តារាកំប្លែង នាយពាង លាចាកលោកដោយជំងឺដាច់សរសៃឈាមបេះដូង ក្នុងវ័យ៥៩ឆ្នាំ

ដំណឹងមរណភាពរបស់តារាកំប្លែងលោក សេម ចិត្រា ហៅ នាយ ពាង ដោយជំងឺដាច់សរសៃឈាមបេះដូងកាលពីម្សិលមិញបានធ្វើឱ្យមហាជនជាច្រើនតក់ស្លុត និងសោកស្ដាយជាខ្លាំងចំពោះការបាត់បង់ធនធានសិល្បករជើងចាស់រូបនេះ។ មរណភាពរបស់ នាយ ពាង ដែលមហាជនច្រើនឃើញលោកសម្ដែងក្នុងរឿង ជាតួអង្គព្រះសង្ឃយ៉ាងស័ក្តិសម ធ្វើឲ្យអ្នកគាំទ្រលើកឡើងថា សឹងតែគ្មានតួអង្គណាសម្ដែងសមបែបនោះឡើយ។

លោក សេម ចិត្រា ហៅនាយ ពាង គឺជាតារាកំប្លែងនិងជាតារាសម្ដែង ជាធនធានចេញពីសាកលវិទ្យាល័យភូមិន្ទវិចិត្រសិល្បៈ ដែលភាគច្រើនសម្ដែងជាតួអង្គព្រះសង្ឃ និងទទួលបានការកោតសរសើរពីមហាជនចំពោះទេពកោសល្យនៃការសម្ដែងរបស់លោក។ នាយពាង ក៏ធ្លាប់សម្ដែងជាព្រះចៅអធិការវត្ត នាគវ័ន្ត ក្នុងបទចម្រៀង «ជីវិតក្មេងវត្ត» ដែលជាស្នាដៃនិពន្ធដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន កាលពីឆ្នាំ២០០១។ ក្រៅពីតួអង្គព្រះសង្ឃ លោកធ្លាប់ដើរតួជាអាចារ្យ តួយក្ស តួសេដ្ឋី តួអ្នកស្រុក តួឪពុកជាដើម។ ដោយឡែក លោកក៏ធ្លាប់បង្ហាញមុខលេងកំប្លែងជាមួយតារាកំប្លែងជើងចាស់ល្បីៗជាច្រើនដូចជា នាយ កុយ នាយ និងនាយសានម៉ៅ ផងដែរ។

តាមរយៈការសម្ដែង ទាំងកំប្លែង និងក្នុងខ្សែរឿងជាច្រើននាពេលកន្លងរបស់តារាជើងចាស់រូបនេះបានធ្វើឱ្យមហាជនជាច្រើនបង្ហាញការសោកស្ដាយនិងការនឹករលឹកជាពន់ពេកទៅកាន់រូបលោក។ អនុស្សាវរីយ៍ទាំងអស់នេះនឹងដិតជាប់នៅក្នុងការចងចាំរបស់មហាជនអ្នកគាំទ្រជានិច្ច។

គួរបញ្ជាក់ដែរថា តារាសម្ដែង និងកំប្លែងជើងចាស់រូបនេះបានទទួលមរណភាព នៅថ្ងៃព្រហស្បតិ៍ ទី១៧ ខែកក្កដា ឆ្នាំ២០២៥នេះ វេលាម៉ោង២រសៀល ក្នុងជន្មាយុ ៥៩ ឆ្នាំ ដោយរោគាពាធ ដាច់សរសៃឈាមបេះដូង។ ជាមួយគ្នានេះដែរ សម្ដេចអគ្គមហាសេនាបតីតេជោ ហ៊ុន សែន បានផ្ដល់ថវិកា ៣ពាន់ដុល្លារតាមរយៈលោក ហ្វៃ សំអាង និងអ្នកនាង ចន ចន្ទ័លក្ខិណា ក្នុងការនាំយកទៅប្រគល់ជូនគ្រួសារសព និងចូលរួមរំលែកទុក្ខ៕

រូបភាព ៖ ហ្វៃ សំអាង