Peypey Dy ប្រើប្រាស់ថវិកាជំនួយ ១ ម៉ឺនដុល្លារចុងក្រោយធ្វើលេណដ្ឋានឱ្យកងទ័ពខ្មែរដោយសម្ងាត់

តារាប្រុស Peypey Dy ទម្លាយការសម្ងាត់ដែលលាក់ទុកជាច្រើនខែពាក់ព័ន្ធលុយជំនួយសប្បុរសធម៌ដោយលោកពុំដែលធ្លាប់ប្រាប់ហើយតម្រូវលាក់ការ ដើម្បីធានាសុវត្ថិភាពកងទ័ពជួរមុខរបស់កម្ពុជាក៏ដូចជាតបតាមការស្នើសុំពីមន្រ្តីជំនាញផងដែរ។

ប្រមាណជា ១០ ម៉ោងមុននេះ Peypey Dy បានសរសេរសារយ៉ាងវែងអន្លាយបង្ហោះលើបណ្ដាញសង្គមពាក់ព័ន្ធទៅនឹងរឿងលុយជំនួយ ដើម្បីឱ្យមហាជនអស់មន្ទិលសង្ស័យ ណាជាការបញ្ជាក់ឱ្យបានដឹងផងដែរថារូបលោកពុំបានប្រើប្រាស់លុយជំនួយក្នុងកិច្ចការងារផ្ទាល់ខ្លួន ឬយកលុយនោះទៅចំណាយក្រៅដែលប្រាសចាកពីគោលបំណងដែលលោកបានផ្ដើមមូលនិធិ ដើម្បីជួយកងទ័ពខ្មែរ និងជនភៀសសឹកកម្ពុជានោះឡើយ។

តាមរយៈសារដែលបង្ហោះកាលពីយប់មិញត្រូវបាន Peypey Dy រៀបរាប់យ៉ាងដូច្នេះ៖ រាល់ការចំណាយ ខ្ញុំក៏ធ្លាប់បានជម្រាបជូនពីរបាយការចំណាយលើការទិញសម្ភារៈ និងស្បៀង ទិញដី ធ្វើផ្ទះ និងជូនថវិការគ្រួសារសពលើកលែងតែថវិការជូនកងទ័ព និងអ្នករបួសតាមមន្ទីពេទ្យដែលគេមិនអោយបញ្ចេញតួលេខ និងបន្ទាយទាហ៊ានដែលមិនអាចផុសពីទីតាំង និងរូបភាព ហើយថវិការចុងក្រោយជួយធ្វើ លេណដ្ឋាន ដែលជាការសម្ងាត់មិនអាចបញ្ចេញបាន ខាងលើក៏បានប្រាប់អោយខ្ញុំស្ងប់ស្ងាត់កុំតបតចំពោះការរិះគន់ សង្ស័យ តែខ្ញុំសុំប្រាប់ពីអារម្មណ៌ពិត ខ្ញុំពិបាកទទួលយកណាស់។

បន្ថែមលើការរៀបរាប់ខាងលើ Peypey Dy ក៏បានលើកឡើងពីរឿងដីនៅសៀមរាបដែលមានតម្លៃ ២០ ម៉ឺនដុល្លារ គឺលោកបានទិញតាំងពីខែ ៣ និងគម្រោងសង់វីឡាជិត ៣០ ម៉ឺនតាំងពីខែ ៥ ចេញប្លង់រឹងថ្ងៃទី ១១ ខែ ៧ មុនពេលផ្ទុះសង្គ្រាម ដោយមានអាជ្ញាធរមន្ត្រីខាងសុរិយោដីដឹងលឺផងដែរ។

ចុងបញ្ចប់នៃសំណេរ Peypey Dy បានបង្ហាញគោលជំហរយ៉ាងម៉ឺងម៉ាត់ក្នុងការបន្តជួយដល់វីរកងទ័ពកម្ពុជាក៏ដូចជាពលរដ្ឋភៀសសឹកដែលកំពុងជួបការលំបាកដោយសារការបាញ់ប្រហារឈ្លានពានទឹកដីពីចោរសៀម។ លោកបានបន្ថែមថា៖ «សំលេងរបស់ខ្ញុំនៅតែមាន ខ្ញុំចាំបាច់ត្រូវតែប្រើ រឿងខ្លះពិតជាបំបាកទឹកចិត្តមែន តែណ្ហើយជួបហើយ ទទួលរួចហើយ មានអីត្រូវខ្លាចទៀត? បើនៅតែអាចជួយជាតិបានល្នុងពេលនេះ ខ្ញុំពេញចិត្តនឹងធ្វើបន្ត ថ្ងៃស្អែកខ្ញុំត្រឡប់ទៅដល់ខ្មែរម៉ោង7យប់ ខ្ញុំនឹងជម្រាបបន្តទៀត»៕