ចេញបទណាក៏ល្បីៗ! «យប់ស្ងាត់» បទដ៏ពេញនិយមរបស់ ទេព ពិសិដ្ឋ MV ទើបទម្លាក់ប៉ុន្មានថ្ងៃ តែប្រជាប្រិយភាពខ្លាំង

តារាប្រុសរ៉េបវ័យក្មេង សំឡេងពីរោះ ទេព ពិសិដ្ឋ បានទម្លាក់ MV បទ «យប់ស្ងាត់» ក្រោយផ្ទុះការពេញនិយមខ្លាំងលើបណ្ដាញសង្គម Tik Tok។ បទថ្មីនេះរបស់ Rapper ថ្មីរូបនេះ ក៏មិនសូវខុសពីចម្រៀងមុនៗរបស់លោកដែរ ភាគច្រើនល្បីលើបណ្ដាញសង្គមផ្សេងជាមុនសិន ទើបចេញ MV ជាក្រោយ។

ទាំង MV និង lyric របស់បទ «យប់ស្ងាត់» តារាប្រុសវ័យក្មេងក្នុងវិស័យចង្វាក់ហ៊ីបហប ទេព ពិសិដ្ឋ បានផលិតចេញយ៉ាងល្អឥតទាស់។ ដូចនេះហើយមិនមែនជារឿងចៃដន្យឡើយដោយមានអ្នកគាំទ្រខ្លាំង ហើយអ្វីដែលធ្វើឲ្យអ្នកគាំទ្រអតីតតារាហង្សមាសរូបនេះ គឺអ្នកធ្វើវីដេអូ Reaction បរទេសជាច្រើនពីបទនោះដែរ។

ការរៀបចំខ្លួនរបស់ ពិសិដ្ឋ ក្នុង MV បទថ្មីក៏មើលទៅឡូយខ្លាំង ដែលជាស្ទីល៍របស់តារារ៉េបទូទៅចូលចិត្ត ដោយមានការពាក់នូវគ្រឿងអលង្ការជាច្រើន និងធ្មេញស្រោមមាសបន្ថែម។ ក្រឡេកទៅមើលការគាំទ្រលើបណ្ដាញសង្គម Facebook បទ «យប់ស្ងាត់» មានអ្នកចូលមើលរហូតទៅដល់ជាង ២ លានដងឯណោះ ហើយអ្នក Like វិញដល់ទៅជាង ១៤០ K។ ចំណែកក្នុង YouTube វិញបទថ្មីរបស់ម្ចាស់ពានរង្វាន់ពានកម្មវិធី The Voice Kids Cambodia រដូវកាលទី២ បានហក់ឡើងលេខ៥ជាបទពេញនិយមស្ដាប់។

អ្នកគាំទ្រ ទេព ពិសិដ្ឋ បានលើកឡើងថាតារាចម្រៀងរូបនេះ នៅពេលដែលបត់ខ្លួនចូលមកប្រឡូកក្នុងវិស័យ Hip Hop ,R&B កាន់តែទទួលបានប្រជាប្រិយភាព។ អ្នកគាំទ្រខ្លះលើកឡើងថាបទថ្មីមួយណាក៏ដោយរបស់តារាប្រុសវ័យ១៨ ឆ្នាំ រូបនេះល្បីទាំងអស់៕