ព្រះនាងតូច ជេនណា យាងដល់ទីណាក៏មានហ្វេនចោមរោមដែរ ពិសេសក្មេងៗ

ជាសែរាជវង្សដែលចូលប្រឡូកក្នុងវិស័យសិល្បៈ ព្រះនាង នរោត្តម ជេនណា ទទួលបានការស្វាគមន៍ និងស្រលាញ់ខ្លាំងពីសំណាក់មហាជនគ្រប់ទិសទី គ្រប់វ័យទាំងប្រុសទាំងស្រី។ ទ្រង់ជាទីពេញចិត្តនៃអ្នកគាំទ្រ មិនថាការងារសិល្បៈ ឬការងារមនុស្សធម៌ផ្សេងៗឡើយ ហើយឲ្យតែបង្ហាញវត្តមានដល់ទីណា មនុស្សត្រៀបត្រារង់ចាំស្វាគមន៍។

ទ្រង់ ជេនណា បានចូលរួមការងារសង្គម និងប្រឡូកក្នុងអាជីពជាអ្នកសិល្បៈពេញអង្គ ដូចនេះហើយមហាជនពិតជាស្រលាញ់ចូលចិត្ត និងស្វាគមន៍គ្រប់ទីកន្លែង ជាពិសេសហ្វេនជាក្មេងៗ។ ឋានៈ វង្សត្រកូលខ្ពង់ខ្ពស់ របស់ព្រះនាងម្ចាស់អង្គនេះ មិនមែនជាអ្វីដែលទាក់ចិត្តមហាជនបានឡើយ តែចរិយាប្រពៃ ប្រាជ្ញាឈ្លាសវៃឯណោះទេ ជាទីចាប់ចិត្ត។ មិនត្រឹមតែហ្វេនក្នុងស្រុកឡើយ ពេលទ្រង់ទៅក្រៅប្រទេសបំពេញបេសកកម្ម ឬដំណើរកម្សាន្ត ក៏មានអ្នកគាំទ្រសុំថតរូបជាមួយដែរ។

បើនិយាយពីទេពកោសល្យសិល្បៈវិញ មិនថាបុរាណ សម័យឡើយព្រះនាងម្ចាស់វ័យ ១៣ ព្រះវស្សា នរោត្តម ជេនណា ពូកែគ្រប់ទម្រង់។ ក្នុងនោះចម្រៀងរាំរបាំបុរាណ ហើយសូម្បីតែការដើរបង្ហាញម៉ូដក៏ព្រះនាងធ្វើបានយ៉ាងល្អឥតខ្ចោះដែរ។

ប៉ុន្មានចំណុចខាងលើនៅមិនទាន់គ្រប់លក្ខណៈសម្បត្តិដែលធ្វើឲ្យទ្រង់ក្លាយជាទីចាប់អារម្មណ៍ ព្រះនាងជាមនុស្សសុភាពរាបសារទៅណាមកណាតែងលើកដៃជម្រាបសួរមុនជានិច្ច ទឹកមុខញញឹមពព្រាយ ដាក់ខ្លួន ទន់ភ្លន់ និងជាមនុស្សចែករំលែកជានិច្ច។ ខាងក្រោមជាបណ្ដុំរូបភាពដែលមនុស្សម្នាចោមរោមព្រះនាងតូច នរោត្តម ជេនណា គ្រប់ពេលវេលា៕