ក្នុងឱកាសថ្ងៃខួបកំណើត ២៣ ឆ្នាំ Sunoo សមាជិក ENHYPEN បានបរិច្ចាគថវិកាផ្ទាល់ខ្លួន ៥០ លានវ៉ុនប្រមាណជាង ៣២ ០០០ ដុល្លារដើម្បីជួយដល់កុមារដែលកំពុងមានជំងឺ។

យោងតាមមន្ទីរពេទ្យ Samsung Seoul នៅថ្ងៃទី២៤ ខែមិថុនា ឆ្នាំ២០២៦ Sunoo សមាជិកក្រុមចម្រៀងបុរស​ ENHYPEN បានបរិច្ចាគថវិកាផ្ទាល់ខ្លួន ៥០ លានវ៉ុនដើម្បីជួយសង្គ្រោះជីវិតកុមារកំពុងមានជំងឺ។ ជាមួយនឹងការបរិចា្ចគលើកនេះ ទឹកប្រាក់នៃការបរិច្ចាគរបស់ Sunoo ដល់មន្ទីរពេទ្យបានឡើងដល់ ២០០ លានវ៉ុន (ជិត ១៣ ម៉ឺនដុល្លារ) បើរាប់ពីឆ្នាំ ២០២៤ មកដល់ពេលបច្ចុប្បន្ននេះ។

ការបរិច្ចាគរបស់លោកនាលើកនេះមិនត្រឹមតែជាការធ្វើសប្បុរសធម៌ប៉ុណ្ណោះនោះទេ ប៉ុន្តែគឺជាការខិតខំជ្រោមជ្រែងផ្ដល់ជំនួយសង្គ្រោះទៅដល់អ្នកខ្វះខាត និងកំពុងមានតម្រូវការយ៉ាងពិតប្រាកដ។ ចាប់តាំងពីការបរិច្ចាគលើកដំបូងដោយសម្ងាត់នៅខែធ្នូ ឆ្នាំ២០២៤ ចំនួន ១០០ លានវ៉ុនទៅកាន់ «មូលនិធិសុភមង្គលអ្នកជំងឺ» របស់មជ្ឈមណ្ឌលវេជ្ជសាស្ត្រ Samsung ដើម្បីជួយសម្រាលបន្ទុកថ្លៃព្យាបាលសម្រាប់កុមារ និងក្មេងជំទង់ ធ្វើ​ឱ្យលោកយល់ឃើញថាខ្លួនមិនអាចមើលរំលង និងរឹតតែមិនអាចបោះបង់ចោលនូវកុមារដែលកំពុងជួបការលំបាកឡើយ ដូច្នេះហើយលោកក៏បានបន្ដផ្ដល់ជំនួយគាំទ្រដល់ការព្យាបាលកុមារតាំងពីពេលនោះមក។

ទន្ទឹមគ្នានឹងការបរិច្ចាគនាលើកនេះ សមាជិកវ័យ ២៣ ឆ្នាំរូបនេះបាននិយាយថា៖ «ខ្ញុំសង្ឃឹមថា កុមារដែលកំពុងសម្រាកព្យាបាលជំងឺទាំងអស់ អាចស្រមៃមើលឃើញពីអនាគតដ៏ភ្លឺស្វាង»។ លោកបន្ដថា៖ «ខ្ញុំនឹងនៅតែបន្តចូលរួមក្នុងការចែករំលែកសេចក្តីស្រឡាញ់បែបនេះតទៅទៀត»។

ងាកមកក្នុងការងាររបស់ Sunoo វិញ ក្រុម ENHYPEN នឹងជួបជុំជាមួយអ្នកគាំទ្រសាជាថ្មីជាមួយនឹងសមាជិកក្រុម ៦ នាក់នៅថ្ងៃទី ២១ ខែសីហា ខាងមុខនេះ ជាមួយនឹងការចេញផ្សាយអាល់ប៊ុមខ្នាតតូច (Mini Album) ទី៨ របស់ពួកគេ ដែលមានចំណងជើងថា ‘THE SIN : BLISS’។ ការវិលត្រលប់មកវិញជាមួយនឹងអាល់ប៊ុមថ្មីលើកនេះបានធ្វើឱ្យមហាជន និងអ្នកគាំទ្រជាច្រើនអន្ទះសារង់ចាំមើលយ៉ាងខ្លាំងព្រោះវាជាស្នាដៃដំបូងបង្អស់របស់ក្រុម បន្ទាប់ពីការរៀបចំរចនាសម្ព័ន្ធសមាជិកឡើងវិញ៕