ពិធីសម្ពោធដាក់ឲ្យដំណើរការម៉ាស្ទ័រកាត សម្រាប់សមាជិកសមាគមសិល្បករខ្មែរ ដែលជាការផ្តល់កិត្តិយស និងគុណតម្លៃនៃសិល្បករ

ពិធីសម្ពោធជាផ្លូវការ កាតសមគមសិល្បករខ្មែរ Wing Master Card ដែលប្រធានសមាគមគឺលោកជំទាវអ្នកឧកញ៉ា ម៉ៅ ចំណាន បានខិតខំប្រឹងប្រែង ដើម្បីលើកស្ទួយតម្លៃតារាប្រុសស្រីជាវីរសិល្បករ ទទួលបានជោគជ័យ ចេញផ្លែផ្កាហើយ។

ដោយកាលពីម្សិលមិញថ្ងៃ ៧ ខែសីហា ឆ្នាំ ២០២៦ ធនាគារ វីង សមាគមសិល្បករខ្មែរ និងម៉ាស្ទ័រកាត ដានដាក់ឲ្យដំណើរការកាតពិសេស សម្រាប់សិល្បករកម្ពុជាទាំងអស់ ដែលផ្ដល់អត្ថប្រយោជន៍ កិត្តិយស គុណតម្លៃ ភាពងាយស្រួល ដល់សិល្បករគ្រប់ជំនាន់ គ្រប់ទម្រង់ អាចទទួលបាន។

ស្ថាប័នទាំង ៣ បានចាប់ដៃសហការគ្នាដាក់សម្ពោធឲ្យប្រើប្រាស់ កាតសមាគមសិល្បករខ្មែរ ដែលត្រូវបានបង្កើតឡើងជាពិសេសផ្ដាច់មុខ សម្រាប់តែសមាជិកសមាគមប៉ុណ្ណោះ។ កាតនេះមានមុខងារ ២ គឺប្រើប្រាស់ជាកាតទូទាត់កាតសមាជិកផ្លូវការរបស់សមាគមផង ដែលអនុញ្ញាតឲ្យសិល្បករអាចធ្វើប្រតិបត្តិការហិរញ្ញវត្ថុ ដកប្រាក់ និងចាត់ចែងហិរញ្ញវត្ថុរបស់ពួគគេបាននៅទូទាំងពិភពលោកតាម app Wing Bank រួមជាមួយអត្ថប្រយោជន៍ពិសេសៗជាច្រើនសម្រាប់ការធ្វើដំណើរ និងការរស់នៅប្រចាំថ្ងៃយ៉ាងសម្បូរបែប។

ប្រធានសមាគមសិល្បករខ្មែរ ថ្លែងថា «កិច្ចសហការនេះគឺជាសក្ខីភាពដ៏សំខាន់មួយក្នុងការទទួលស្គាល់តម្លៃ ក៏ដូចជាការរួមចំណែកមិនអាចកាត់ថ្លៃបានរបស់សិល្បករកម្ពុជា។ គំនិតផ្ដួចផ្ដើមនេះ មិនត្រឹមតែជាការលើកកម្ពស់មុខមាត់ដល់សិល្បករខ្មែរប៉ុណ្ណោះទេ ប៉ុន្តែថែមទាំងផ្ដល់ដំណោះស្រាយហិរញ្ញវត្ថុ របៀបរស់នៅសម្បូរបែបដែលជួយសម្រួល ជីវិតរស់នៅប្រចាំថ្ងៃ រួមទាំងអាជីពការងារផងដែរ។ យើងមានក្តីសោមនស្សដែលបានសហការជាមួយធនាគារ វីង និងក្រុមហ៊ុនម៉ាស្ទ័រកាត ដើម្បីដាក់ចេញកាតសមាជិកដែលឆ្លុះបញ្ចាំងពីអត្តសញ្ញាណ និងតម្លៃពិតប្រាកដដល់សហគមន៍សិល្បៈរបស់យើង»។

កាតនេះ គឺជាកាតផ្តាច់មុខ សម្រាប់តែសិល្បករដែលបានចុះឈ្មោះជាសមាជិករបស់សមាគមសិល្បករខ្មែរតែប៉ុណ្ណោះ។ តាមរយៈកាតនេះ សមាជិកសមាគមសិល្បករខ្មែរ ទាំងអស់នឹងទទួលបានអត្ថប្រយោជន៍ជាច្រើន ដូចជា៖

កាតនេះ ត្រូវបានរចនាឡើងដោយរំលេចនូវអត្តសញ្ញាណវប្បធម៌យ៉ាងប្រណីត មានរសនិយមបែបខ្មែរ។ ជាកាតគ្មានលេខ បំពាក់ដោយប្រព័ន្ធសុវត្ថិភាពខ្ពស់ ដោយប្រើលេខកូដ OTP សម្រាប់ការការពារប្រតិបត្តិការទូទាត់។ ការទូទាត់ដោយមិនចាំបាច់ប៉ះកាត (Contactless Payment) ដែលមានភាពរហ័ស និងងាយស្រួល។
កាតនេះ សិល្បករអាចប្រើប្រាស់បានទូទាំងពិភពលោក សម្រាប់ការដកសាច់ប្រាក់ ការទូទាត់តាមម៉ាស៊ីន POS និងការទិញទំនិញអនឡាញគ្រប់ទីកន្លែងដែលទទួល Mastercard។
សិល្បករនឹងទទួលបានសិទ្ធិចូលប្រើប្រាស់បន្ទប់រង់ចាំអាកាសយានដ្ឋានតាមបណ្តាញ DragonPass រហូតដល់ ៤ ដង នៅអាកាសយានដ្ឋានអន្តរជាតិនានាជុំវិញពិភពលោក។
អ្វីដែលពិសេសបំផុតនោះ គឺការធានារ៉ាប់រងសម្រាប់ការធ្វើដំណើរ និងបំពេញការងារនៅក្រៅប្រទេសមានតម្លៃរហូតដល់ ៥០០ ០០០ ដុល្លារ៕