ក្រោយការបណ្តុះបណ្តាលរយៈពេល ៥សប្ដាហ៍ និងឱកាសពង្រីកបណ្តាញទំនាក់ទំនងជាមួយនិស្សិតជំនាន់មុន ទីបំផុតរកឃើញជ័យលាភីឆ្នើម ក្នុងកម្មវិធី Next-Gen Engagement Program – Batch III ដែលរៀបចំដោយបណ្ឌិត្យសភាបច្ចេកវិទ្យាឌីជីថលកម្ពុជា (CADT) ។

ក្នុងចំណោម ១៦គម្រោងដែលបានធ្វើបទបង្ហាញក្នុងកម្មវិធីនេះ ជាលទ្ធផល ជ័យលាភីលេខ (Top 1) បានទៅលើ គម្រោង PassKru, ជ័យលាភីលេខ២ (Top 2) បានទៅលើ គម្រោង SongKet (សង្កេត) និងជ័យលាភីលេខ៣ (Top 3) បានទៅលើ គម្រោង Veaja (វាចារ)។ ក្នុងនោះ Best Audience Award បានទៅលើ គម្រោង Jakkho, Best Innovation Award បានទៅលើ គម្រោង AngKet និង Best Social Impact Award បានទៅលើ គម្រោង Domner ។

លោក ហ៊ាន សំបឿន អនុប្រធានសភាចារ្យបណ្ឌិត្យសភាបច្ចេកវិទ្យាឌីជីថលកម្ពុជា (CADT) មានប្រសាសន៍ថា កម្មវិធី Next-Gen Engagement Program – Batch III ផ្ដល់ឱកាសដល់និស្សិតក្នុងការទទួលបានចំណេះដឹង និងបទពិសោធល្អៗ ពីសិស្សច្បង និងឱកាសក្នុងការប្រកួតប្រជែងលើគម្រោងអាជីវកម្មរបស់ខ្លួនប្រកបដោយគំនិតច្នៃប្រឌិត។

អនុប្រធានសភាចារ្យបណ្ឌិត្យសភាបច្ចេកវិទ្យាឌីជីថលកម្ពុជា (CADT) បញ្ជាក់បន្ថែមថា គោលបំណងរបស់ CADT ធ្វើយ៉ាងណាពង្រឹងចំណេះដឹង ជំនាញ សមត្ថភាព និងភាពជាអ្នកដឹកនាំ ធ្វើយ៉ាងណាឱ្យនិស្សិតដែលបានបញ្ចប់ពី CADT មានការទទួលស្គាល់នៅពេលចេញទៅបម្រើការងារនៅតាមក្រុមហ៊ុនឯកជន និងស្ថាប័ននានា។

លោក ហ៊ាន សំបឿន សង្កត់ធ្ងន់ថា និស្សិតមិនត្រឹមតែរៀនដើម្បីទទួលបានសញ្ញាបត្រប៉ុណ្ណោះទេ ប៉ុន្តែនិស្សិតដែលបានចូលរួមកម្មវិធីប្រកួតប្រជែងនានា តែងទទួលបានឱកាសខ្ពស់ពេលចេញទៅស្វែងរកការងារ បើប្រៀបធៀបនឹងនិស្សិតដែលពុំធ្លាប់ចូលរួមកម្មវិធីប្រកួតប្រជែងផ្សេងៗ។

កម្មវិធី Next-Gen Engagement Program – Batch III រៀបចំឡើងក្នុងគោលបំណងផ្តល់ឱកាសឱ្យនិស្សិតឆ្នាំទី២ ចែករំលែកចំណេះដឹង និងបទពិសោធន៍ដល់និស្សិតឆ្នាំទី១ លើមុខវិជ្ជាសំខាន់ៗ ដែលស្របតាមកម្មវិធីសិក្សារបស់សាលា ដើម្បីជួយឱ្យប្អូនៗត្រៀមខ្លួនបានកាន់តែល្អ មុនឈានចូលឆ្នាំសិក្សាបន្ទាប់។ វគ្គបណ្តុះបណ្តាល ត្រូវបានរៀបចំតាមមុខជំនាញគោលប្រចាំដេប៉ាតឺម៉ង់ទាំង៣ រួមមាន ដេប៉ាតឺម៉ង់វិទ្យាសាស្ត្រកុំព្យូទ័រ Computer Science, ដេប៉ាតឺម៉ង់ទូរគមនាគមន៍ និងបណ្តាញ Telecommunication and Networking និង ដេប៉ាតឺម៉ង់ធុរកិច្ចឌីជីថលនិង Digital Business ព្រមទាំងជំនាញផ្សេងៗដែលពាក់ព័ន្ធនឹងបច្ចេកវិទ្យាឌីជីថល និងការធ្វើអាជីវកម្ម៕