Sydney Marith បង្ហាញខ្លួនដូចម៉ាន់នឺកាំង ធ្វើឲ្យមហាជនភ្ញាក់ផ្អើលម្ដងទៀតហើយ

Miss Planet Cambodia 2025 កញ្ញា Sydney Marith បានបង្ហាញរូបរាងដូចទៅនឹងម៉ាន់នឺកាំងម្ដងទៀតហើយ កាលពីពេលថ្មីៗនេះ។ ដោយបវរកញ្ញាខ្មែរកាត់អាមេរិក ទើបបញ្ចប់ការងារថតម៉ូតសម្លៀកបំពាក់ឲ្យសម្អាងការមួយ។

នេះមិនមែនជាលើកទី១ឡើយ ដោយ Sydney Marith ធ្វើឲ្យមហាជនចំហមាត់ ព្រោះតែមុខមាត់នាងពេលផាត់មុខរួច ដូចគ្នាទៅនឹងតុក្កតាមានជីវិត។ លំដាប់រងទី១ Miss Supranational Cambodia 2025 មានរូបសម្រស់ស្រស់ស្អាតខ្លាំង មួយវិញទៀតក៏ព្រោះតែនាងជាកូនកាត់ទៀតនោះ ធ្វើឲ្យបវរកញ្ញាវ័យ ១៩ ឆ្នាំរូបនេះទាក់ភ្នែក។

វីដេអូថ្មីដែរបង្ហោះដោយនាងផ្ទាល់លើបណ្ដាញសង្គម ធ្វើដូចជាកំពុង unboxing នរណាៗក៏លាន់មាត់ដែរថា មួយវិនាទីដំបូងគិតថានាងជាតុក្កតា។ ក្រៅពីពាក្យបរិយាយថា Sydney Marith ជាម៉ាន់នឺកាំង ហើយនោះអ្នកគាំទ្រក៏លើកឡើងបន្ថែមទៀតថា នាងគឺដូចមនុស្សយន្តមានជីវិត ដូច Barbie ដែលល្អឥតខ្ចោះ។ វីដេអូម្ដងនេះ ក៏មិនខុសពីលើកមុនដែរ ដោយមានអ្នកចូលមើលច្រើន។

គួរបញ្ជាក់ថា មុនឡើងឆាកប្រកួតលក្ខណៈអន្តរជាតិ Sydney កំពុងមមាញឹកការងារជាច្រើន។ក្នុងរដូវកាលនេះ នាងទទួលថតប្រម៉ូតឲ្យសម្អាងការមួយចំនួន។ កម្មវិធីប្រកួត Miss Planet International 2025 World Finale នឹងប្រព្រឹត្តិទៅនៅថ្ងៃ ៦ ខែធ្នូ ឆ្នាំ ២០២៥ នៅសាលមហោស្រពកោះពេជ្រ កណ្ដាលបេះដូងទីក្រុងភ្នំពេញ។

ខាងស្ថាប័ន Miss Planet International បានប្រកាសនៅថ្ងៃព្រឹកនេះថា ចាប់ពីថ្ងៃ ២៦ ដល់២៧ ខែវិច្ឆិកា ប្រតិភូចន្លោះពី ៦០ ទៅ ៧០ នាក់មកពីជុំវិញពិភពលោកនឹងមកដល់ ដើម្បីចាប់ផ្ដើមដំណើរការកម្មវិធី។ ការមកដល់ និងទទួលស្វាគមន៍បេក្ខភាពមកពីក្រៅប្រទេស នឹងអនុញ្ញាតឲ្យពួកគេស្វែងយល់ពីប្រពៃណីដ៏សម្បូរបែប វប្បធម៌រស់រវើក និងស្មារតីដ៏កក់ក្ដៅរបស់ប្រជាជនកម្ពុជា។ នេះគឺលើសពីការប្រកួតប្រជែង ក៏ជាការអបអរនៃការរួបរួម សោភ័ណភាព និរន្តរភាព និងព្រលឹងនៃប្រទេសកម្ពុជា។ ធ្វើឲ្យពិភពលោកបានឃើញភាពទាក់ទាញនៃមរតកខ្មែរ ភ្លឺចែងចាំង៕

រូបភាព៖ Sydney Marith និង Lin Ravat

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត