អូលីវ៉ា គង់ សង្ឃឹមមុតមាំ «ឈុតរយលានអត្ថន័យ» ក្នុងមហោស្រពកាន២០២៦ ទាក់ភ្នែកសារព័ត៌មានធំៗ

ដើម្បីមុខមាត់ប្រទេសកម្ពុជា អូលីវ៉ា គង់ បានច្នៃឈុតពិសេសដែលបង្កប់រយលានអត្ថន័យ និងត្រៀមជាស្រេចក្នុងការបង្ហាញសិល្បៈ វប្បធម៌ ដ៏រុងរឿងរបស់ខ្មែរលើកម្រាលព្រំក្រហមនៃព្រឹត្តិការណ៍លំដាប់អន្តរជាតិនាលើកនេះ។

នេះជាបេសកកម្មលើកទី២ នៃការចូលរួមនៅក្នុងព្រឹត្តិការណ៍មហោស្រពកាន ប្រទេសបារាំង។ ខុសប្លែកពីលើកទី១ ដោយលើកនេះ អូលីវ៉ា គង់ មានដៃគូរដែលត្រូវដើរលើកម្រាលព្រំក្រហមរួមគ្នា ដែលបុគ្គលរូបនេះពុំមែនជាអ្នកក្នុងវិស័យជំនួញ តែជាបវរកញ្ញា និងជាបុគ្គលដែលទទួលបានការគាំទ្រខ្លាំង រហូតត្រូវបានឱ្យនាមជា បវរកញ្ញារបស់មហាជនថែមទៀត។ ជាមួយគ្នា បវរកញ្ញាញញឹមស្រស់រូបនេះក៏ត្រៀមនឹងបង្ហាញវត្តមានលើកម្រាលព្រំក្រហមក្នុងឈុតដែលច្នៃជាពិសេសដោយ អូលីវ៉ា គង់ ផងដែរ។

ដោយឡែក សម្រាប់ឈុតរបស់ អូលីវ៉ា គង់ ដែលត្រៀមចូលរួមក្នុងរយៈពេល ២ថ្ងៃ គឺថ្ងៃទី ១៨ និង១៩ ត្រូវបានច្នៃឡើងជាពិសេសដោយបានគិតគូរយ៉ាងលម្អិតទាំងរចនាបថ និងការរំលេចប្រណិតភាពរបស់ខ្មែរ។ ឆ្លងតាមបទពិសោធន៍នៃការចូលរួមលើកទី១ អូលីវ៉ា បានឱ្យដឹងថា ឈុតដែលទាក់ទាញ និងលេចធ្លោ មិនមែនជាឈុតមានទំហំធំ ផ្ទុយទៅវិញជាឈុតបង្កប់រយលានអត្ថន័យ ហើយឈុតដែលត្រៀមចូលរួមលើកនេះ លោកសង្ឃឹមយ៉ាងមុតមាំថាស្អាតទាក់ទាញទាក់ភ្នែកបណ្ដាសារព័ត៌មានបរទេសធំៗផងដែរ។

លោកបានបន្ថែមឱ្យដឹងថា៖ «ក្នុងនាមជាបុគ្គលមានធនធាន ក្នុងវិស័យហ្វេសសិន លោកនឹងពាំនាំសារតាមរយៈឈុតសម្លៀកបំពាក់ដើម្បីបង្ហាញពិភពលោកឱ្យបានស្គាល់ពីភាពរុងរឿងដ៏អស្ចារ្យរបស់ខ្មែរ ជាពិសេសគឺបញ្ច្រៀបនូវសិល្បៈ វប្បធម៌ របស់ដូនតាខ្មែរដែលបានបន្សល់ទុក»។

ក្នុងនាមជាអ្នកច្នៃម៉ូតសម្លៀកបំពាក់បែបហ្វេសសិន កំពូលម៉ូតរូបនេះបានឱ្យដឹងទៀតថា៖ «ការច្នៃឈុតចូលរួមព្រឹត្តិការណ៍អន្តរជាតិលើកនេះ លោកបានរំលេចឈុតហ្វេសសិន ឱ្យត្រូវនឹងកម្មវិធី ដែលបង្កប់រយលានអត្ថន័យ សូម្បីក្រណាត់ច្នៃឈុតក៏ជា Material របស់ខ្មែរ បង្កើតឡើងដោយស្នាដៃកូនខ្មែរ ជាពិសេសការគូរ ការប៉ាក់ឌិន និងអត្ថន័យគឺបានបញ្ចូលទៅក្នុងឈុតទាំងអស់»។ គួរឱ្យដឹងថា ឈុតចូលរួមកាលលើកទី១ ជាឈុតសមរាត្រី (ព្រះអាទិត្យរះចំកំពូលប្រាសាទអង្គរវត្ត) ចង់ដឹងណាស់ថាឈុតរយលានអត្ថន័យដែលត្រៀមចូលរួមនាលើកទី២នេះ មានរូបរាងនិងលក្ខណៈពិសេសបែបណានោះ កុំភ្លេចបន្តតាមដានជាមួយគ្នានៅលើផេកផ្លូវការរបស់ Oliva Kong ។

រីឯ ណាន វីសារ ចំពោះការបង្ហាញវត្តមានក្នុងដំណើរបេសកកម្មទៅកាន់បារាំងជាមួយ អូលីវ៉ា គង់ លើកនេះ លោកជាដៃស្ដាំ ពោលគឺជាអ្នកសម្របសម្រួលក្នុងការជួយផលិតមាតិកា ទាំងរូបភាព និងវីដេអូ។ ហើយនេះក៏ជាឱកាសសម្រាប់រូបលោកក្នុងការស្វែងយល់ពីកម្មវិធីលំដាប់អន្តរជាតិមួយនេះ ដើម្បីត្រៀមទទួលយកបទពិសោធន៍ក្នុងដើរលើកម្រាលព្រំក្រហមនាពេលក្រោយផងដែរ៕

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។