តុលាការមិនព្រមដោះលែងឱ្យ P. Diddy ស្ថិតនៅក្រៅឃុំ រហូតដល់ថ្ងៃកាត់ទោសនៅខែតុលា ឆ្នាំ ២០២៥ ដ្បិតមេធាវីរបស់តារារ៉េបរូបនេះបានព្យាយាមស្នើប្រាក់ លក្ខខណ្ឌ និងហេតុផលជាច្រើនទៅហើយក្ដី។ នេះបើយោងតាមការចុះផ្សាយរបស់សារព័ត៌មាន Variety។

នៅថ្ងៃទី២ ខែកក្កដានេះ មេធាវីការពារក្តីបានស្នើសុំឱ្យតុលាការដោះលែង Sean Diddy Combs ជាមួយនឹងប្រាក់ធានាខ្លួន ១ លានដុល្លារអាមេរិក​ ដោយព្យាយាមធ្វើឱ្យតុលាការទុកចិត្តកូនក្ដីខ្លួន តាមរយៈការធ្វើការតេស្តស្វែងរកសារធាតុញៀន រឹតបន្តឹងការធ្វើដំណើរក្នុងសហរដ្ឋអាមេរិក និងរឹបអូសលិខិតឆ្លងដែនទៅហើយក្ដី ក៏ប៉ុន្តែតុលាការនៅតែបដិសេធនឹងសំណើនោះ ដោយខ្លាចថា ផលិតករ និងជាតារាចម្រៀងរូបនេះអាចនឹងបង្កគ្រោះថ្នាក់ដល់សង្គម។

ថ្វីបើទទួលបានការបដិសេធបែបនេះក្ដី​ មេធាវី​ដដែលបានព្យាយាមលើកហេតុផលថា តារាប្រុសវ័យ ៥៥ឆ្នាំមានហេតុផលពិសេសដែលគួរដោះលែងលោកឱ្យនៅក្រៅឃុំ ព្រោះតែលោកត្រូវមើលថែកូនៗ និងម្ដាយចំណាស់វ័យ ៨៥ ឆ្នាំ ដែលចង់ឱ្យកូនប្រុសមើលថែខ្លួន។

បន្ថែមពីនេះ មេធារីរបស់ P. Diddy ​ក៏បានស្នើសុំឱ្យតុលាការ ជួយផ្លាស់ប្ដូរការឃុំខ្លួន P. Diddy ​ទៅកាន់ពន្ធនាគារដែលមានច្បាប់ធូរស្រាលជាងមុន និងជាកន្លែងសម្រាប់អ្នកទោសជិតរួចផុតទោសស្នាក់នៅ ដោយអះអាងថា កូនក្ដីរបស់ខ្លួនជាអ្នកទោសដែលល្អ ចេះសម្របសម្រួលទៅនឹងកាលៈទេសៈ។

សារព័ត៌មាន NBC News បានចុះផ្សាយថា ក្នុងចំណោមការចោទប្រកាន់ទាំងអស់ តុលាការសហរដ្ឋអាមេរិកបានរកឃើញថា P. Diddy គឺបានល្មើសទៅនឹងបទល្មើសដឹកជញ្ចូនមនុស្សសម្រាប់សកម្មភាពពេស្យាចារ ក៏ប៉ុន្តែតុលាការមិនបានរកឃើញថា លោកល្មើសនឹងទោសធ្ងន់ដូចជា ការរំលោភបំពានផ្លូវភេទ ការបង្ខំឱ្យប្រើប្រាស់គ្រឿងញៀន និងការផ្ដើមគំនិត ឬឃុបឃិតក្នុងការជួយដូរមនុស្សសម្រាប់ពេស្យាកម្មនោះទេ។

យ៉ាងណាមិញ មកទល់ពេលនេះ​តុលាការនៅតែបដិសេធ មិនព្រមដោះលែង P. Diddy ដោយសាវនាការ​រវាង​ចៅក្រម និង​ភាគីពាក់ព័ន្ធ ​មុន​ការ​កាត់​ទោសនឹងរៀបចំធ្វើឡើងនៅទី ៨ ខែ​កក្កដា វេលា​ម៉ោង ២ រសៀល ស្របពេលដែលសាលក្រមចុងក្រោយនឹងធ្វើឡើងនៅថ្ងៃទី៣ ខែតុលាខាងមុខ។

ក្នុងករណី តុលាការបានសម្រេចថា ម្ចាស់បទ Last Night ពិតជាមានកំហុសមែន លោកនឹងត្រូវជាប់ពន្ធនាគារចន្លោះពី ៥១ ដល់ ៦៣ ខែ ប្រមាណ ៤ ទៅ ៥ឆ្នាំ៕