នៅថ្ងៃទី១ ខែមេសា នេះ Ryu Hwa-young បានប្រកាសគម្រោងរៀបអាពាហ៍ពិពាហ៍ជាមួយមិត្តប្រុសអ្នកជំនួញ ដែលនឹងមកដល់នៅថ្ងៃទី១២ ខែកញ្ញា ឆ្នាំ ២០២៦។

ដោយបានចែករំលែកដំណឹងមង្គលនៅលើគណនី Instagram  តារាស្រីវ័យ ៣២ឆ្នាំរូបនេះ បានរៀបរាប់ថា៖ “ជាមួយនឹងអារម្មណ៍រំភើប និងភាពច្បាស់លាស់ ពួកយើងបានសម្រេចចិត្តដើរលើវិថីជីវិតរួមគ្នា។ លើសពីពាក្យថាស្នេហា ពួកយើងបានជ្រើសរើសក្លាយជាគ្រប់យ៉ាងសម្រាប់គ្នាទៅវិញទៅមក។ នៅថ្ងៃ ១២ ខែកញ្ញា ឆ្នាំ ២០២៦ ពួកយើងនឹងរៀបការហើយ”។

Ryu Hwa-young បានសរសេរទៀតថា៖ “ខ្ញុំសូមអរគុណយ៉ាងស្មោះអស់ពីដួងចិត្ត ចំពោះការអបអរសាទរយ៉ាងកក់ក្តៅពីសំណាក់អ្នកទាំងអស់គ្នា។ ចំពោះអ្នកដែលខ្ញុំមិនបានជួបប្រាប់ដំណឹងនេះដោយផ្ទាល់ ខ្ញុំសូមចែករំលែកអារម្មណ៍របស់នាងខ្ញុំជាមួយអ្នកទាំងអស់គ្នានៅទីនេះ”។

ទន្ទឹមនឹងសំណេរនេះ តារាស្រីពហុជំនាញ ក៏បានភ្ជាប់រូបភាពជាមួយនឹងមិត្តប្រុស ដែលគេស្គាល់ថាជាអ្នកជំនួញ និងមានអាយុបងតារាស្រី ៣ ឆ្នាំ​ ចំនួន ២ សន្លឹកផងដែរ។

សូមរំឭកថា Ryu Hwa-young បានប្រឡូកសិល្បៈក្នុងឆ្នាំ ២០១០ ជាសមាជិកក្រុម T-ara ហើយបានចាកចេញពីក្រុមក្នុងឆ្នាំ ២០១២ ដើម្បីចាប់អាជីពជាតារាសម្ដែង។ នាងធ្លាប់បានបង្ហាញខ្លួនក្នុងរឿងភាគជាច្រើនដូចជា រឿង OK Family, Ex-Girlfriends’ Club, Hello, My Twenties!, My Father Is Strange, The Beauty Inside, និង The Player 2: Master of Swindlers។​ បច្ចុប្បន្ន Ryu Hwa-young បានបែរមកបង្កើតមាតិកានៅលើឆានែល YouTube និងភ្ជាប់ទំនាក់ទំនងជាមួយអ្នកគាំទ្រតាមរយៈគណនីបណ្ដាយសង្គមផ្ទាល់ខ្លួន៕