ក្រសួងវប្បធម៌ហាមដាច់ខាត ចំពោះការថតរូបភាព ឬវីដេអូមិនសមរម្យនៅរមណីយដ្ឋានអង្គរ

ក្រសួងវប្បធម៌ និងវិចិត្រសិល្បៈបានចេញសេចក្ដីអំពាវនាវលើការថតរូបភាព ក៏ដូចជាវីដេអូផ្សព្វផ្សាយនានា ក្នុងរមណីយដ្ឋានអង្គរ ក្នុងន័យនេះ សំដៅដល់ការបញ្ចេញសកម្មភាពឆ្គាំឆ្គង មិនសមស្រប ឬការប្រមូលផ្ដុំដែលបង្កការប៉ះពាល់ដល់ការទស្សនារបស់ភ្ញៀវជាតិ/អន្តរជាតិ។

កន្លងមក យោងតាមសេចក្ដីជូនដំណឹងនាពេលកន្លងរបស់ក្រសួងពាក់ព័ន្ធនឹងសេវាកម្មថតវីដេអូ ឬរូបភាពសន្លឹក ក្នុងរមណីយដ្ឋានអង្គរ ឃើញថាប្រជាពលរដ្ឋបានចូលរួមពីគ្រប់មជ្ឈដ្ឋានបានចូលរួម និងអនុវត្តបានយ៉ាងល្អប្រសើរ។ ដោយឡែក នាពេលថ្មីៗនេះ ក្រសួងបានមើលឃើញនូវចន្លោះខ្វះខាតមួយចំនួន ដែលអាចបង្កការប៉ះពាល់ទៅដល់សង្គម បេតិកភណ្ឌ និងវប្បធម៌។

ជាមួយគ្នា អាជ្ញាធរជាតិអប្សរា ដែលមានក្រុមការងារភ្នាក់ងារទេសចរណ៍ និងភ្នាក់ងារសណ្ដាប់ធ្នាប់ នឹងស្នើសុំធ្វើការត្រួតពិនិត្យ ក៏ដូចជាសួរនាំទៅលើទម្រង់នៃការថតមួយចំនួន ដែលមានបង្កការប៉ះពាល់ដូចបានជម្រាបខាងលើ ដែលមានដូចជា ទង្វើខុសពីក្រមប្រតិបត្តិអង្គរ, ការថតសម្ដែង, ការស្លៀកសម្លៀកបំពាក់ដែលខុសឆ្គងខ្លាំង និងទីតាំងបេតិកភណ្ឌ ការដើរបង្ហាញម៉ូត និងការបញ្ចេញសកម្មភាពដែលឆ្គាំឆ្គង មិនសមស្រប ការថតផ្សាយផលិតផលមិនមានការអនុញ្ញាត ក៏ដូចជាកាយវិការប្រមូលផ្ដុំ និងការថតដែលរំខានដល់ការទស្សនារបស់ភ្ញៀវជាតិ/អន្តរជាតិ និងការគ្រប់គ្រងសណ្ដាប់ធ្នាប់សាធារណៈ។

អាស្រ័យដូចបានជម្រាប សូមប្រជាពលរដ្ឋ មហាជនយោគយល់ចំពោះការបំពេញកាតព្វកិច្ចរបស់ក្រុមការងារនៃអាជ្ញាធរ និងចូលរួមសហការ។ មួយវិញទៀត ក្រសួងក៏បានអំពាវនាវដល់ម្ចាស់គណនីដែលបានផ្សព្វផ្សាយតាមបណ្ដាញសង្គម ដែលបានបង្កការយល់ច្រឡំដល់មតិសាធារណជន សូមមេត្តាលុប ដើម្បីរក្សាបាននូវបរិយាកាសសង្គមប្រកបដោយសាមគ្គីជាតិតែមួយ៕

រូបភាព ៖ MEAS

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។