ព្រះនាង នរោត្តម ជេនណា ថតវីដេអូជាមួយតារាសម្តែងស្រីចិន Jia Nai

ព្រះនាងតូច នរោត្តម ជេនណា ហើយនឹងតារាសម្តែងស្រីចិន Jia Nai ដែលជាតួវ័យក្មេងមួយរូបរបស់ចិនថតវីដេអូជាមួយគ្នា និងបង្ហោះលើប្រព័ន្ធផ្សព្វផ្សាយចិនថែមទៀតផង។ ទោះជាមិនទាន់ដឹងថា តារាខ្មែរ និងតារាស្រីវ័យ ២៣ ឆ្នាំចិនរូបនោះ ជួបគ្នាក្នុងឱកាសអ្វីក៏ពិតមែន តែអ្នកគាំទ្រពិតជាសប្បាយចិត្ត ពេលឃើញសែរាជវង្សខ្មែរដែលជាតារាល្បី បានជួបសំណេះសំណាលគ្នាលេងជាមួយតារាដទៃ។

មិនជាប្លែកឡើយដែលព្រះនាង ជេនណា មានឱកាសបានជួប និងថតវីដេអូលេងខ្លីៗបង្ហោះលើបណ្ដាញសង្គមដ៏ពេញនិយមរបស់ចិន ព្រោះទ្រង់ជាតារាមានប្រជាប្រិយភាពម្នាក់នៅចិន។ កន្លងមកមិនថាកម្មវិធីតំណាងជាតិបែបផ្លូវការ ឬមិនផ្លូវការទេ ម្ចាស់បទ «Truth or game» ជាអ្នកតំណាងជាតិខ្មែរ លើវេទិកាអន្តរជាតិ។

កាលពីខែមុន ព្រះនាង នរោត្តម ជេនណា ត្រូវបានទស្សនាវដ្ដីដ៏ល្បីរបស់ចិន Trendmo អញ្ជើញថតរូប cover ដើម្បីគម្រប់ខួបអនុស្សាវរីយ៍ ៦៧ ឆ្នាំ នៃទំនាក់ទំនងការទូតកម្ពុជា-ចិន។ ក្រោយបង្ហាញព្រះភ័ក្រ្តលើ Trendmo China Magazine អ្នកគាំទ្រគិតថា ទ្រង់អាចនឹងមានឱកាសក្លាយជាតារាសម្ដែងនៅទីនោះ ឬក៏ការចូលរួមកម្មវិធីកម្សាន្តផ្សេងៗរបស់ចិនបន្តទៀត។

ព្រះនាង នរោត្តម ជេនណា ទទួលបានការគោរពស្រលាញ់ច្រើនពីសំណាក់ហ្វេននៅក្នុងប្រទេសចិន។ មិនតែប៉ុណ្ណោះ ទ្រង់ឡើងធ្វើបទសម្ភាសន៍ជាមួយទូរទស្សន៍ក្នុងស្រុករបស់ចិនជាច្រើនមកហើយ ព្រមទាំងធ្លាប់ជួប ក៏ដូចជារួមការងារជាមួយតារាប្រុសស្រីចិនជាច្រើន។ មានពេល១ តារាសម្ដែងចិនដ៏ល្បី Zhao Lusi ធ្លាប់ផ្ញើហត្ថលេខា និងរូបថតរបស់នាង ដល់ព្រះនាង ជេនណា ក្រោយដឹងថាសែរាជវង្សខ្មែរដែលជាតារាសម្ដែង តារាចម្រៀងអង្គនេះ ចាត់ទុកនាងជា Idol៕