ក្រសួងអប់រំ ពង្រឹងវិធានការទប់ស្កាត់ជំងឺគ្រុនឈាមនៅសាលារៀន ខណៈកុមារជិត ១,៩០០នាក់ទទួលការព្យាបាលក្នុងមួយខែ

ក្រសួងអប់រំ យុវជន និងកីឡា កាលពីម្សិលមិញបានចេញសេចក្តីណែនាំឱ្យគ្រឹះស្ថានសិក្សាសាធារណៈ និងឯកជនទូទាំងប្រទេស ពង្រឹងការអនុវត្តវិធានការបង្ការ និងទប់ស្កាត់ជំងឺគ្រុនឈាម បន្ទាប់ពីករណីកុមារទទួលការព្យាបាលជំងឺនេះនៅមន្ទីរពេទ្យគន្ធបុប្ផា បានកើនដល់ ១,៨៩២នាក់ ក្នុងខែមិថុនា ឆ្នាំ២០២៦ ដែលឆ្លុះបញ្ចាំងពីការកើនឡើងនៃហានិភ័យក្នុងរដូវវស្សា។

សេចក្តីណែនាំរបស់ក្រសួងមានគោលបំណងជំរុញការអនុវត្តវិធានការបង្ការជំងឺគ្រុនឈាម កាត់បន្ថយ និងទប់ស្កាត់ការបង្កកំណើតសត្វមូសខ្លានៅតាមគ្រឹះស្ថានសិក្សា ព្រមទាំងគាំទ្រវិធានការអន្តរាគមន៍របស់ក្រសួងសុខាភិបាល ដើម្បីការពារសុខភាពសិស្សានុសិស្ស បុគ្គលិកអប់រំ និងសហគមន៍។

ក្រសួងបានណែនាំឱ្យមន្ទីរអប់រំ យុវជន និងកីឡា រាជធានី-ខេត្ត ការិយាល័យអប់រំក្រុង ស្រុក ខណ្ឌ គណៈគ្រប់គ្រងសាលារៀន លោកគ្រូ អ្នកគ្រូ និងសិស្សានុសិស្ស រួមគ្នាលុបបំបាត់ប្រភពបង្កកំណើតមូសខ្លា ដោយសម្អាតថ្លុកទឹក ទឹកដក់ និងសម្ភារៈដែលអាចផ្ទុកទឹកនៅក្នុង និងជុំវិញបរិវេណសាលារៀន។

បន្ថែមពីនេះ សាលារៀនត្រូវលាងសម្អាតពាង អាងទឹក ថូផ្កា ចានទ្រជើងតុ ក្រឡ ធុង និងសម្ភារៈផ្ទុកទឹកផ្សេងៗ យ៉ាងហោចណាស់ម្តងក្នុងមួយសប្តាហ៍ ឬគ្របគម្របឱ្យជិត។ ក្រសួងក៏ណែនាំឱ្យកាប់ឆ្ការស្មៅ និងសម្អាតបរិវេណសាលារៀនជាប្រចាំ ដើម្បីលុបបំបាត់ទីជម្រករបស់មូសខ្លា។

ដើម្បីកាត់បន្ថយហានិភ័យនៃការខាំពីមូស សិស្សានុសិស្ស និងបុគ្គលិកអប់រំ ត្រូវស្លៀកសម្លៀកបំពាក់ដៃវែង ខោជើងវែង និងស្រោមជើង ប្រើថ្នាំបាញ់ ឬថ្នាំលាបការពារមូស និងធានាឱ្យថ្នាក់រៀនមានពន្លឺ ខ្យល់ចេញចូលគ្រប់គ្រាន់។ សាលារៀនក៏ត្រូវដាក់សំណាញ់ការពារមូសនៅតាមទ្វារ និងបង្អួច ប្រសិនបើអាចអនុវត្តបាន។

ក្រសួងក៏បានជំរុញឱ្យគ្រឹះស្ថានសិក្សាសហការជាមួយមន្ត្រីសុខាភិបាលមូលដ្ឋាន ក្នុងការដាក់ថ្នាំសម្លាប់ដង្កូវទឹកនៅតាមកន្លែងស្តុកទឹក ឬចិញ្ចឹមត្រីប្រាំពីរពណ៌នៅទីតាំងសមស្រប ដើម្បីទប់ស្កាត់ការបង្កកំណើតរបស់មូសខ្លា។

ទន្ទឹមនឹងនេះ លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានអំពាវនាវថា «គ្មានជម្រកមូសខ្លា គ្មានជំងឺគ្រុនឈាម» ដោយបញ្ជាក់ថា មូសខ្លាពងនៅក្នុងទឹកថ្លា មិនមែនទឹកស្អុយនោះទេ។ ប្រភពបង្កកំណើតរបស់វារួមមានទឹកដក់ក្នុងសំបកកង់ ដប កំប៉ុង ថូផ្កា ចានទ្រជើងតុ ស្នោ កែវជ័រ ថង់ប្លាស្ទិក និងសម្ភារៈផ្សេងៗដែលទុកឱ្យដក់ទឹកភ្លៀង។

ស្របពេលជាមួយគ្នានេះ មូលនិធិគន្ធបុប្ផាកម្ពុជា បានអំពាវនាវឱ្យអាណាព្យាបាលយកចិត្តទុកដាក់ខ្ពស់ចំពោះសុខភាពកូនៗក្នុងរដូវវស្សា បន្ទាប់ពីកុមារចំនួន ១,៨៩២នាក់ បានទទួលការព្យាបាលជំងឺគ្រុនឈាមនៅមន្ទីរពេទ្យគន្ធបុប្ផាក្នុងខែមិថុនា ឆ្នាំ២០២៦។

ក្រសួងអប់រំបានស្នើឱ្យមន្ទីរអប់រំ រាជធានី-ខេត្ត ផ្សព្វផ្សាយសេចក្តីណែនាំនេះឱ្យបានទូលំទូលាយ និងតាមដានការអនុវត្តនៅគ្រប់គ្រឹះស្ថានសិក្សា ដើម្បីធានាបាននូវបរិយាកាសសិក្សាប្រកបដោយសុវត្ថិភាព និងរួមចំណែកកាត់បន្ថយការរីករាលដាលនៃជំងឺគ្រុនឈាមក្នុងសហគមន៍៕

លោកស្រី សែន ដាវិត | Mrs. Sen David

ជីវប្រវត្តិ ៖ លោកស្រី សែន ដាវិតបានបញ្ចប់ការសិក្សាផ្នែករដ្ឋបាលសាធារណៈ នៅសាកលវិទ្យាល័យភូមិន្ទនីតិសាស្រ្ដ និងវិទ្យាសាស្រ្ដសេដ្ឋកិច្ច។ លោកស្រីមានបទពិសោធន៍ជាអ្នកសារព័ត៌មាន ក្នុងផ្នែកបោះពុម្ព វិទ្យុ និងជាអ្នករាយការណ៍ព័ត៌មានទូរទស្សន៍។