តួឯកស្រីរឿង Cinderella កញ្ញា Lily James បានមកទស្សនកិច្ចនៅកម្ពុជា និងបានលេងល្បែងប្រជាប្រិយខ្មែរ

តួឯកស្រីក្នុងរឿងដ៏ល្បីល្បាញជុំវិញពិភពលោក «Cinderella» ឆ្នាំ ២០១៥ កញ្ញា Lily James បានមកធ្វើដំណើរមកទស្សនកិច្ចនៅកម្ពុជា កាលពីពេលថ្មីៗកន្លងទៅនេះ តាមរយៈអង្គការ unicef ដែលនាងជាអ្នកគាំទ្រ UNICEF UK ហើយបានបម្រើការជាអ្នកគាំទ្រដ៏លេចធ្លោសម្រាប់អង្គការនេះ។

នេះជាលើកទី១ សម្រាប់ការបង្ហាញវត្តមានរបស់តារាហូលីវូដល្បីរូបនេះនៅលើទឹកដីនៃប្រទេសកម្ពុជា។ កាលពីថ្ងៃទី ៤ ខែ មេសា កន្លងទៅ តួឯកស្រីរឿង «Cinderella» កញ្ញា Lily James បានអញ្ជើញធ្វើទស្សនកិច្ចនៅអនុវិទ្យាល័យ ហ៊ុន សែន រលួស ដែលស្ថិតក្នុងខេត្តសៀមរាប។

ក្នុងដំណើរទស្សនកិច្ចរបស់កញ្ញា ទទួលបានការស្វាគមន៍យ៉ាងកក់ក្ដៅ ពីសំណាក់ថ្នាក់ដឹកនាំ គណៈគ្រប់គ្រងសាលា និងសិស្សានុសិស្ស ផងដែរ។ ជាមួយគ្នា កញ្ញា Lily James ក៏បានចូលរួមលេងល្បែងប្រជាប្រិយខ្មែរ វាយក្អម ជាមួយសិស្សានុសិស្ស ដ្បិតថាសាលាបានរៀបចំកម្មវិធីល្បែងប្រជាប្រិយខ្មែរ ដើម្បីត្រៀមអបអរពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ។

គួរបញ្ជាក់ឱ្យដឹងថា ដំណើរទស្សនកិច្ចរបស់តារាអង់គ្លេសរូបនេះ មិនត្រឹមតែជាការផ្ដល់កម្លាំងចិត្តដល់ប្អូនៗសិស្សានុសិស្សប៉ុណ្ណោះទេ ប៉ុន្តែថែមទាំងជាការបង្ហាញពីភាពសាមញ្ញ និងការយកចិត្តទុកដាក់ខ្ពស់ចំពោះវិស័យអប់រំនៅកម្ពុជាផងដែរ៕