ក្រោមការបរិច្ចាគរបស់ RM អាចធ្វើឱ្យកាតាឡុកថ្មីមួយដែលជាប្រជុំនៃគំនូរបុរាណរបស់កូរ៉េចំនួន ២៤ ផ្ទាំង ដែលកំពុងតម្កល់ទុកក្នុងសារមន្ទីរ និងវិចិត្រសាលធំៗនៅក្រៅប្រទេសកូរ៉េខាងត្បូងបានបោះពុម្ពផ្សាយ ទុកជាឯកសារ សម្រាប់ការអប់រំ និងស្រាវជ្រាវ។

កាលពីថ្ងៃទី ១១ ខែមីនា មូលនិធិបេតិកភណ្ឌវប្បធម៌កូរ៉េនៅក្រៅប្រទេស បានប្រកាសចេញផ្សាយកាតាឡុកដែលមានចំណងជើងថា “IT’S STILL HERE: Shining Korean Old Paintings Abroad”។ ការបោះពុម្ភផ្សាយនេះអាចធ្វើបាន តាមរយៈការប្រើប្រាស់ថវិកាដែល RM បានបរិច្ចាគទៅកាន់មូលនិធិកាលពីឆ្នាំ ២០២២។

កន្លងមក តារាប្រុសដែលមានឈ្មោះពេញថា Kim Namjoon បានបរិច្ចាគថវិកាចំនួន ១០០ លានវ៉ុន ឬប្រហែល ៧៥ ០០០ ដុល្លារអាមេរិកទៅកាន់មូលនិធិនេះក្នុងឆ្នាំ ២០២១ និង ២០២២ ដើម្បីគាំទ្រដល់គម្រោងពាក់ព័ន្ធនឹងការអភិរក្ស ការជួសជុល និងការទាញយកអត្ថប្រយោជន៍ពីបេតិកភណ្ឌវប្បធម៌កូរ៉េដែលស្ថិតនៅក្រៅប្រទេស។

កាតាឡុកនេះជាប្រជុំនៃគំនូរបុរាណកូរ៉េចំនួន ២៤ ផ្ទាំង ដែលបានគូរឡើងចាប់តាំងពីប្រមាណ ៤០០ ឆ្នាំ ពោលគឺនៅអំឡុងដើមសតវត្សរ៍ទី ១៦ រហូតដល់សតវត្សរ៍ទី ២០។ ការប្រមូលផ្តុំនេះរួមមាន គំនូរទេសភាព គំនូររូបមនុស្ស គំនូរឯកសារ គំនូរសត្វស្លាប និងគំនូរសត្វផ្សេងទៀត។

ក្នុងការបោះពុម្ពផ្សាយនេះ មូលនិធិបេតិកភណ្ឌវប្បធម៌កូរ៉េនៅក្រៅប្រទេសបានសហការជាមួយស្ថាប័នក្រៅប្រទេសដើម្បីទទួលបានសន្លឹករូបភាព ហើយបានចែកចាយកាតាឡុកនេះទៅកាន់បណ្ណាល័យសាធារណៈ និងស្ថាប័នស្រាវជ្រាវធំៗទាំងក្នុងប្រទេសកូរ៉េខាងត្បូង និងក្រៅប្រទេស ក្នុងគោលបំណងទុកជាប្រភពឯកសារសម្រាប់ការតាំងពិព័រណ៍ ក៏ដូចជាការអប់រំ និងការស្រាវជ្រាវជាដើម។

យោងតាមទិន្នន័យរបស់មូលនិធិដដែលនេះ គិតត្រឹមខែមករា ឆ្នាំ ២០២៦ មានវត្ថុបេតិកភណ្ឌវប្បធម៌កូរ៉េចំនួនជាង ១សែន ២ម៉ឺនមុខ ស្មើនឹង ៥៦ ១៩០ ដុំកំពុងស្ថិតនៅក្រៅប្រទេស។ មូលនិធិនេះក៏បានបង្ហាញឆន្ទៈថា នឹងបន្តជំរុញគម្រោងនានាដែលអាចនាំយកវត្ថុបុរាណទាំងនោះត្រឡប់មកកាន់ប្រទេសកំណើតវិញ ក៏ដូចជាចូលរួមអភិរក្សបេតិកភណ្ឌវប្បធម៌កូរ៉េនៅក្រៅប្រទេសក្នុងពេលតែមួយ៕