ផ្អែកតាមសារព័ត៌មាន​ Korea Time តារាពហុជំនាញ Cha Eun-woo បានរៀបចំកម្មវិធីប្រគំតន្ត្រីប្លែកថ្មី ដោយប្រើប្រាស់បច្ចេកវិទ្យាពិភពនិម្មិត ឬ VR ដើម្បីអនុញ្ញាតឱ្យអ្នកគាំទ្រក្លាយទៅជាគូស្នេហ៍របស់ខ្លួន ចូលរួមសម្ដែងក្នុងសាច់រឿងរួមគ្នាជាមួយលោក។

CHA EUN-WOO VR CONCERT: MEMORIES គឺជាកម្មវិធីប្រគំតន្ត្រីទម្រង់ថ្មី ដែលប្រើប្រាស់ចម្រៀងយកមកនិទានរឿងរ៉ាវស្នេហា បង្ហាញពីពិភពស៊ីជម្ពូ ការខកចិត្ត និងភាពឈឺចាប់។ តែអ្វីដែលពិសេសនោះ កម្មវិធីខាងលើ បានជ្រើសរើសប្រើប្រាស់បច្ចេកវិទ្យាពិភពនិម្មិត ឬ VR ដើម្បីឱ្យអ្នកទស្សនាបានក្លាយជាតួឯកស្រីនៅក្នុងសាច់រឿង និងអាចចំណាយពេល ១ម៉ោង ស្ថិតនៅជិតតារាក្នុងដួងចិត្ត។

ជាក់ស្ដែង ទស្សនិកជនមិនមែនគ្រាន់តែមានតួនាទីត្រឹមតែជាអ្នកទស្សនាប៉ុណ្ណោះទេ តែគឺជាអ្នកដែលចូលរួមបង្កើតសាច់រឿងតែម្ដង ព្រោះតាមរយៈ VR ដែលមានកម្រិតភាពច្បាស់ដល់ទៅ ១២ K នេះ ទស្សនិកជននឹងត្រូវជ្រើសរើសវត្ថុអនុស្សាវរីយ៍ រូបថត និងការជ្រើសរើសផ្សេងទៀត ដែលនាំឱ្យទស្សនិកជនទទួលបានបទពិសោធន៍ និងសាច់រឿងផ្សេងៗគ្នា។

ក្រៅពីកម្មវិធីក្នុងប្រទេសកំណើតដែលធ្វើឡើង ចាប់ពីថ្ងៃទី ១៨ខែមិថុនា ដល់ថ្ងៃទី៨ ខែកក្កដា CHA EUN-WOO VR CONCERT: MEMORIES នឹងនាំយកសមត្ថភាពសម្ដែង និងទេពកោសល្យផ្នែកចម្រៀងរបស់តារាប្រុសវ័យ ២៨ឆ្នាំ ទៅបង្ហាញនៅតាមបណ្ដាទីក្រុងទាំងក្នុងទ្វីបអាស៊ី និងអាមេរិកខាងជើងដទៃទៀត រួមមាន ទីក្រុងប៉េកាំង សាប៉ូរ៉ូ ហូជីមិញ ចាកាតា និង ទីក្រុងម៉ិកស៊ីកូ ជាដើម។

គួរឱ្យដឹងផងដែរថា តារាប្រុសកើតឆ្នាំ ១៩៩៧ រូបនេះ នឹងត្រូវចូលទៅបម្រើជាតិនៅក្នុងថ្ងៃទី២៨ ខែកក្កដាខាងមុខ ក្រោមតួនាទីជាសមាជិកកងកម្លាំងប្រដាប់អាវុធកូរ៉េខាងត្បូង៕