម្មវិធីគាំទ្រការអប់រំឌីជីថល ដើម្បីឱ្យសិស្សកម្ពុជាទទួលបានជំនាញដែលស្របតាមតម្រូវការនៃសតវត្សទី២១ និងសេដ្ឋកិច្ចឌីជីថល៕

លោកស្រី សែន ដាវិត | Mrs. Sen David

ជីវប្រវត្តិ ៖ លោកស្រី សែន ដាវិតបានបញ្ចប់ការសិក្សាផ្នែករដ្ឋបាលសាធារណៈ នៅសាកលវិទ្យាល័យភូមិន្ទនីតិសាស្រ្ដ និងវិទ្យាសាស្រ្ដសេដ្ឋកិច្ច។ លោកស្រីមានបទពិសោធន៍ជាអ្នកសារព័ត៌មាន ក្នុងផ្នែកបោះពុម្ព វិទ្យុ និងជាអ្នករាយការណ៍ព័ត៌មានទូរទស្សន៍។