ឧត្តរមានជ័យ៖ព្រៃសហគមន៍សង្ឃរុក្ខវ័នស្ថិតក្នុង ខេត្តឧត្តរមានជ័យ គឺជាតំបន់អភិរក្សដ៏សំខាន់មួយ ដែលមានអនុផលព្រៃឈើ យ៉ាងសម្បូរបែប ផ្ដល់ប្រយោជន៍ដល់ជីវភាពប្រជាពលរដ្ឋរាប់ពាន់គ្រួសារ។ ព្រៃសហគមន៍នេះមានទំហំ៣០.២៥៦ហិកតា ដែលលាតសន្ធឹងក្នុងក្រុង ស្រុកចំនួន៣ រួមមាន ក្រុងសំរោង ស្រុកចុងកាល់ និងស្រុកអន្លង់វែង ខេត្តឧត្តរមានជ័យ។

ព្រៃសហគមន៍សង្ឃរុក្ខវ័នស្ថិតនៅចម្ងាយ ៤០គីឡូម៉ែត្រភាគឦសាន នៃក្រុងសំរោងខេត្តឧត្តរមានជ័យ ។ក្រៅពីសម្បូរទៅដោយរុក្ខជាតិតូចធំជាច្រើនប្រភេទ ទីនេះក៏ជាជម្រកសត្វព្រៃគ្រប់ប្រភេទ ជីវចម្រុះ ជាតំបន់អេកូទេសចរណ៍ធម្មជាតិដ៏មានសក្តានុពលផងដែរ។

ព្រៃសហគមន៍សង្ឃរុក្ខវ័ន ត្រូវបានបែងចែកជាតំបន់ផ្ទៃទឹក ផ្ទៃដីគោក។ចំពោះផ្ទៃដីគោកត្រូវបានបែងចែកព្រៃ៤ ប្រភេទ ក្នុងនេះ គឺតំបន់ ព្រៃស្រោង ព្រៃពាក់កណ្ដាលស្រោង ព្រៃរបោះនិងព្រៃបៃតងជាដើម។ព្រៃទាំងនេះហើយបានក្លាយជម្រកសត្វព្រៃ រួមមាន ទាំងសត្វព្រៃកម្រ សត្វស្លាប ត្រីដ៏សម្បូរបែប។ជាងនេះទៅទៀតដើមឈើព្រៃហូបផ្លែ ទឹកឃ្មុំ ផ្សិត និងរុក្ខជាតិមួយចំនួនទៀតដែលពលរដ្ឋអាចដកហូតមកកែច្នៃជារបស់ប្រើប្រាស់ ហូបចុក និងលក់ដូរ ជាប្រភពចំណូលដ៏សំខាន់ដល់ប្រជាសហគមន៍ផងដែរ ។

   ព្រះតេជគុណ ថូ ធូរស់ ប្រធានសហគមន៍តំបន់ការពារធម្មជាតិសង្ឃរុក្ខវ័ន បានមានសង្ឃដីការឱ្យដឹងថា តំបន់នេះមានមានព្រៃឈើតូចធំ ។ពិសេសបច្ចុប្បន្នមានដើមឈើមុខកាត់រហូតដល់២ម៉ែត្រទៀតផង។សម្រាប់ផ្លែឈើហូបផ្លែវិញក៏សម្បូរបែបដែរមានដូចជា ផ្លែភ្ញៀវ ផ្លែគុយ និងផ្លែសិរមាន់ក៏សម្បូរដែរ។ក្រៅពីនេះក៏មានសត្វកម្រច្រើនប្រភេទលើកលែងតែដំរី  គឺមានសត្វខ្លាតែជាប្រភេទខ្លាតូចៗ។ក្រៅពីនេះក៏មានសត្វទន្សោង សត្វប្រើសជាច្រើនក្បាល។

 ប្រធានសហគមន៍តំបន់ការពារធម្មជាតិសង្ឃរុក្ខវ័ន្ត ព្រះតេជគុណ ថូ ធូរស់ បានឱ្យដឹងដែរថានៅសហគមន៍នេះមានអាងទំនប់ទឹកមួយកន្លែងមានឈ្មោះថា អាងស្ទឹងត្រែង២នោះក៏សម្បូរដោយត្រី។គ្រាន់តែចំណូលពី ត្រី ផ្សិត ទឹកឃ្មុំ ផ្លែឈើព្រៃ ជ័រទឹកជាដើម ក្នុងមួយឆ្នាំៗប្រជាសហគមន៍អាចរកចំណូលមិនក្រោមលានដុល្លារទេ។បច្ចុប្បន្នសមាជិកសហគមន៍មានចំនួនសរុប៧ភូមិ។

សហគមន៍តំបន់ការពារធម្មជាតិសង្ឃរុក្ខវ័ន រយៈពេល២៥ឆ្នាំមកនេះបានត្រូវព្រះតេជគុណ ថូ ធូរស់ ឱ្យដឹងថា អាចរក្សាបានទាំងព្រៃឈើ សត្វព្រៃ គឺជាការខិតខំរួមទាំងសហគមន៍ ទាំងអាជ្ញាធរមូលដ្ឋាន និងដៃគូ។ជាមួយគ្នាសហគមន៍ប្តេជ្ញាចិត្តថែរក្សាទំហំផ្ទៃដីតំបន់អភិរក្សទាំងនេះឱ្យខានតែបានដើម្បីកូនចៅជំនាន់ក្រោយបន្ថែមទៀត។

ព្រះតេជគុណ ថូ ធូរស់ មានសង្ឃដីការបន្ថែមថា តទៅថ្ងៃខាងមុខ អាត្មាភាពសង្ឃឹមជឿជាក់ថាសហគមន៍តំបន់ការពារធម្មជាតិសង្ឃរុក្ខវ័ននឹងក្លាយជាបេះដូងនៃខេត្តឧត្តរមានជ័យ។សហគមន៍នេះស្ថិតនៅចំកណ្តាលខេត្ត ម្ល៉ោះហើយងាយនឹងស្រូវទាញទេសចរឱ្យចូលមកកម្សាន្ត ព្រោះទីនេះសម្បូរធនធានធម្មជាតិ សត្វព្រៃ ទេសភាពព្រៃភ្នំ ដែលជាកន្លែងទេសចរណ៍មិនចេះរីងស្ងួត។
គួរជម្រាបថា ព្រៃសង្ឃរុក្ខវ័ន មានផ្ទៃដីធំ ដូចនេះការល្បាតនិងកិច្ចការពារសត្វព្រៃជារឿងចាំបាច់។ទោះបីយ៉ាងណាបទល្មើសខ្លះៗតែងកើតមាន តែក៏មិនច្រើនដែរ។

មុននេះដែនជម្រកសត្វព្រៃសង្ឃរុក្ខវ័ន មានអតីតព្រះសង្ឃ ១ អង្គ ព្រះនាម ប៊ុន សាលួត បានផ្ដួចផ្ដើមកិច្ចការពារនៅឆ្នាំ ២០០១ ។ ព្រៃសហគមន៍នេះ ត្រូវបានរដ្ឋាភិបាលទទួលស្គាល់ និងសម្រេចបង្កើតឡើងជាដែនជម្រកសត្វព្រៃនៅថ្ងៃទី ៥ ខែមេសា ឆ្នាំ ២០១៨៕
ដោយ៖ម៉ាដេប៉ូ