PSV Family បកស្រាយបញ្ហា ៤ ចំណុច សង្ឃឹមមហាជនឈប់ចោទ N.John ឆ្លៀតស្រុកទេសមានសភាពការណ៍មិនល្អ យក view

តារាចម្រៀង N.John ដែលខ្មែរស្គាល់ច្បាស់ថាជាកូនប្រុសទី ២ របស់កំពូលតារាចម្រៀងប្រុស ព្រាប សុវត្ថិ បានធ្វើឲ្យមហាជនមិនសប្បាយចិត្ត គ្រាបង្ហោះ Teaser បទចម្រៀងចំថ្ងៃប្រទេសកម្ពុជា ជួបបញ្ហាឈ្លានពាន ពីទាហានថៃម្ដងជាពីរដង។

ដូចកាលពីល្ងាចថ្ងៃ ១២ ខែវិច្ឆិកា ឆ្នាំ ២០២៥ កន្លងទៅ ទាហាន ថៃបានបើកការបាញ់ប្រហារមកលើប្រជាពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្ដាលឲ្យជនស៊ីវិលខ្មែររបួស ៣ នាក់ និងស្លាប់បាត់បង់ជីវិតម្នាក់ ហើយនៅប្រមាណម៉ោង ៧ យប់ N.John បានទម្លាក់វីដេអូខ្លីៗ មានចំណងជើង ៦ បទចម្រៀងដែលនឹងត្រៀមចេញ។

ការបញ្ចេញវីដេអូដើម្បីប្រម៉ូតបទចម្រៀងមុន របស់កូនប្រុសទី ២ តារាចម្រៀង ព្រាប សុវត្ថិ ត្រូវបានមហាជនមួយចំនួនមិនពេញចិត្ត ហើយបង្ហាញអារម្មណ៍ខឹងសម្បារ ដោយគិតថា សុវត្ថិ មុនីនាគ កេងចំណេញពេលស្រុកទេសមានស្ថានភាពមិនល្អ ដើម្បីយក view ច្រើន ឬខ្លះទៀតលើកឡើងថាតារាខ្មែរ ដែលកំពុងប្រកបការងារសិល្បៈនៅក្រៅប្រទេសរូបនេះ មិនខ្វល់ពីការលំបាករបស់ពលរដ្ឋដែលជួបទុក្ខ បែររាំច្រៀងសប្បាយទៅវិញ។

បញ្ហាដែល N.John បញ្ចេញបទចម្រៀងផ្សេងៗមិនថាខ្លី និងចម្រៀងពេញចំតែថ្ងៃដែលថែឈ្លានពានមកលើខ្មែរ មិនមែនម្ដងឡើយ ដោយមហាជនកត់ចំណាំថា រឿងដដែលនេះ ៣ ដងហើយ។ ដូចនេះក៏ចោទ N.John ថាមានបំណងទម្លាក់ចម្រៀងតែថ្ងៃមានបញ្ហាតែម្ដង។ ការបញ្ចេញមតិជេរប្រទេច តាមរយៈការប៉ាន់ស្មានរបស់មហាជនកន្លងមក ទាំងសាមីខ្លួន និងគ្រួសារតារាចម្រៀង ព្រាប សុវត្ថិ មិនដែលបកស្រាយអ្វីឡើយ។

តែថ្ងៃនេះតាមរយៈផេក PSV Family ដែលជាផេកបង្ហាញពីសកម្មភាពគ្រួសារ និងអាជីវកម្មផ្សេងរបស់តារាប្រុសសំឡេងផ្អែម ព្រាប សុវត្ថិ បានបកស្រាយថា ចរិត N.John មិនមែនជាមនុស្សឈ្លើយ មិនដឹងខុសត្រូវ ក៏មិនមែនជាមនុស្សបំពុលសង្គម រឹតតែមិនមែនប្រភេទមនុស្សឆ្លៀតឱកាស បាន View ក្នុងពេលប្រទេសមានបញ្ហា។

ផេក PSV Family បានបន្ថែមទៀតថា ផ្ទុយទៅវិញមនុស្សមួយចំនួនតូចទេដែលមិនយល់ពីស្ថានភាពរបស់គាត់ ហើយក៏មិនយល់ហេតុផល៖

១. N.John កំពុងបន្តការសិក្សាផ្នែកសិល្បៈនៅអាមេរិក តើគាត់គួរតែបោះបង់ចោលការងារ និងការសិក្សា ហើយត្រលប់មកខ្មែរវិញ ឬយ៉ាងណា?
២. N.John មិនមែនជាសិល្បករឯករាជ្យទេ គាត់ម៉េចនឹងអាចលុប អាចផ្លាស់ប្ដូរស្រេចតែចិត្តបាន?
៣. N.John កំពុងនៅក្រោមផលិតកម្មអាមេរិក គ្រប់យ៉ាងត្រូវគោរពតាមការរៀបចំរបស់ផលិតកម្ម ប្រុងឲ្យគាត់លាលែងពីផលិតកម្ម ឬយ៉ាងណា?
៤. N.John ឆ្លៀតឱកាសពេលមានបញ្ហា? បើអ្នកតាមដានគាត់ទើបដឹងមិនមែនជារឿងចៃដន្យទេ ព្រោះគាត់ផុសសឹងរាល់ថ្ងៃជាធម្មតា តើគាត់ត្រូវផុសគេចរបៀបម៉េចទើបមិនចំថ្ងៃមានបញ្ហា? មនុស្សមួយចំនួនទៅវិញទេដែលចំថ្ងៃមានបញ្ហាទាញ N.John ចូលថាឆ្លៀតឱកាស ថាមានបំណង….អ៊ីចឹងសូមអ្នកទាំងអស់គ្នា សូមចិត្តកុំចាប់កំហុសគ្នាឯងអី៕

រូបភាព៖ PSV Family និង N.John

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត